[真人真事][校園][純愛]《婚宴上的重遇》: 第十八章

返到屋企,
我梗係唔係即刻加佢面書
唔係因為我唔記得,
亦都唔係因為我唔重視,
相反,
其實我係重視到不得了
你估我唔想即刻加咩
但係如果我咁做嘅話,
我驚會俾若凝以為我有啲乜野特別意思
咁快加係人都知咩事啦




仲要若凝又唔蠢,
我唔想俾佢知道其實我係鍾意佢
每一個毒男都係咁樣
對住其他人,
想做乜就做乜
我行我素
但係對住自己最鍾意嘅人,
就變得綁手綁腳
做每一樣野之前,
都會衡量好多因素




當然啦,
大個左先發現,
以前嘅自己有呢個諗法係好戇居
或者人地根本就唔重視你,
唔會花心思喺你身上
就算會呀,
咁又點啫
俾佢知咪俾佢知囉
又唔係話啲乜野特別野
所有野都係自己攞嚟煩




作繭自縛.

好講返當時先
太早加固然唔得啦,
但係太夜加都唔得喎
一嚟第二日都要返學,
咁我見若凝佢皮膚咁好
又冇熊貓眼,
我諗應該都唔會好夜瞓呱
加上本身我自己都唔係話好夜瞓嗰啲,
所以經過我精確計算之後
九點半嗰陣加就啱啱好
唔會太早,
亦唔會太夜搞到冇得傾計
不遲亦不早




我仲好記得嗰晚,
一早食完飯沖埋涼,
上左一陣網之後就開定個面書
連機都冇打,
平時我都會同呀成佢地打機
嗰晚就唔好啦,
驚一陣掛住打機,
唔記得左我個完美計劃
等等下,
電腦上面嘅時鐘顯示21:30,
咁我就search若凝個名啦
一搵就搵到,
咁我就二話不說,
立刻撳新增朋友個按鈕
之後我睇佢個頭像,




原來係用左佢自己個樣icon
相入面佢係企喺公園嗰度,
真係好靚女
我冇因為呢幾日成日同佢一齊而感到厭倦
有人話,
人類係一樣追求新鮮感嘅動物,
我唔否認呢點
你玩一隻game,
做一樣野,
甚至乎你睇av都 ,
如果你全部都係玩/做/睇死同一樣嘅話,
的而且確會好乏味
你話唔悶我跟你姓
但係唔知點解,
對住若凝我真係成日都有衝擊感




有時行行下佢拎一拎轉頭望我,
個感覺同當日我第一次見佢嗰陣冇分別
都係俾到我好大衝擊,
嚇到心都離一離就誇張啲
但有時真係會緊一緊張
正當我沉醉喺佢個頭像嗰陣,
佢終於接受左我邀請
大家做左”朋友”,
之後佢好快就inbox我
若凝:「睇死你都係唔記得左加我啦
咁遲先加.」
我心諗梗係唔係啦,
不過想講又冇得講嗰下真係好慘
我:「大姐我返嚟都要抖一抖丫嘛 」
若凝:「仲話踢波喎




體能咁差架 」
我:「痴線我踢街場咋
你當我踢英超 」
若凝:「講下笑啫咁大反應 」
我:「大家咁話 」
若凝:「點解你面書冇相嘅 」
我:「男人老狗影乜野相 」
若凝:「唔影得咩 」
我:「唔係唔得,
不過我覺得好怪囉
唔識自拍 」
若凝:「不如遲啲我幫你影啦
我估你都係冇人同你影 」
我:「唔好咁坦白啦 」
若凝:「講中左呢,
唔緊要喎
好多人讚我影相好靚
唔使擔心 」
我:「咁多謝你先 」
若凝:「影完你要擺上去喎.」
我:「真係影先算啦 」
若凝:「你屋企有冇相機 」
我:「有呀.」
若凝:「搵日我地一齊出嚟影咪得囉 」
若凝咁樣係咪代表想約我
呢一刻好緊張,
好彩我同佢只係喺網上傾計,
佢見唔到我反應,
如果係現實就死
我個表情同埋反應實出賣我,
之後我地再傾多左一陣無聊野就offline
講起上嚟,
若凝有一樣野好,
就係唔會打5p字
睇起上嚟好舒服,
一定唔會俾連登仔插
我知你地會話,
唔打5p字係常識啦
唔使特登讚下話,
但係鍾意一個人,
就會將佢所有野無限放大架啦.