[真人真事][校園][純愛]《婚宴上的重遇》: 第二十四章

之後我地就分開去車仔麵舖啦
你問我點解要咁樣做,
我都答你唔到
總之嗰陣我就唔想俾人知
始終我講左大話丫嘛,
所以明明目的地係一樣,
我同若凝今次都要返分開行
當我去到,
原來若凝已經坐左喺度
一個人好似好悶咁樣




呢個時候我竟然有少少自責
真係講你都唔信
用返我當時嘅思維,
其實我覺得自己係冇做錯
一個人行有乜問題
甚至一個人早左去到坐喺度等,
我都覺得冇問題
好簡單,
當我約左其他人,
我早左去到等,




如果對方唔係準時嚟
其實我真心覺得冇問題
當然唔好遲太多啦
半個鐘以內我都可以接受
因為我覺得咁樣可以寧靜下
所以我好少鬧人地遲到
亦都唔係好介意,
特別係依家科技咁發達,
上住連登等人就已經可以消磨時間
但係,




當我嗰陣見到若凝一個人坐喺度
有少少悶悶不樂咁嘅樣
唔知點解我硬係覺得自己有問題
平時扔低其他人唔覺架,
同埋若凝悶悶不樂都只係我想像啫
又未經證實佢真係因為咁樣而悶,
按道理我係唔需要自責
今次咁奇怪嘅
姑且勿論點都好啦,
陣間都係同佢一齊返去算
俾人見到就俾人見到啦,
我始終都係覺得,
若凝發悶嗰陣嗰樣冇平時開顏嗰個樣咁靚
當係為左自己又好點都好,
若凝:「到左喇




你食乜野呀 」
我:「照舊啦
蟹柳芝士腸幼麵,
你未叫咩 」
若凝:「未呀,
你知啦
車仔麵叫完好快就出,
到時我等你又唔係,
等得耐啲麵都淋
唔等你又好似冇禮貌 」
我:「咁有家教嘅咩 」
若凝:「不嬲都有
識乜野丫你 」
事實上,
後來我每一次同若凝食野,




有時我遲左去,
佢都真係會等埋我先叫野食
真係冇吹水.

大家都應該仲記得,
我今次約佢出嚟食晏晝
其實係想遲啲約佢出嚟溫書
準備考試,
但係點樣開口呢
頭先我沿路行過嚟嗰陣都諗左一陣,
最後都係決定採取一啲較為婉轉嘅方法
我:「就嚟考試喇喎.」
若凝:「係呀
喂我想問你呢,
呢間學校個考試模式係點樣架 」




我:「以我所知就同出面學校差唔多
冇乜大分別.」
若凝:「係咪真架
唔好呃我呀 」
我:「今次堅 」
若凝:「估唔到咁快就過左個零兩個月 」
我:「係,
所以其實中七都唔係距離我地好遠 」
若凝:「咁就好似誇張少少喎
不過上左中六真係吃力左 」
我:「你會考咁高分都覺得吃力
我咪可以食屎 」
若凝:「有時會考高分同上左中六個進度其實冇乜關係 」
我:「咁我就唔知,
因為本來我就唔高分 」




若凝:「唉,
屋企太多誘惑
如果我留喺屋企一定溫唔到書 」
佢咁樣講簡直係求仁得仁
簡直係送左一個助攻俾我
我梗係唔會浪費黃金機會啦
我:「咩誘惑 」
若凝:「咪電腦囉,
一見到佢我就忍唔住會開
上網又好煲劇又好
總係會有野做 」
我:「我完全明白你
因為我都係咁 」
講真其實我梗係唔係咁啦
我一開頭已經講過我係鍾意喺屋企溫書多啲,
基本上好少外界嘅因素可以影響到我
但係依家唯有講大話啦,
咁先可以達成我目的
若凝:「你明呢,
我之前會考都係日日出嚟溫 」
我:「我都係啦,
你見我成日去麥當勞就知 」
若凝:「咁又係喎,
你嗰陣真係成日嚟麥當勞 」
我:「出嚟溫點都好啲 」
若凝:「不如我地約出嚟丫
搭車去遠啲嗰個圖書館
嗰度冇咁多人 」
我講左咁耐就係等呢句,
既然若凝依家主動問我出唔出嚟溫書
咁我都冇拒絕嘅理由
我:「好呀.」
若凝:「咪走數呀你 」
我心諗點會走數,
原本我個計劃係諗住間接咁樣問你,
點知依家竟然係你問番我轉頭
比預期中更加順利
我:「快啲食啦,
唔係一陣遲到 」
若凝:「你唔好食得慢過我呀 」
食完之後,
我:「返去咯 」
若凝:「今次唔使分開行呀 」
我:「一齊啦,
我諗佢地唔會見到架喇 」
我最想講嗰句「唔想見到你悶悶不樂」,
始終都係講唔出口
真係好冇用,
若凝:「好呀 」
若凝講完之後笑左一笑,
喺側面睇佢呢個笑容,
真係好靚,
見到佢呢個笑容,
就算我俾人見到同佢一齊行返嚟,
甚至比我班豬朋狗友踢爆我講大話,
都已經變得唔再重要.