[真人真事][校園][純愛]《婚宴上的重遇》: 第二十二章

我返到屋企,
第一時間就梗係査山羊座同埋處女座夾唔夾啦
你知我啦
本身冇星座嘅知識
以前細細個聽人地講嗰陣,
每一次都搭唔到嗲
久而久之,
就唔知星座係乜野一回事
就連星座名呀,
都唔可以全部列舉晒




估唔到我今晚竟然會上網走去查
所以有人話,
鍾意一個人,
係會連自己都改變埋
呢句說話我係深表同意
咁我開完電腦之後,
就梗係搵google大師啦
我喺上面打「山羊座 處女座」
之後撳搜尋,
諗番起都好乸硬膠




不過呢啲野係以前細個先會做得出
大個左,
唔會再有咁嘅心機,
唔會再有咁嘅時間,
而最重要一樣野,
就係唔會再有一個人
驅使到你再做呢啲野
返返嚟先,
咁我睇嗰啲搜尋結果,
佢話處女座同埋山羊座都係土象星座




我心諗都唔知係啲乜野
係咪咁就係代表我地好夾
大家都係土象星座,
各位星座嘅朋友千祈唔好笑我以前係咁無知
因為真係乜都唔識
之後再睇處女座個介紹
「本身散發著美麗的氣質。」
都係嘅,
我完全同意呢一句
但係我唔係想睇星座介紹,
我係想知究竟處女同埋山羊夾唔夾
之後我再搜尋「山羊座,處女座夾唔夾」
我依家打返出嚟都頂唔順
戇居到冇朋友
我睇嗰啲搜尋結果,




完全都唔知講乜,
佢地識我但我唔識佢
睇到我一頭霧水,
唉,
呢啲野都係算啦
唔係我嗰範就真係唔係我嗰範,
早知以前細個落力啲刨星座啦
係咁嘅話我咪知道究竟處女同埋山羊夾唔夾囉,
一日都係輸自己.

之後我再上多一陣網,
當時係2008年
未算係面書嘅全盛時代,
不過已經幾多人玩
特別係中學生,




至少我身邊啲人,
當時都好快開左面書戶口
上上下網我都上到冇野做
我就開多一次面書,
睇下若凝個profile
同埋啲相,
自從我加左佢面書之後,
其實若凝啲相我已經成日都睇
不論係佢單人相,雙人相,
定係群體相
基本上晚晚都會睇
因為我有個好低b嘅諗法
就係想臨瞓前睇完若凝之後,
一陣入到夢境都可以見到佢
我係咪痴左線




自己都唔敢肯定,
但係總之就想見到佢
當然啦,
後來嘅我已經知道
咁樣做係冇用,
你心入面好想見到一個人
甚至你臨瞓前望住佢張相都好,
當你瞓著覺去到夢境嗰陣,
你都係見佢唔到
唔會話因為你成日諗住佢,見住佢,
發夢就一定見到佢
但我嗰陣唔知架嘛,
唔知點解,
我總係覺得若凝係有啲野
一個女仔失戀竟然冇叫春




我打死都唔信,
鍾意一個人就係咁架啦,
你會好想了解佢多啲,
唔係話想知佢有咩秘密
絕對冇抱住一個食花生嘅心態,
而係純粹想知道佢背景啫,
係佢咋,
其他人唔會,
你估我真係得閒得滯咩
或者咁樣係有啲痴漢,
但講到最後,
都只係因為佢就係若凝.