「無啦啦多左幾個家姐同細妹 Season 2」: 籠中鳥
日子一日一日咁過，但二家姐，應該話屋企既人都無乜再講起基金既事。大家都係度為各自既事忙緊。
我最近甚至好少見到佢，聽大家姐講佢已經開始去Uncle公司返工，専門負責處理基金既事。
明明大學都未畢業，咁快就開始去返工…？真係chur…
而我地幾個亦終於考完哂試，可以叫做鬆一口氣。
Ellen：「啊~~終於考哂啦~~~點解呢度D野可以難過聖所羅王咁多架~~~」
Ellie：「家姐呀，我地而家讀緊Form 5呀，D野梗係會難過Form 4個陣架啦，更何況你呢排淨係掛住玩都無溫書，梗係覺得難啦。」
我：「係囉呢排都見到你係度玩電話，玩緊乜Game？」
Ellen：「好煩呀Ellie，咁長氣成個管家婆咁，你再咁煩既話阿明會嫌棄你架。」
「答返阿明你先，我呢排玩緊Puzzle & Dragon呀，係最近學生會D人推介我玩架，原來咁好玩！」
我：「喂我…」
Ellie：「阿明先唔會嫌我煩囉，阿明好樂意聽我講。係咪呀阿明？」
我：「梗係啦，又點會嫌你地煩啫，算啦都考完啦唔好再講啦。」
Anna：「你個傻仔係咪考得唔好所以唔想再講呀？」
我：「邊係，我今次落足心機溫書，科科都掂呀今次。」
Sarah：「係喎，講起溫書，咁阿明你溫書個陣有無諗起基金既事？」
我：「呃…其實都有既哈哈，尤其係屋企撞到二家姐個陣。」
其他人聽到我地突然提起二家姐同基金都愕咗然，無諗過話題會轉得咁快，就連我自己都無諗過。
我：「你地唔洗咁既樣喎，又唔係咩禁語或者，敏感字詞，隨時都可以講。」
Anna：「二家姐佢…始終都無再講D乜？」
我：「嗯，無，而家連見佢都好少見，佢好似長期係公司。」
Ellen：「咁樣唔緊要咩阿明…？」
我：「唉我都唔知呀，都唔知應該點做好，都唔知二家姐真正係想做乜。」
Ellie：「應該都係為咗阿明你啦。」
我：「我？點解係我？」
Ellie：「其實阿明你應該都心中有數先係架，講話係保障我地，但點解係用你名義？」
「其實二家姐係想保護你呀，你感覺唔到咩。」
保護我…？
我：「點會呢，二家姐咁唔鐘意我，又點會想保護我呢。一定唔會係咁。」
Ellie：「呢D都係你一廂情願啫，你又知二家姐真係咁諗？你唔比佢係你面前專登扮野？」
「而家考完試大把時間啦，諗辦法去搞清楚件事啦，如果唔係你肯定會心煩意亂到死。」
我：「咁…」
Anna：「去搵晨哥啦。」
我：「吓？關晨哥咩事？」
Anna：「聽你咁講，你應該無辦法係二家姐個邊知道D乜架啦，我又諗起你之前話過咩晨哥講話二家姐應該會好憎佢，所以我估佢可能會知道D乜？」
係喎！！
我：「Anna你咁醒既！！我完全唔記得咗仲有呢條線索添！！
」我忍唔住激動，衝埋去攬住佢，嚇到旁邊既Sarah佢地嘩一聲叫咗出黎，不過Anna就無特別大反應。
Anna：「洗乜講，本小姐不嬲都咁聰明架啦。
」之後我就搵晨哥，佢叫我聽日去網吧搵佢。
由於網吧個頭有D雜，我決定唔帶Sarah佢地去，自己一個去。
到第日去到間網吧，無乜人，好快就搵到晨哥，佢坐係一角。
我走到埋去，見到佢玩緊LOL，仲打得相當激烈。
亦因為咁，我唔敢騷擾佢，坐係佢旁邊睇住佢打就算。
晨：「唷，黎咗嗱籠中鳥？搵我咩事，有野想我幫手？」
籠中鳥…？我：「你話…」
晨：「係呀，籠中鳥，話緊你，等多我一陣呀。」
佢講完之後就直接quit咗場game，望住我。
晨：「有何貴幹呢，今次想我點幫你？」
我：「咪住先，你頭先話我係籠中鳥？點解咁講？」
晨：「唔？有話錯你咩，我以為你自己都意識到添。算啦都去到呢個地步，全部話哂俾你知都無所謂啦。」
「老實講我對你真係有D失望啊阿明，我以為你會可以變得更好，點知經過咗咁多事，你都仲係停留係原地，無進步過。」
「呃…諗落又唔係完全無進步既，你會對個D金錢世界既鬥爭有所忌諱，會想避開呢D野，但除咗咁之外就無啦。」
「你記唔記得我叫過你唔好太否定自己，就係因為你成日覺得自己以前做過既野係唔岩，所以你就好極力避免再接觸呢D野，變相係逃避，但只係識逃避，又點可以成長到。」
「正因為你只係識逃避，每次有無法避免既事出現既時候，你都會想去靠人地幫忙，例如搵我，因為你會覺得自己下既決定會係錯。」
「所以，問題既根本可以話係你對過去自己既否定。」
「唔…雖然你身邊既人都有份造成你咁既，佢地太過鐘意你，保護你，你不斷逃避佢地都唔介意，尤其係你二家姐，佢真係過份保護你。」
「我會叫你做籠中鳥，都係因為佢。」
聽咗晨哥講咁多野，突然聽到佢提起二家姐令我為之一振，晨哥見到我有咁既反應即刻黑一黑面。
晨：「你地兩個真係…可唔可以用一個願打一個願捱去形容你地既關係呢？有時真係睇到我火都黎。」
我：「你咁講…唔通之前你話二家姐應該會好憎你既原因係…」
晨：「繼續講落去吖，唔好下下靠我俾答案你。」
屌…我怕講錯會比你鬧吖嘛。
我：「佢會好憎你係因為佢想我繼續咁樣落去，但你就係度叫我要成長？」
晨：「差唔多啦，佢希望你可以永遠都唔洗再接觸到個D令人作嘔既金錢權鬥，想你永遠都好似而家咁同幾個女仔一齊過。而我就覺得你總有一日要面對，所以叫你調節好自己既心態。但咁就同佢既意思背道而馳，佢肯定會好憎我。」
「簡單D黎講，佢想你永遠係細路咁，而我就想你可以做大人。慈善基金既事亦係因為咁。」
我：「你意思係二家姐用慈善基金既目的係想我唔洗面對D權鬥？但咁唔係岩岩相反咩？用我既名去做咁多野，唔係反而會更惹人妒忌，引起更多事咩？」
晨：「好多人會憎李嘉誠，但只有好少好少人夠膽去搞佢，可能一百萬人入面只有一個敢，你明唔明我既意思？」
我：「二家姐係想等其他人驚咗我，令佢地唔敢搞我？咁樣有可能咩？」
晨：「有無可能我唔知，但佢就係咁樣做緊。慈善基金既目的就係想做起你自己個名。」
「不過我諗佢自己意識唔到佢咁做其實係扼殺緊你既成長同可能性啦。」
「佢以為自己係一幅牆保護住你，但事實上佢係一個籠，困住你令你無辦法飛。」
「講咗咁多，你而家有無咩諗法？」
我想去搵二家姐。
我：「我…」
晨：「非常好既表情，去喇，去話俾佢知你唔想做一隻籠中鳥啦。」
我：「我咩都冇講喎…」
晨：「唔洗講，齋睇你個樣都已經知道你下定決心啦。今次真係要進步啦，唔好再一成不變啦。」
我：「我會努力架啦。」
晨：「好，走喇咁，唔好再係度哂時間。」
我之後就離開網吧，直接返屋企。
今次一定要講清楚件事！