「無啦啦多左幾個家姐同細妹 Season 2」: 大笨蛋
點解我會注意唔到…？明明次次都係佢出手幫我，點解我會唔知二家姐既用意，會比佢既說話呃到…
次次佢都用係為咗Sarah做理由，其實稍為諗一諗都知道唔對路啦，點解我仲會信…
好似Ellie講既咁，我總係先入為主以為二家姐好唔鐘意我，好容易就俾佢講既野呃到。
我明明已經咁大個人，點解仲可以咁on9架…
如果二家姐只係為咗Sarah同屋企既話，佢大可以用辦法將我踢走咪得囉，邊洗咁勞心勞力…佢做咁多野其實係為咗邊個根本就好清楚…
呢幾句野係我返屋企既途中不停係腦內響起，好似大悲咒咁。
我呢排到底咩事…好似仲衰過以前咁既…又唔陪Sarah佢地，又唔好好了解身邊發生緊咩事，真係好似晨哥講既咁係度原地踏步。
我仲諗咁多野想話等自己第時可以有能力去保護Sarah佢地，等佢唔洗次次都擔心我，點知原來被保護既係我自己。
二家姐點解要為我做咁多野？仲要唔比我知，甚至要講大話？
直至我行入屋企大門口，我都無辦法為呢個問題諗出一個確實既答案。
雖然心入面係有一個答案，但我自己無法相信呢個可能性。
一切都要見到佢問清楚先知道。今次一定唔可以再進縮。
Sarah：「阿明你返黎嗱？點呀晨哥有無講到D乜有用既野？」
我：「有啊，仲講咗好多，多到我懷疑自己呢一年既人生。」
Yui：「懷疑自己呢一年既人生…？佢到底同你講咗D乜？」
我：「其實都唔係D特別野，佢只係講出咗我睇唔到，忽視咗既野啫。」
「而家諗返，我真係覺得好對唔住你地，我以為自己會係保護人個個，但事實上一直以來都係你地幾個保護住我。」
「其實我應該一早意識到？但我就習慣咗係呢份安逸之下，諗住完咗件事就可以繼續好似平時咁過日子就算，於是就無進步。」
「因為有你地同二家姐庇護住我，每次我反省得出黎既教訓，轉個頭就唔記得哂。」
「如果今次我仲係咁，你地可唔可以話我？」
我咁講完之後，佢地兩個都呆咗咁望住我，好似仲未聽到我講咗乜。
我都無等落去，只係行前多一步，攬咗佢地兩個一下，講多句多謝之後就行咗上去二家姐房。
唔知點解，頭先對住佢地兩個好想喊，我真係個死蠢，居然想係自己女朋友面前無緣無故喊，會嚇親佢地架嘛。
我走到去二家姐房門口，敲咗兩下門，想睇下佢會唔會咁岩係度。
咁岩得咁橋，佢又真係係度，仲叫我入去，於是我慢慢推開門行入去，見到佢坐係櫈上面，望住我。
二家姐：「又係你呀，今次又想點，要講既之前都…」
我：「我真係好蠢好白癡，居然咁都睇唔出二家姐你做咁多野係為咗我。」
二家姐：「吓？你講乜呀？你話我係為咗你？」
我：「其實我應該更早就發現到先係，應該係知道有慈善基金個陣就諗到，唔係，應該係再早D之前就要發現到先係。」
二家姐：「喂你係咪飲醉咗？定係食錯藥？講D野咁奇怪既？我之前咪同你講過我係為咗…」
我：「Sarah吖嘛。」
我突然插嘴，令到二家姐嚇一嚇，即刻無再講落去，我就把握呢個機會，繼續講。
我：「我一直都以為真係咁，以為你做咁多野全部都只係為咗Sarah，直至Ellie同晨哥點醒咗我。」
「慈善基金其實係用黎為我製造聲望，幫我鋪路，等第時無人敢再好似Marcus咁搞我地，我有無講錯？點解要哂咁多心機做咁多野？」
我講完一輪之後二家姐無即刻應我，而係眼甘甘望住我。
頭先唔知係邊度黎既勇氣，係佢呢雙眼面前都突然無哂。
我：「eh…我語氣可能重咗D，其實我…」
二家姐：「一切都係想Sarah開開心心咁過日子，我一開始的確係咁諗。」
今次到佢打斷我，大家一人一次當無數啦。
二家姐：「我同自己講過，為咗Sarah可以開心，幸福，我辛苦D都無所謂，呢D係我呢個身為家姐應該做既野。」
「你成功救咗Sarah出黎，仲令佢變得好開心，呢D正係我想睇到既野。」
「不過之後你好野吖，惹咗咁多禍，搞到Sarah咁唔開心，擔心你，我咪唯有出手。」
「一次又一次，慢慢就變成咁，我好自然就選擇咗幫你。為咗屋企，為咗Sarah而幫你。」
「你地年紀仲細，唔應該接觸太多呢D金錢權鬥既野，我黎面對就可以。我愛既細佬妺，由我黎保護。」
「所以，的確可以算係為咗你既，只係唔想你無咗危機感所以先唔老實話你知。」
佢話…愛我？我有無聽錯？唔通我估既真係…
二家姐：「當然唔係Sarah佢地個種愛啦，你唔洗咁既反應既，你有五個女朋友仲唔夠，仲想玩埋小朋友幹大姐姐？太貪心啦掛？」
俾二家姐咁講一講，我真係紅都面哂，唔知點俾反應好。
啊係，要講返個件事。
我：「但係二家姐其實我都唔細，唔應該受到咁樣既過分保護…我知道你原意係好，不過…」
二家姐：「但如果我唔咁做，你日後既路可能會好難行架喎，你曾經係七星，又正面同過三個七星衝突，以後肯定仲會有好多人視你為眼中釘，隨時有可能再有人出招你會點算？」
我：「我會同佢地一齊面對。」
「雖然咁講好似好不負責任，但我覺得咁總好過活係自己圍內世界，唔去見出面真正既世界。我自己都會慢慢努力，適應呢D挑戰。」
二家姐聽到我咁講之後靜咗一靜，係度望住自己隻手。
「睇黎我都係個蠢材啊…」
二家姐突然自認蠢材，咁奇怪又反常既舉動當然嚇咗我一跳。
二家姐：「或者佢地係講得岩既，我可能真係做錯咗決定都未定。」
「我應該相信你多D？相信你自己可以處理到，而唔係好似D怪獸家長咁咩都同你決定哂所有野，要你跟住我安排既路。」
二家姐做乜突然間咁感觸既，我地又唔係討論緊咩感動野…而且佢講既「佢地」係邊個啊…
二家姐：「一心只係想你地好，無諗過咁反而會害咗你添，世事真係諷刺。」
完全唔似二家姐會講既野喎…
我：「咁又唔洗用到害咗咁嚴重既，我而家又無咩事，唔算害我既，唔好咁講啦。我只係想叫二家姐你唔洗再咁費心機為我做咁多野啫，唔係要話你D乜。」
「Sarah佢地成日見你唔係屋企，其實好擔心你架。」
「雖然由我呢個細佬講好似會好奇怪咁，但二家姐你大學好似都仲未畢業架可？書都未讀完就咁快掂呢D野好似唔係咁好…不如都係讀完個書先啦…」
二家姐好認真咁聽我9up完一輪之後忽然大笑，好似笑緊我最後講個句野咁。
二家姐：「估唔到我都會有比你話只係掛住金錢權鬥野既一日，睇黎我呢排真係有D離譜。」
「學校個邊你就同我定，我已經申請咗畢業，只係無同你地講啫，我份人好識分輕重，梗係讀好咗書先架啦。」
嘩原來二家姐唔聲唔聲已經可以畢業？咁勁既？
我：「咁幾時係畢業禮？我地係咪要去？」
二家姐：「死蠢，我都已經唔同你地講我申請咗畢業，仲點會要你地去畢業典禮？用下腦好無？」
我：「吓點解呀？大學畢業唔係好開心既事黎架咩？我見D人都會叫哂全家人一齊去瘋狂影相，點解你唔要我地去？」
二家姐：「因為唔想比佢咁開心，又可以有野比佢同人威啫，好似個陣既你咁，佢成日周圍同人炫耀自己個仔係七星，真係令人反胃。」
講到咁，唔洗問都知道二家姐講既人係Uncle喇…
我：「咁就算唔…」
二家姐：「唔好講我個邊住啦，都唔重要，講咗咁耐，咁而家個慈善基金你想我點處理？你都應該唔想我再用佢架啦？」
我：「eh…呢個問題我又無諗過喎…如果唔再搞個基金，會唔會蝕好多錢？」
二家姐：「蝕又唔會點蝕既，D錢都已經俾哂出去，係可能之後既後續合作計劃會miss咗啫。」
我：「咁呀…不如將個基金改名就算？改其他更有意義既名。」
二家姐：「得啦我明白你意思架啦，我會處理，你唔洗煩呢D野。」
「不過之後如果再有好似Marcus個D人找你麻煩既話，我就唔會咁快出手架啦，學佢同阿晨講既咁，要放手俾你自己去面對。」
我：「嗯，我知道啦，無論對手係咩人都好，如果佢想找我麻煩既話，我一定要佢後悔。」
二家姐：「到時唔好又嚇到屁滾尿流叫晨哥我就已經好滿意啦，好啦出返去啦，我想換衫。」
我：「知道，咁我唔阻你啦。」
之後我就離開二家姐間房，嘩出黎同入去個陣直頭係兩個世界，而家好似終於放得舊心頭大石咁。
終於…搞清楚件事喇。
大家姐：「hi阿明~終於傾完喇？」
我：「哦大家姐，係呀傾完喇。」
大家姐：「睇你笑得咁開心，搵到答案啦？」
我：「嗯，原來二家姐係好著緊我呢個細佬。」
大家姐：「哈哈傻豬，唔只佢架，我都好著緊阿明你，我仲好想緊緊抱住你，好似咁！」
大家姐講完就好似平時咁撲上黎抱住我，不過今次唔同既係佢只係抱咗我一下就放手。
大家姐：「我要入去同佢傾D野，你去做自己野啦~」
講完佢就敲咗兩下門，入咗二家姐房。
好，去搵Sarah佢地先！