[真人真事][校園][純愛]《婚宴上的重遇》: 第十七章

咁樣傾下傾下,
都傾到成五點幾先走
咁我同若凝就一齊放學啦
行行下,
若凝無啦啦講:「呀行,
你肚唔肚餓呀 」
呢句潛台詞係乜野
擺明就係若凝佢自己肚餓啦
好彩自小喺屋企對得女人多
知道晒佢地嗰啲暗語


尤其是係我家老娘
每一次問我肚唔肚餓嗰陣
其實就係佢自己肚餓
久而久之我已經洞察到呢樣野
依家若凝咁樣問,
一於玩下佢先
我:「唔餓呀做乜野呀 」
若凝:「冇呀,
問下啫 」
若凝咁嘅反應代表佢一定係肚餓


好問唔問問呢樣,
我就唔信喇
我:「想食野呢 」
若凝:「點解你會知架 」
我:「你同我呀媽一樣
每一次自己肚餓嗰陣,
佢都會問我餓唔餓
明明就係佢自己想食野 」
若凝:「證明伯母都幾後生
仲有一顆少女心 」


我:「我覺得唔係我呀媽後生喎
而係你老 」
若凝:「喂講乜都得
知唔知唔可以話女仔老架 」
我:「我知
但只限女仔丫嘛 」
若凝:「你條友今日好搏打 」
我:「鬼叫你太衰喇
死都要拉埋我落水
明明我就唔使幫你黐野
大把人主動幫你 」
若凝:「嗰啲人好煩,
搵你幫手頂住啫
唔好咁小器啦 」
我:「我咁大量,


點會小器 」
若凝:「係呀係呀
最大方係你
咁食唔食野呀 」
我:「食就食得嘅
不過等一陣啦 」
若凝:「等咩 」
我:「咁我都要打返屋企,
叫我呀媽唔好咁快煮飯,
依家食完邊有咁快可以再食 」
咁之後我就打俾我呀媽,
我:「今晚唔好咁快煮飯
依家我約左足球隊嗰班人食下午茶,
佢地話傾戰術順便去食下午茶
仲要呀sir請 」


媽:「咁好啦.」
收線之後,
若凝:「嘻,傻仔 」
我:「笑乜野 」
雖然我話就話問佢笑乜野,
但其實我一啲都唔在乎佢點解笑,
因為我可以再一次見到佢驚為天人嘅笑容
咁就已經得啦,
點解笑,
重要咩?
若凝:「冇呀
覺得好笑咪笑囉.」
我:「奇奇怪怪
點呀食乜野呀 」
若凝:「m記囉好冇呀 」


我:「好呀,
去返你做part time嗰間 」
若凝:「梗係唔去啦
我之前咁樣不辭而別,
我返去仲唔驚俾佢加料呀 」
我:「抵你死啦
咁衰丫喇.」
若凝:「係咁架啦 」
我:「去邊間呀 」
若凝:「行遠少少去第二間咪得囉.」
我:「有近唔去去遠嘅
你係得嘅 」
若凝:「你唔明架喇,
去嗰度做完野,
一般都唔係好想再返去 」


我:「我梗係唔明啦,
邊似你咁衰
呃人話考試順便唔撈 」
若凝:「行啦咁多野講.」

之後我地去到麥當勞,
嗰度好多人
大部分都係學生妹,學生哥
咁我就叫若凝坐喺度霸位,
我出去買,
若凝:「雞翼餐
要全翼,
飲雪碧小冰.」
買完返嚟之後,
若凝:「又係脆辣雞腿包
都估到你 」
我:「食左十幾年,
唔會再轉 」
若凝:「咁長情呀 」
我:「係呀 」
我呢句「係呀」,
日後我先發現,
無論係脆辣雞腿包,
定係一個人,
鍾意左嘅野,
就唔會再變
好,
返返嚟先
若凝:「嗰陣就係咁樣認得你
日日食同一個餐,
坐同一個位 」
我:「有人話窮則變變則通,
但係我覺得,
不變應萬變比較啱我
有時唔使刻意去變,
可能我懶丫
又或者安全感不足,
驚改變之後會有反效果 」
若凝:「其實係
有好多人為左其他因素而改變,
但其實變完之後真係好咩 」
我:「就好似脆辣雞腿包咁樣,
如果我食第二個餐,
之後發覺原來冇脆辣雞腿包餐咁好食,
咁呢廿幾蚊咪即係嘥左囉
重點係我以後都追唔返今日嘅野
食少一次就係食少一次
當然有人可能會話,
你未食過唔知架
但我唔會去搏囉 」
若凝:「估唔到一個脆辣雞腿包餐,
背後有咁大嘅道理 」
我:「唔好笑我呀
平時吹水都有啲料架 」
若凝:「不過我其實覺得啱嘅,
有啲野你要改變嗰陣,
最難克服係你適應嗰個過程 」
我:「係,
所以我好少為左身邊嘅野而去改變
做人都係要諗自己 」
其實我都係吹水啫,
當初我為左見若凝一面
永遠都係行經麥當勞嗰條路,
有時唔順路都照行,
當然啦若凝佢唔會知
若凝:「你咩台架
人囝 」
我:「唔好啦,
我好少用sms
打字唔快同埋唔想學 」
若凝:「咁懶架
咁呀,
面書有喇呱 」
我:「有 」
若凝:「咁你add我啦,
我叫做x英文全名) 」
我:「今晚加你啦 」
講開又講,
當年面書冇依家咁多野玩,
我諗主要用嚟都係傾計
估唔到咁快可以知道若凝個面書
之前真係諗都冇諗過,
傾完之後我地就各自返屋企喇.