[真人真事][校園][純愛]《婚宴上的重遇》: 第十六章

若凝:「係喎差啲唔記得左添
呢個送俾你 」
若凝送左一個類似守護符嘅野
類似日本神社嗰啲
我:「幾靚喎多謝 」
若凝:「鍾唔鍾意呀 」
其實我想講,
你送乜我都鍾意架啦
廢話
有時人就係咁主觀,




鍾意一樣野,唔鍾意一樣野,
其實唔係睇嗰件禮物
而係睇邊個送俾你
一個你重視嘅人,
喺街邊啲公園求其摘一朵花
你都會話好靚
好明顯我就係呢類人喇
我:「梗係鍾意啦
有人送野俾我點會唔鍾意 」
唉,




我啲老毛病又發作
自己明明就好鍾意,好開心,
但又要扮到懶係唔在乎咁樣
若凝:「鍾意就好啦
你知啦,
如果你話唔鍾意
我好肉酸架嘛 」
我:「我點會咁唔識做
正常社交都知道啦
有人送野俾你梗係話鍾意 」




若凝:「哦,
即係你依家只係應酬我啦 」
自己捉蟲添
我:「今次又唔係喎真係鍾意 」
若凝:「都唔知係咪真
頭先答得咁快 」
我:「真架
呃你有金執咩.」
若凝:「就係有金執
開學第一日就想呃我
好彩我醒目 」
自己再一次自掘墳墓
我:「唉,
咁我日日帶住你信未 」
若凝:「講笑咋




唔使逼自己啦 」
我:「絕對唔會吹水
一定日日帶著.」
若凝:「傻仔 」
老實講丫,
原本我都諗住日日帶住架喇
因為佢係若凝第一次送俾我嘅野,
人總係對第一次特別上心
所有野都係,
可能日後會有更加靚嘅邂逅,
但係最深刻最重視嘅,
始終都係第一次
咁我依家驚若凝真係以為我應酬佢,
所以咪講埋出嚟囉,
一於就扣喺銀包嗰度.





食完之後就返到去班房,
之後班主任無啦啦入左嚟
佢叫班會嗰啲人放左學留低,
因為要傾下壁報
唉,
又冇得準時放學
呢個時候我同坐喺我隔離嘅若凝講:「多得你唔少 」
若凝:「你唔好賴我呀
你要賴嘅就賴嗰班叫我做嘅人 」
不過算啦,
都叫做有得對住若凝多一陣
冇左個橙都仲有個桔
依家唔到我唔咁樣諗架啦,
反正入左班會都係已成定局




咁去到放學計埋我同若凝就有七個人留低
一個主席,一個副主席,一個文書,
一個財政,一個總務,
之前已經講左我同若凝係做宣傳
所以總共有七個人,
咁就成班人喺度傾啦,
見到有幾個狗公全程都係望住若凝
不過若凝就好少理班狗公,
其實都真係幾好笑
不過我同若凝嘅參與度係最少
全部都係話冇問題,
你地方便就得
之後無啦啦講到要貼壁報,
即係將剪好左嘅材料貼上去
點知有啲人話唔得閒




另一啲就話去補習,
咁樣班主任問若凝得唔得閒
可唔可以幫手黐上去
咁樣若凝就話冇問題
但係就想搵埋我一齊黐
若凝:「miss呀,
個壁報趕唔趕架 」
班主任:「都幾趕架做乜野 」
若凝:「冇呀我驚我會黐得好慢
阻到你地啫 」
班主任:「咁你搵到個幫手囉 」
若凝:「唔該miss 」
之後若凝同我講,
若凝:「咁就辛苦你啦行哥 」
之後有個狗公出聲,
由於佢個戲份唔重,
我都費事幫佢起個名
直接叫佢狗公一號算
狗公一號:「若凝不如我都幫埋你呀 」
若凝:「唔使啦
費事阻住你補習啦 」
你地冇睇錯,
呢個狗公一號就係頭先講話要去補習嘅粉腸
一聽到若凝放學留喺度做壁報,
即刻話幫手
啱啱先話補習,
好心你都等一陣先出聲啦
真係路人皆見,
最好笑嘅係,
佢唔放棄
繼續追問落去
狗公一號:「唔阻呀
我可以留低幫一陣.」
若凝:「人多盞手腳亂
我同呀行兩個夠架喇 」
狗公一號:「咁好啦 」
狗公一號完敗.