[真人真事][校園][純愛]《婚宴上的重遇》: 第二十一章

若凝:「好,
睇完去食野 」
我:「好呀,
不過你諗食乜 」
若凝:「你係咪冇所謂先 」
我:「係呀,
擺得落口嗰啲都食
唔好要我諗就得喇 」
若凝:「不如食樓下間茶記
嗰度啲乾炒牛河好好食 」




我:「好 」
咁我地落到去就叫左兩碟乾炒牛河,
因為我本身都係鍾意食乾炒牛河
講真真係同若凝冇關
我唔會癲到因為同佢食同一樣野就有無限幻想
若凝:「信我啦好好食架 」
我:「其實我有樣野想問你好耐 」
若凝:「咩呀 」
我咁八卦,
梗係想問佢同佢前男友啲野




其實呢幾日我都好想問佢,
不過學校好似唔方便問
有時返到屋企,
夜晚沖涼嗰陣又好,
瞓覺嗰陣都好
呢個問題都困擾左我好耐
但到依家,
兩個人獨處有得問嗰陣,
唔知點解真係好難問得出口
所以我最後都係問左第二樣




我:「點解你成日都知邊度有好野食 」
若凝:「冇呀,
得閒都會自己出去食
咁咪知道邊度有好野食囉 」
其實我真係唔信佢會自己一個出去食
可能佢唔想講同邊個食啦,
所以就話自己一個食
咁既然佢唔想講,
我都無謂追問落去
自己識做啦
我:「咁得閒成日出嚟食
屋企冇煮飯咩 」
若凝:「有時候daddy媽咪太忙真係冇煮飯
一個月總有十幾日係咁樣,
所以你好幸福呀知唔知呀




日日都有得食住家飯 」
我:「嘩你講到我好似身在福中不知福咁樣
其實我都係成日喺屋企食架
你就講到我好似唔鍾意喺屋企食 」
若凝:「咁係呀嘛,
出面啲野點樣好食
我都覺得一定及唔上屋企煮嗰啲
又有啖湯水飲下,
仲要唔使行喎 」
我:「咁羨慕嘅話得閒上嚟我嗰度食囉
多個人多雙筷咋嘛 」
其實呢句我係講笑
當然唔係認真啦
因為我覺得俾自己嘅朋友上嚟同屋企人一齊食飯係好怪
就連呀成佢地我都冇試過帶上嚟




更何況今次仲要係女仔
我咁講都係想講下笑啫,
點知若凝竟然話:「係咪真架
會唔會唔方便
定係其實你有企圖,
扮晒野約我上你屋企 」
我:「係呀係呀
你最好小心啲 」
若凝:「嘻嘻,
我知你唔會嘅 」
我:「神又係你,鬼又係你
又話我唔會又話我有企圖 」
若凝:「總之我知你唔會啦 」
我:「點解咁肯定呀 」
若凝:「你唔好睇少女仔嘅直覺呀




準到冇朋友 」
我:「唔係我讚自己,
我都覺得自己係君子 」
若凝:「嘔
君子你就肯定唔係架喇 」
我:「俾下面讚下我唔得嘅 」
若凝:「今次真係唔好意思,
一聽到你話自己係君子真係忍唔住要篤爆你
唔係冇色心,冇企圖就代表係君子架嘛.」
我自己喺心入面同自己講,
若凝,
你冇估錯
我真係唔會,
女神就係唔可以褻瀆.





之後我地繼續坐喺茶記
一路食住乾炒牛河,
一路傾下計,
若凝:「原來你係山羊座架 」
我:「你又真係知架喎 」
若凝:「梗係啦面書有得睇嘛 」
我:「你唔俾我講假嘅 」
若凝:「咁你係咪一月十四號生日丫 」
我:「係 」
若凝:「咁咪就係囉 」
我:「咁你係咩座呀 」
若凝:「我面書咪有寫生日囉,
你見唔到咩 」
我:「我冇睇 」
死喇原來我唔記得左呢樣
唔怪得之好似真係有樣野未做啦
原來係冇睇佢幾時生日
若凝:「都唔知話你咩好喇
我係處女女呀
八月廿八號 」
我:「其實你信唔信呢啲野 」
若凝:「老實講唔會信到十足十,
即係有啲人話呢個星座同嗰個星座嘅人唔夾呢啲呢,
例如我識左一個同我唔夾星座嘅人,
我唔會因為佢同我唔夾星座,
而唔同佢玩,傾計
主要都係睇返嗰個人本身 」
我:「我都唔係好信,
不過當故仔聽下都ok 」
當然啦我都係口是心非
我今晚返到屋企,
就查下山羊座同埋處女座係點