《病港》: 126

「有時候信念越係動搖‧‧‧我哋越要堅信。」少佐沉穩地說下去：「我哋唔單止要擊退有敵意嘅入侵者，最重要嘅係要擊退病者──我哋要團結一致。」


雖然夜風漸大‧‧‧‧‧‧


但不知不覺間，大本營廣場聽著演講的眾人，大家手牽手起來。


彷彿一種集體共鳴的舉動，一種滿懷強烈希望的舉動。







隔了晚，大本營亦派了學生、人員進入到不良人據點中，除了搜括可用的物資之外，更要把屍體火化。


「估唔到我哋真係贏咗不良人‧‧‧‧‧‧」一位女子搜索隊成員說。


「總係好似‧‧‧好容易搞掂咁，我只係知個場演講入面，少佐冇同我哋講出戰鬥發生嘅情況。」克里絲娜的隊目，江子千橫視住周邊的屍體：「聽講個陣好多人都吸咗煙霧彈氣體而暈低‧‧‧‧‧‧」






「報告隊長‧‧‧」剛才去在小學周圍調查的瑜小六，說：「啱啱已經確認發現咗不良人首領嘅屍體‧‧‧‧‧‧不過佢咃嘅副手‧‧‧即係整傷大舊老師嘅人，就下落不明。」


江子千深思地點點頭，說：「之後去叫一、兩隊人，去搵斧頭破開糧庫嘅門。」


「呯！呯！呯！呯！呯──砰！」誘人的糧庫，那道沉重的鎖終究被砍開。






搜索隊的各位進去之後，皆露出了不可疊信的表情‧‧‧‧‧‧


「冇‧‧‧冇可能‧‧‧講笑咩‧‧‧‧‧‧？」、「呢到點會有咁多糧食‧‧‧」、「到底不良人一直以嚟收集咗幾多物資先可以將啲食物搭到金字塔咁！？」


不良人遺留下來的糧倉，不禁令眾人驚嘆。


同一晚，在那個又是學堂又是孤兒所的地方，聽著演說的阿寶問身旁的阿玲姑娘：


「玲玲姑娘‧‧‧」阿寶欲言又止：「到底‧‧‧‧‧‧M佢會唔會返嚟？」






「唔？」原本上完幾堂，正打算休息的阿玲笑住反問：「‧‧‧M？」


「就係‧‧‧之前戴鳥嘴面具嗰一個。」阿寶說下去：「佢好似加入咗人哋‧‧‧咁我哋呢家贏咗‧‧‧‧‧‧會唔會再見返佢‧‧‧？」


「吓‧‧‧？」阿玲有點愕然。


「冇‧‧‧冇嘢啦。」阿寶轉身就跑走了。


阿玲望住阿寶的背影，然後若有所思的望住夜空。






至於我，在那一朝把Dr.D對付完之後，便帶住白魂和艾匡離開不良人據點。因為這裡已經沒有我們的容身之所了，接下來要做的便是把艾匡公主送回寶琳倖存區中。


「嗄‧‧‧嗄‧‧‧嗄‧‧‧‧‧‧」背住艾匡公主而行的白魂，跟住我身後：「鳥嘴兄‧‧‧你計劃成功咗。」


「Dr.D嘅出現‧‧‧係我預料不及嘅變數‧‧‧」難忍傷心痛楚的我，說話只能小聲小聲的，走路也只能小步小步。


「之後落嚟我哋去邊？大本營已經成為咗將軍澳唯一嘅倖存區‧‧‧‧‧‧」


「‧‧‧送佢返寶琳。」我望住其背上的艾匡。






「去個到‧‧‧‧‧‧係要經過「死亡之路」。」白魂凝重地說。


「我見過‧‧‧只係稍為行咗一段路‧‧‧已經有一堆病者出嚟阻礙‧‧‧‧‧‧」


「你要唔要休息下先？」白魂打量著我。


「我哋冇時間休息‧‧‧」


「真係辛苦你～大策略家。」






在我們經過將軍澳城市公園外的那條馬路時，已經有陣腐腥極重的氣味在空氣中徘徊，令白魂和艾匡都緊皺著眉頭。


「呢到搞咩嚟‧‧‧‧‧‧」白魂望住血肉橫飛的場景。


是Dr.D被炸得稀巴爛的模樣，一灘又一灘的臭血濺在四周圍。


「佢死前變身第二形態‧‧‧‧‧‧」我說下去：「好快‧‧‧‧‧‧會有病者‧‧‧嚟清理‧‧‧」


「個隻矮矮地、鬼鬼鼠鼠嘅‧‧‧‧‧‧」


「嗯‧‧‧」


「確認真係死咗？」白魂經過時，望住鞋子沾住的血印。


「佢兩種形態都已經俾我哋徹底炸死‧‧‧‧‧‧如果佢咁都死唔去，人類輸，都輸得甘心命底。」


要是真有生命力這般倔強的病者，根本沒我們人類生存的餘地。


「你哋會帶我返去‧‧‧？」一直沉默不語的艾匡，終於出聲。


「啊‧‧‧？係啊，講得出就做得到。」白魂又淺笑，說：「琴晚啲慘叫聲有冇嚇親你啊公主？見你一直唔出聲，應該都係嚇親啦？」


「‧‧‧」


「佢仲細‧‧‧」領在前頭的我，說。


「哈哈哈～仲有一日要習慣嫁啦，血光劍影嘅畫面。」白魂說。


不久，我們已經到達通往寶琳的行人隧道，通過之後便是第二個世界了。


總算‧‧‧


能跟將軍澳的一切，說聲再會吧。


停住在行人隧道前的我們，先制定一下前去寶琳路線。


事前萬全的準備，是不可或缺的一部份，


這是我行動最基本要做到的要求。


「艾匡‧‧‧你哋倖存區最外圍嘅防守戒線喺邊‧‧‧」我問。


未步出行人隧道之前，已經一堆病者的笑聲在附近傳來。


即便是經歷過Dr.D這種超級全能型病者，但其令人陰寒的程度總是不及這種普普通通的病者們。


「新都城中心一期商場‧‧‧至到寶琳村一帶範圍，都係倖存區嚟‧‧‧」艾匡答。


我閉雙上眼，立即制擬路線：「咁我哋‧‧‧應該，咳‧‧‧會先行過眼前呢個巴士廠，之後經過將軍澳圖書館同泳池，最後過埋張沛松中學就到‧‧‧‧‧‧？」


對於土生土長的我來說，已經有幅地圖在我腦海中了。


「唔好講到咁複雜‧‧‧！總之我會跟住你！」白魂說。


「出去之後‧‧‧行動要迅速。」我提醒白魂。


「咁嘅話，不如由你背住公主！」白魂提議：「至少我手上有把刀可以斬下人先。」


「‧‧‧都得。」


他把公主給我背住後，就由我領路穿越這條「死亡之路」。


不知是否惡運的預兆，我們一步出行人隧道不久天上就傳來烏鴉的叫聲，在我們頭頂上掠過盤旋，彷彿等待著我們死後可以進食我們的腐肉。


「感覺上‧‧‧‧‧‧」白魂雙手緊握住刀，眼觀八方：「周圍都散發住危險嘅氣息。」


我們經過巴士廠一旁的直路，原本需要轉角而行，順住路面的設計經過將軍澳游泳池及圖書館，但是我看也不用想了。


去到那裡之前要經過一座極高的橋底，而橋底下的‧‧‧‧‧‧是為數六隻左右的舞者。


它們正擺住芭蕾舞腳尖踮地的高雅姿勢，呆若木雞的站著、一動不動，十分詭異。


「喂‧‧‧喂喂，我哋應唔應該行過去‧‧‧‧‧‧」白魂看望著橋下詭異的舞者，正猶豫著。


「換路吧‧‧‧佢哋一腳就可以踢到你斷骨。」我看，現在只能正行。


我印象中，如果選擇直行前進的話便會經過面積極大的寶康公園，然後才到運亨路，最後到艾匡口中的寶琳倖存區邊界。


「向前‧‧‧應該係我哋唯一選擇。」我繼續背住艾匡，領路前行。


「話說‧‧‧‧‧‧鳥嘴兄，你依家有冇武器喺手？」白魂問。


「暫時有把‧‧‧‧‧‧冇子彈嘅左輪手木槍‧‧‧」最後一發，都貢獻在對付Dr.D的身上。


「都嚇到下人類嘅‧‧‧」白魂點點頭，說：「病者就交俾我。」


我們向前行不到幾步，便到了寶康公園的入口，其實照道理我們不應進入公園，直接從外圍的行人路前進，可是那邊的馬路至到行人路都被很多荒廢而久的車輛阻礙住，根本無法前行。


「睇嚟只可以入去公園？」白魂望住前方百車堵塞的景象。


若果以前我在公園聽到小孩的歡笑聲，我會覺得平平無奇。


假若現在我公園聽到小孩的笑聲，我會雞皮疙瘩。


「艾匡小妹，你呢種應該係去公園玩嘅年紀？」身後的白魂問。


「應該唔係‧‧‧‧‧‧」我無聊搭句嘴，說：「呢個年代已經冇細路去公園。」



「啾──啾──」公園右面不遠處的鞦韆，正明顯地擺動著。


我和白魂都立馬注意到聲音的方向，其往那邊望去。


「風太大‧‧‧？」白魂望住那沒人坐下卻徐徐搖著的鞦韆。


「風太大就應該吹埋隔離個鞦韆‧‧‧‧‧‧」我盯住旁邊那一動不動的鞦韆，說：「睇嚟都係個不祥之地‧‧‧快啲走。」


「喔‧‧‧好！」白魂警戒起來。


公園裡，供小孩玩樂的遊樂設施上，都有著不少被油筆記錄著的字句。當中有著令人發笑的、有著令人心寒的、令人疑惑的‧‧‧‧‧‧


「鳥嘴兄～你以前細個嗰陣有冇做過呢啲嘢？」白魂邊行邊笑道。


「呢啲嘢？」我不明。


「用筆喺公園啲滑梯啊、牆啊個到寫啲字記錄‧‧‧‧‧‧乜乜到此一遊之類。」白魂說。


「我細個唔去公園玩。」


「哈哈哈哈哈，咁你咪好無聊？」白魂大笑起來。


「噓‧‧‧」我制止住他的笑聲：「前面有啲動靜‧‧‧‧‧‧」


「‧‧‧唔？」白魂眉目緊鎖起來。


「埋伏睇下咩事‧‧‧」我們靠在一邊的草叢。


「應該喺附近？根據個條友所講嘅情報‧‧‧‧‧‧」一行三人，正在我們前方相議著什麼。


他們兩男一女，一身出外探索的裝扮加上個背包。


似乎是不知哪來的倖存者‧‧‧‧‧‧


「啊‧‧‧」男的橫顧四周，點點頭：「秘密就喺附近‧‧‧‧‧‧」


「等等！個到好似有人‧‧‧！」那個女的，盯住我們躲藏的那邊。


「鳥嘴兄‧‧‧我哋好似俾人揭穿咗‧‧‧」白魂低聲說。


「嗯‧‧‧出去吧，佢對耳太靈敏。」背住艾匡的我步出。


「你哋係咩人‧‧‧‧‧‧」他們三人馬上取出了武器，與我們對峙：「佢係‧‧‧‧‧‧艾匡公主！？」


他認識我背上的艾匡？


「你哋識得佢？咁就太好～」握住武士刀的白魂，徐徐地走出：「我哋係嚟送佢返去。」


「你哋係寶琳倖存區嘅人‧‧‧？」我望住他們三人。


「係‧‧‧‧‧‧咁你哋又係邊個，你哋係病者平權組織嘅人！？」女的問。


「唔係‧‧‧！點可能係個班傻佬！」白魂說。


「幫手講句‧‧‧‧‧‧」我拉拉艾匡的手。


「佢哋係救咗我嘅人。」艾匡開腔道。


「公‧‧‧公主！？佢哋‧‧‧‧‧‧？」對方表情十分意想不到。


「睇嚟打從一開始佢哋已經認定我哋係壞人啊。」白魂搖頭、嘆氣：「肯定係鳥嘴兄你嘅裝扮太恐怖、我份人又太粗獷。」


接著，他們三人又交頭接耳地說了些什麼，又向我們說。


「你哋係外地人？」


「嗯～！識做嘅，返到去就帶埋啲酒水同肉迎接我哋～話哂我哋都安安全全帶住你哋嘅公主返嚟啊！」白魂爽直地道。


「白魂‧‧‧」糟糕，這傢伙那麼快跟別人坦白了。


「咁就好，請將佢交俾我哋！」那女的誠懇地走上前，說：「我哋都被皇室所託，搵咗公主好耐。」


「交‧‧‧俾你哋？」我問。


「嗯！勞煩你‧‧‧」她點頭。


「先講出你哋個名，睇下艾匡認唔認得你哋。」我說。


「艾匡公主唔識得哋係正常‧‧‧‧‧‧我哋係國王派出嚟搜索公主下落嘅人。」她又說。


「係咁嘅話，我哋一齊返去就得。」我答。


「嘛‧‧‧」那男的，突然用手上的菜刀指向我們：「係你哋想對公主不懷好意先啱啊？」


「‧‧‧」


「我睇你哋兩個根本就係壞人‧‧‧‧‧‧」


「你哋三個居然打橫嚟講‧‧‧‧‧‧」白魂咬牙切齒地說。


「睇嚟你哋唔放開公主‧‧‧我哋只可以盡寶琳共和國倖存區嘅公民責任，保護皇室人員！」他大喝一聲，便把我和白魂圍住。


「你哋‧‧‧做咩啊‧‧‧」什麼都無法看見的艾匡不安地問。


「冇嘢‧‧‧只係有啲匪徒，似乎想利用你獲取一啲利益。」我說。


「鳥嘴兄‧‧‧！準備大戰一場未！！」白魂戰意滿滿。


「全部同我跪低。」我從袍裡取出左輪手槍。


「‧‧‧槍！！？」他們三人驚呆。


「係‧‧‧全部跪，立即。」我用左輪手槍指向他們。


「哈‧‧‧哈哈哈，想靠嚇啊！好人好姐點會有槍啊！」女的在大笑，但混雜著一點驚慌表情。


「你試下就清楚。」我指向了那女的，說：「我冇把真槍，點搶到艾匡公主返嚟‧‧‧‧‧‧？」


「‧‧‧‧‧‧」


下一幕，便是他們三人跪在公園前面向我，白魂則在他們背後持刀，他們稍為一有動作便會往後頸砍下去。


「真係麻煩‧‧‧‧‧‧原本諗住只係快啲去到就算。」我望住眼前跪著的三人。


「你哋係咩人啊！」白魂在他們背後大喝。


「我‧‧‧我哋‧‧‧只係，投機份子‧‧‧」良久，其中一個男人答。


「投機份子？」


「我哋三個係探險隊嘅人‧‧‧早排喺倖存區入面一間小酒館，同一個男人無聊傾起計，佢話寶康公園‧‧‧‧‧‧收藏住一個種大嘅秘密。」男的很快便從實招來，但我無驗證他的說話是真是假。


「唔理你哋係咩人，跪到我哋離開附近先好企起身。」我說。


「明‧‧‧明白‧‧‧‧‧‧！」


冷不防‧‧‧


一股不明的凶湧之聲，瘋狂地襲到我們的耳邊。


「咩聲‧‧‧‧‧‧！？」那兩男一女驚訝地問。


「白魂‧‧‧聽唔聽到‧‧‧‧‧‧」我望向他，問。


「聽到，好似幾百隻大笨象同時間踏地咁‧‧‧好嘈‧‧‧好嘈‧‧‧‧‧‧！」白魂開始苦惱地按住耳朵。


「啊‧‧‧！！」跪在地上的兩男一女，都可以痛苦地叫著。


那感覺，酷如數千萬隻蜜蜂往我耳朵靠近拍翼，發出「嗡嗡‧‧‧」不絕的聲音‧‧‧‧‧‧


「啊‧‧‧」艾匡也開始感到痛苦。


「呢到‧‧‧到底發生咩事‧‧‧‧‧‧」


雙耳也開始痛苦不已的我轉身橫望，發現一個小男孩的身影，他正躲在滑梯旁只亮出半個身子偷望著我們。


直覺告訴我，他是不祥的傢伙。


所以我馬上舉槍恐嚇，料不知‧‧‧‧‧‧他居然躲起來。


但聲音，也漸漸地從耳中消退‧‧‧‧‧‧


「上次將軍澳商場嗰一個‧‧‧‧‧‧」我立即回想起，那天原來不是眼花。


經過我的恐嚇後，小男孩令人耳鳴的聲音亦漸漸下降‧‧‧‧‧‧


「走‧‧‧」我叫住白魂，離開這個危險的公園。


「‧‧‧好！」白魂含辛茹苦地說。


到底，它是用什麼方法令我們雙耳出現令我們痛不堪言的聲音‧‧‧‧‧‧毫無疑問，那個小男孩是病者。


我望望身後的白魂，順眼看見那兩男一女的倖存者都露出了惡形惡相，盯住我們背後。


「白魂‧‧‧小心‧‧‧！」我向他喊道。


白魂好像意會到危險一般，馬上轉身揮斬了一刀：「唔好以為我聽唔到你哋腳步聲‧‧‧‧‧‧！」


「嗖──」首當其衝的是持菜刀的男子，他腰部至前肩被白斬輕斬了一刀。


「啊‧‧‧」他愕然了。

白魂順勢斬其下膝，使他單腳半跪，再一腳把他踢走！


經過他這麼一擊，後面的一男一女也不禁靠近我們了，只得留下愕然的神色，然後觀望同伴的傷勢。


「果然去到出面‧‧‧‧‧‧乜人都信唔過。」白魂咬牙道。


「下次再遇到同樣情況‧‧‧你等我出聲先。」我說。

要是遇上偽裝得更有耐性和技術的惡意倖存者，白魂在他們面前肯定輸得徹底。


「啱啱個啲‧‧‧係咩聲嚟‧‧‧」艾匡公主似乎都吃了不少苦頭：「我個腦同隻耳都好痛‧‧‧‧‧‧」


「應該都係病者嘅一種，剛才我用槍指佢‧‧‧佢識得回避。」我繼續說自己的結論：「證明佢都係一個‧‧‧‧‧‧有智慧嘅病者。」


「咁都俾你觀察得到‧‧‧‧‧‧」白魂深佩地點頭。


「前面就係公園出口。」我望住公園出口，剎時左、右兩邊各跑出了一隻舌女！


「吱‧‧‧啵嘻嘻嘻‧‧‧‧‧‧」身為大舌頭的它們，都笑得嘴裂了。


「就知道冇咁簡單出到去‧‧‧‧‧‧」白魂走上我們前頭，說：「你兩個搵第二條路走。」


「咁你！？」


「對付呢兩隻小狗‧‧‧‧‧‧」白魂毫無懼色地說：「我都仲可以。」


見白魂說得認真，我便背住艾匡往公園別的小徑離開。


舌女們也沒有久等，迫不及待就要上前迎接眼前的鮮肉。


白魂深知對付舌女只有一點要留意，便是它們嘔心長菌的大舌頭，只要不小心被舔中人生就徹底地完結。


所以，他看準了舌女會飛奔向人的特性，頭一隻衝他而來的舌女，他毫不猶豫地往它濕淋淋的舌頭直直刺去！


「嗖──」第一隻舌女馬上反了白眼，在地上痛苦打滾。


「咕咕嘻‧‧‧」第二隻比較聰明，先伸出一雙瘦長的手捉住白魂雙腳並把他拉倒，繼而四肢發力從地上跳起撲向白魂！


「啊‧‧‧！」白魂滾地避開。


他舉起了自己的刀，對準了那隻舌女的頭部猛砍亂刺！！！！速度快得驚人‧‧‧‧‧‧




「好似你咁嘅小狗！！我喺亂世初期都已經遇到多不勝數！！！！！！」白魂對它怒喊著。


我回頭望了望白魂，他轉眼間已把兩隻舌女砍得半死‧‧‧‧‧‧


病者固然可怕。


但是‧‧‧也不能少看在亂世初期中，不需依靠倖存區，能獨自在外頭活著的人物。


在我看來，白魂就是腦子少了條筋的不破尚。


實力都是無可質疑。


「白魂‧‧‧」我叫住它。


「啊，鳥嘴兄，你行得咁慢嘅！我呢家嚟。」說畢，白魂便奔我們而來。


是你殺得太快了吧。


就在他快要來到之際，暗角忽地出現一隻舞者，腳尖以蜻蜓點水的方式急速靠近白魂。及時發現的他，馬上就要砍向它了，可是被砍的舞者卻沒有任何退縮或反應‧‧‧‧‧‧


「砰！」


並且，舞者一腳將白魂踢飛到五米之遠。