「無啦啦多左幾個家姐同細妹 Season 2」: 為甚麼
Ellen：「好遲呀你，你知唔知我係度等咗你幾耐？」
我：「對唔住呀，揀衫同塞車搞到黎遲咗。點呀，我套衫唔失禮你掛？」
Ellen：「唔…唔係你自己既衫黎架喎，邊個幫你揀架？二家姐？」
我：「嘩你咁都知道既？」
Ellen：「嘻嘻，你衣櫃有乜靚衫我地都知得一清二楚，咁我呢，你覺得我今日靚唔靚？」
我：「今日見過最靚既人就係你喇，好啦唔好企係門口啦，我地快D入去見你嫲嫲啦。」
Ellen：「嗯！入去咯！」
佢講完就撟住我隻手，兩個人一齊行去宴會廳。
我：「嘩…」
無錯，呢個係我行入宴會廳既第一個反應，因為作為一個壽宴，呢個規模實在太大，就咁睇都過百圍。
Ellen：「你咁surprise為乜呀，更大既Party你都見過啦唔係咩。」
我：「係就係…不過咁大既壽宴我就真係第一次黎…」
Ellen：「洗乜講，我屋企識咁多人，我嫲嫲又咁既好人，咁得人尊敬，有咁既規模算得D乜。」
「話時話，我地第一次見面都係係我個生日Party吖可。」
我：「啊係呀，個陣都好似而家咁大陣仗，你仲要整色整水，搞咩活動，搞到我差D要同個肥婆坐，好彩係搞錯咗，原來我係同…」
Ellie：「同我坐吖嘛。」
Ellie咁岩就係呢個時候出現係我旁邊，一身淡紫色長裙既佢，加上精心set過既髮型，令佢既氣質顯得極為突出，令人睇到十分著迷。
Ellie：「阿明你今日著得好好睇呀。」
我：「嗯多謝，你都係吖，你好靚。」
Ellen：「喂吖一見到Ellie就唔望我，你有無搞錯！」
Ellen即刻用力鏈住我，我差D就嗌咗出聲，好彩忍到，
我：「喂痛架…你係主人家，有咁多人係度就唔好用暴力啦。」
Ellen：「好細力咋喎…算啦，我地快D去搵嫲嫲啦。」
講得岩，去做正經野先。
我一個人拖住呢兩姊妹，全場最靚既姊妹行係會場既中間，一直行去主家席。
唔知係咪因為佢兩個太靚，我發現沿途有好多人望住我地。
哈哈你地恨唔到架啦。
好快，我地就行到去嫲嫲個檯，仲見到Ellen佢地既父母係旁邊傍住。
嫲嫲睇落好精神，同係醫院見佢個陣好大分別。
嫲嫲：「咦阿明你黎咗既？」
嫲嫲一講完，係佢旁邊既人即刻望哂過黎我呢邊，搞到我好尷尬。
我：「係吖…聽到話嫲嫲你今日擺大壽，所以我專程黎恭賀你，祝你身體健康。
」嫲嫲：「哈哈，真係乖，我兩個孫女真係有眼光，揀咗個咁孝順又咁靚仔既男朋友仔。
」Ellie：「嫲嫲吖…
」嫲嫲：「怕咩羞啫Ellie，而家咩年代吖，開心咪得，你地都鐘意佢咪得囉。」
Ellen：「嘻嘻，洗乜講我梗係鐘意阿明喇，嫲嫲我今日靚唔靚吖~~
」嫲嫲：「我孫女幾時都咁靚架喇，快D過黎俾嫲嫲睇真D！
」嫲嫲出到口，原本撟住我實一實既Ellen都馬上走埋去，好似一個BB仔咁係嫲嫲懷內撒嬌。
其實唔洗我都得啦，佢本身都…
「多謝你黎呀，阿明。」
發呆既一瞬間，Ellen爸爸就已經行到我地面前。
我：「Uncle你好，嫲嫲生日我呢D後輩禮貌上都應該要黎恭賀既…
」Uncle：「哈哈，你真係有禮貌，不過如果唔係有你，我諗Ellen今日一定會扭計唔肯黎。」
我：「點會呢，Ellen其實好愛佢嫲嫲，今日咁重要既日子，佢一定會黎既。」
Uncle：「可能係都唔定喇，之但係我都係想多謝你，因為有你，我兩個女先改變咗咁多，關係好返咁多。」
我：「邊係呢…你太誇獎我喇…
」Uncle：「你太謙虛喇，呢D全部都係事實，啊我要過去個邊喇，Ellie你好好陪住阿明喇。
」Ellie：「知道~
」Uncle咁就走咗，係佢走咗之後我望一望一直係身邊既Ellie，佢咩都冇講，只係微笑。
雖然我唔明白呢個笑容既含意，但我都跟住一齊笑。
之後我同Ellie兩個係會場度散步，一邊傾計一邊散步，內容都係圍繞住唔率直既Ellen。
但一個男人，突然出現係我面前，打破咗呢個小小既溫馨場面。
「你好啊陳生，之前既合作計劃咁成功，我都未有時間約你親身食餐飯真係失禮哂，估唔到今日會係度見到你添，點都好喇真係多謝你既基金肯投資落黎我地既計劃，將來肯定會幫到好多人。
」呢個男人…咩人黎架？一黎就講咁多咁難消化既野都有既。
明明第一次見，講乜之前既合作計劃啊，更何況我只不過係個中學生，邊有可能做咩投資呀…
Ellie：「阿明你識得呢位先生？」
我：「唔識啊，Ellie你識架？話哂呢個係你屋企既Party…」
Ellie：「呃…我都係第一次見呢位先生，請問先生你係…」
男人：「哈哈真係唔好意思呀第一次正式見面都唔記得先自我介紹添，真係失禮哂，我叫Ivan，陳生你既基金之前投資咗落我團隊既可再生能源計劃架。」
我：「其實叫我Henry得架喇…唔洗下下叫我陳生既，你大過我架嘛。但係我有無聽錯？你話我既基金？」
Ivan：「係呀煒明慈善基金吖嘛，不過之前一直都係你既代理人May Cho同我接洽，所以你唔係咁清楚細節啫。」
煒明慈善基金？呢個基金唔係只係為咗引出Marcus先假意設立咋咩？點解會真係有架？仲有投資？而且May Cho係…
Ellie：「二家姐…？」
係囉，呢個名係二家姐黎架喎…
Ivan：「唔好意思，我要行開一下，唔阻兩位啦，真係多謝Henry你喇。」
佢再多謝我一次之後就行咗去另外一邊，消失係人海之中。
我：「Ellie…」
Ellie：「唔好咁望住我啊，我都係岩岩先知咋…」
連Ellie都係岩岩先知道呢個基金既事？
我：「會唔會係佢講笑整蠱我地呢可，有乜可能我有個基金會但自己完全唔知呢哈哈哈哈。
」Ellie：「有呢個可能性既，畢竟而家都係得佢一個咁講，我地而家又無其他source可以佐證佢講既野，可信性係可以質疑，只不過…」
「佢有無咁既必要同我地講呢個大話呢…」
係喎，Ellie又分析得好岩，就算呢個Ivan真係圖謀不軌都好，佢都無必要走黎同我地講呢番說話啊…無其他作用架喎。
我：「咁唔通真係二家姐係我地唔知既情況下搞緊…」
愛麗絲：「啊，搵到你啦。」
愛麗絲！？佢都係度既？
無錯，繼Ivan之後，到愛麗絲突然出現係我地面前，著住一身紅色低胸長裙，拎住杯香檳行緊過黎。
愛麗絲：「聽到人係度討論你個基金我就諗你會唔會黎咗，又真係俾我搵到你喎，不過諗落都唔出奇既，陳老太係你女朋友既嫲嫲，你黎都好正常。」
佢係度已經唔再令我覺得驚訝，更驚訝既係，佢同其他人都知道基金既事。
我：「你…知道D乜？
」愛麗絲：「嗯？你指咩野？」
我：「我係話個基金既事，你知道幾多？」
愛麗絲：「吓，都係人地報乜我咪知道D乜囉，我無特別去查你呀。不過話時話，你呢排都幾多搞作下喎，學校個邊無問題？」
我：「多搞作…？」
愛麗絲：「扮咩野吖，年輕有為既大慈善家，最近D人都係咁稱呼你既，你唔好話比我知你無聽過呀？」
「又可再生能源，又醫療研發，掟親錢落去既都係D創新領域既野，你眼光真係獨到，就連李Uncle都讚你。」
我：「唔關我事喎…」
愛麗絲：「嗯？你話咩話？」＂
我：「我係話呢D野全部都唔關我事…我連真係有呢個基金都唔知…」
「個陣時呢個基金係用黎引Marcus出黎咋嘛，邊係真架…」
愛麗絲：「吓但係呢個基金真係存在架喎，嗱唔信你睇下啦，你個基金投資既某幾個項目仲已經有錢賺，你真係唔知？」
我無講野，只係搖搖頭。
愛麗絲：「竟然會係咁…？不過我都覺得奇怪，用你個名，但係又唔見你本人出現，但係又唔似係想搞事wor，賺咁多錢，個名又做到咁好。」
我：「咁你知唔知係邊個搞緊呢個基金？」
愛麗絲：「自己基金既細節居然要問人地，真係有你既作風，等我一陣啦我問下。」
愛麗絲講完句野就拎咗電話出黎㩒，而我就同Ellie對望。
愛麗絲都知道基金既事，仲講到咁多內容，即係證明頭先個Ivan所言非虛，真係有件咁既事。
Ellie：「點解二家姐…要用阿明你個名做咁多野？」
我：「可能唔係二家姐黎呢，可能又係有人想搞事，冒用二家姐個名賺錢啫，二家姐邊得閒搞…」
愛麗絲：「喂，有相睇喇，你係咪真係要睇。」
我：「梗係要睇，快D比我睇！」
我急不及待走埋去愛麗絲旁邊，睇佢電話入面張相。
但當我睇到張相既時候，我成個人即刻呆咗，咩反應都唔識俾。
因為相入面既人，的確係二家姐，仲有一堆西裝友係佢旁邊。
愛麗絲：「或者…你應該要好好同你家姐傾下…我都係唔阻你地喇，我夠鐘要走。」
「如果你有咩要幫手既，隨時聯絡我啦。
」佢講完就拍咗我膊頭一下，之後就轉身離開。
Ellie：「阿明…張相真係二家姐黎既？」
我：「係…唔會有錯…」
「Ellie，點解二家姐會用我個名既基金去投資既…唔通佢想賺錢？
」Ellie：「二家姐點解要咁做我唔清楚，但我諗二家姐一定有佢既理由，你諗下啦，咁耐以來二家姐有無做過D害你既事吖？
」我：「我知二家姐唔會害我…但我只係好奇點解…」
Ellie：「既然好奇，去問下佢咪得囉？」
我：「嗯…今晚完咗之後就…」
Ellie：「唔好等喇，而家就返去啦，反正你都已經同嫲嫲恭賀咗，又帶到家姐黎，而家返去都無問題。
」我：「只不過…唔係咁好既。
」Ellie：「唔緊要啦，就算你個人而家留係度，個心都唔會係度架啦，倒不如快D返去搞清楚件事咪仲好。」
「快D走喇。
」Ellie總係咁聰明，冷靜同埋善解人意，令人又愛又恨。
愛既當然係佢，恨既就係自己成日都無辦法專心好好對佢。
我：「多謝你。
」我錫咗佢一啖，之後就離開咗酒店，全速飛返屋企。
返到尾企，Sarah同Yui都好意外我咁早就返咗黎，但我都無理佢地住，我直接跑咗去二家姐間房。
心急到門都無敲，直接開門行咗入去，但入面黑媽媽，人影都無。
偏偏係呢個時候出咗去…？
二家姐：「喂，隨便走入人地間房你有無禮貌？
」一聽到二家姐把聲係背後傳黎，我就即刻黎個反智轉身，見到佢企係門口，叉住腰咁望住我。
我：「你係咪搞緊之前個煒明慈善基金？」
聽到我提起慈善基金，二家姐好明顯嚇咗一跳，見到佢震咗一下，但佢好快就控制好自己既表情。
二家姐：「係啊你知道咗嗱？今晚個Party既人話你知？」
佢認咗…
我：「呢個慈善基金唔係只係用黎引Marcus出黎咋咩，點解會真係搞咗出黎？點解仲會…」
二家姐：「所有野，都係為咗Sarah同泳琦佢地。」
我講到一半佢就突然用比我更大既聲音打斷我，聲量之大更加嚇咗我一跳。
為咗Sarah佢地？