「無啦啦多左幾個家姐同細妹 Season 2」: 絕不
我地好好咁品嘗完美星姐送既蛋糕之後就埋單走咗，Sarah仲俾多咗五百蚊美星姐，話好多謝美星姐既款待，件蛋糕絕對值五百蚊之類。
離開café既時候，天已經開始染上夕陽既橙黃色，睇到令人入哂神。
我：「好靚…」
Sarah：「係啊…個天真係好靚…」
我：「係咪連個天都想祝福我地，所以先整個咁靚既黃昏比我地睇呢？」
Sarah：「我覺得係個天提醒緊我地夠鐘返屋企多D，7點鐘就要食晚飯，而家開始返去差唔多。」
我：「嘩你岩岩先食完成碟意粉加件蛋糕咋喎…咁快又肚餓嗱？」
Sarah：「喂呀！咁屋企煮飯緊係要準時返去架啦，唔關肚唔肚餓事囉。」
我：「係喇係喇~咁我地返去喇，坐的士喇。」
之後我地就手拖手去坐的士返屋企，的士阿叔手車認真快手，六點九左右就已經返到屋企。
入到屋企，蘭姨佢地先岩岩開始佈置飯檯，我地真係返得黎合時。
大家姐：「返黎嗱？今日咁晏既？」
我：「無，我地放學去咗拍拖咋嘛~所以晏咗少少返黎~」
大家姐：「哦~嗚青春真係好呀，可以著住校服拍拖~~大家姐我已經無咁既機會喇嗚嗚。」
我：「大家姐你都可以架，如果你係想既我可以去買件校服比你架，你咁fit，要買岩你既size應該唔難~」
大家姐：「吖阿明你連大家姐都夠膽玩，等我懲罰你！」
大家姐講完就走埋黎用手cool住我條頸係佢格甩底下，無錯，即係波邊。
係呢個位置下，真係扯扯地，視線真係離唔開係旁邊既山峰。
好彩得Sarah幫我解圍，如果唔係都唔知點算。
大家姐：「好喇好喇唔玩喇，咦話時話點解得你兩個既，Yui呢？佢唔係同你地一齊？」
Sarah：「Yui今日跟咗Ellen去Party Room幫手跟Form 6 last day party呀，Ellie都係，所以佢地今晚唔會返黎食飯架啦。」
大家姐：「哦~~原來係咁，咁你地兩個返房沖涼換衫先啦，應該好快就有得食飯~」
我：「知道大家姐，咁我地上去先喇。」
同大家姐道別完之後我就同Sarah一齊上樓，仲一邊行一邊傾下Ellen佢地個邊既事。
「你唔好搞咁多野好無，而家咁樣唔係幾好咩？大家都開開心心！」
我：「嘩，係咪二家姐把聲呀Sarah？」
Sarah：「好似…就係喇…」
無錯，我地係走廊上聽到二家姐把聲，仲聽得出佢非常激動。
因此，我同Sarah都不自覺停下腳步，繼續聽二家姐講乜。
「我絕對唔會再比佢牽涉入去個D無聊權鬥同金錢遊戲，絕對唔會！」
嘩…因乜事咁激動都有既？Sarah：「二家姐同邊個講野講到咁激動呢…？」
我：「會唔會係Uncle？我見二家姐講個D野好似係…」
Sarah：「我都聽到…不過Daddy而家係樓下同Auntie睇緊電視喎…我又唔見佢有講電話…」
我：「係啊…？咁會係邊個黎呢？居然可以激到二家姐咁嬲。
」Sarah：「哈哈係囉，除咗Daddy同阿明你之外居然仲有人可以激到二家姐咁嬲。
」我：「喂你咁講係…」
二家姐：「總知我要講既係得咁多！！唔好要我重複講咁多次，係咁！
」說話講到一半我地又聽到二家姐咆哮，嚇到我地兩個走夾唔抖。
到底係咩事激到二家姐咁嬲呢，唔會又關我事掛…我呢排已經好循規蹈矩啦喎…
沖涼既既時候我有諗過到底二家姐係同邊個講野，不過學Sarah話齋，真係唔知仲有咩人可以激到二家姐咁嬲。
可能係我地諗多咗啫，話唔定二家姐係同新識既男朋友嗌交呢？
沖完涼之後我急急腳走返落去飯廳，因為已經過咗七點，夠哂鐘開飯。
落到去個陣大家都已經開始食飯，老母見到我遲咗仲啤住我。
羽晨：「明哥哥~你遲到！
」我：「哈哈…唔好意思呀浸熱水實在太舒服，浸到過咗鐘都唔知。
」大家姐：「唔好企係個邊啦，快D過黎食飯吧啦~今日條魚好新鮮呀~
」大家姐咁幫我解圍，我梗係要好好把握，即刻走埋去坐低。
坐我對面既係二家姐，口黑臉黑，好似全世界都得罪咗佢咁。
我偷偷地問坐係旁邊既Sarah，問佢有無問到二家姐發生咩事，佢耍手擰頭咁話無，話唔敢問。
連二家姐最錫既Sarah都唔敢問，更何況最容易激嬲佢既我，乖乖食飯算啦。
但係頭先先食完成碟意粉同蛋糕無耐，仲邊食得落飯吖，就算話條魚係龍肉，食唔落就係食唔落架喇。
扒咗兩啖餸就已經食唔落，on99咁望住檯面D餸同對面既二家姐。
Uncle：「做乜唔食飯呀阿明？唔岩胃口？係既話我叫蘭姐煮其他野比你食。」
我：「啊唔係，唔洗麻煩啦，D餸好好食，係我自己問題。」
羽晨：「明哥哥你唔舒服啊？
」我：「啊唔係，只係頭先係外面同Sarah食咗D野，所以而家唔係好食得落啫…」
羽晨：「好好食架？」
我：「係呀超超超超超好食架，你唔信可以問下Sarah姐姐，係一個姐姐為咗氹佢細佬開心而學整架。
」Sarah：「係吖真係所有野都超好食架，有愛心整出黎既野食真係特別好味。
」羽晨：「咁下次可唔可以帶我去食啊？
」我：「哈哈當然可以喇，我諗個個姐姐見到咁可愛既羽晨一定會好開心架啫。
」大家姐：「我又要去我又要去！可以同阿明去街既機會點可以錯過~
」我：「得既…
」大家姐咁樣真係令人難以招架…
大家姐：「搞錯啊，阿明你對我同羽晨既反應差咁遠，對我咁冷淡都有既。
」我：「eh…
」Uncle：「好啦好啦唔好掛住講啦，D飯餸都凍哂啦，阿明如果你食唔落既話就唔好勉強啦。」
我：「知道，咁我行開先啦，唔阻各位。」
就係咁，我先離開飯檯，行下行下走到去泳池邊既落地玻璃，望住黑媽媽既泳池。
嘩屌，真係飽到想嘔，一陣都係唔好去跑步喇。
二家姐：「喂，你係咪有野想同我講。」
嘩屌！！！
佢係幾時係我後面架！！ 二家姐突然出現係我背後，令我大吃一驚，屎都幾乎瀨出黎。
二家姐：「洗唔洗咁大反應呀，而家我個樣好恐怖咩，嚇成咁都有。
」我：「唔係，邊係呢二家姐你個樣點會恐怖呢。
」二家姐：「咁你又嚇到咁既樣？」
我：「呃…好正常啫，如果突然有人係自己後面叫自己梗係會嚇親啦。話時話，二家姐你唔係食緊飯架咩，做乜會走咗過黎？」
二家姐：「仲好意思提，唔知邊個成餐飯用D奇怪既眼神望住我，搞到我完全無胃口食飯。
」我：「奇怪既眼神？邊個呀？間屋入面既全部都係屋企人，應該唔會有人用奇怪既眼神望住你先係架。」
二家姐：「人蠢都比個譜好無，咁都唔明我講乜，我擺明係話緊你啦，講，做乜頭先成餐飯都望住我。」
「講啦，你係咪有野想問我之類，呢度講既話佢地唔會聽到，可以放心。」
啊…原來比佢留意到…不過正好，既然佢咁樣俾哂機會我，都正係時候解決心入面既疑問。
我：「嗱係你叫架，咁我講架啦…講定先，唔可以嬲架，得唔得？」
呢個情況都係戴定頭盔先穩陣D，一個唔為意容乜易比佢打死或者掟落泳池都唔知咩事。
二家姐：「叫你講你就講啦咁多聲氣，都唔明點解你咁婆媽我…我細妹都仲會咁鐘意你。
」我：「咁又唔洗講到咁既…我都係想你有個心理準備，廢事一陣你太大反應搞到個邊注意到我地啫。」
二家姐：「係係係，你諗得好周詳，俾D掌聲你，咁可以講未？
」大獲喇…都未開始入正題佢就已經嬲嬲到地，如果我講咗我偷聽到佢傾計，佢會唔會嬲到出煙？
但而家先話唔講的話，佢肯定會更加嬲，肯定會即時掟我落泳池，唉屌，頂硬上啦。
我：「我頭先返自己房既時候，聽到你同唔知咩人講野，仲要講到好激動，我…我同Sarah都想知道係咩事，關心下二家姐你咁啫…唔會係有咩事掛？」
我一講完之後二家姐就馬上變臉，由好串好嬲，變到咩都講唔出，只係識擘大對眼望住我。
唔知點解，我下意識迴避二家姐既目光，轉而望返去泳池。
二家姐：「居然比你兩個聽到啊，睇黎我頭先實在太激動，激動到自己講野幾大聲自己都唔知…
」聽到二家姐終於有答覆，我先敢重新望住佢，卻發現佢捂住自己額頭，表情好似相當苦惱咁。
我係咪問咗D唔應該問既野？
我：「二家…」
二家姐：「你地聽到幾多？」
我：「聽到…咩唔會再比佢牽涉入去個D無聊權鬥同金錢遊戲…要講講咁多之類囉…
」二家姐：「係啊聽到呢D啊…」
今次到佢擰咩臉，令我再睇唔到佢既表情。
要諗辦法收拾局面喇真係…唉屌又係自己多口壞事。
我：「對唔住啊係我多…」
二家姐：「我頭先係同朋友討論緊一隻戰略遊戲，類似heart of iron之類咁既，大家之間有少少分岐，咪嘈起上黎囉。」
我有無聽錯！？
我：「哦…原來係打機…」
二家姐：「無錯就係打機，千其唔好同老豆，唔係，應該係唔好同其他人講起呢件事，我唔想因為打機比人哦，好煩，明唔明？」
我：「哦…明白…」
二家姐：「好，咁我而家答咗你既問題，唔該你唔好再用D奇怪眼光，會望到我好唔舒服架你知唔知。」
我：「係既明白喇我。」
二家姐：「咁就好，係咁先，我返上去繼續玩隻game先。」
二家姐就此遠去，由頭先開始佢就一直無再望過我一眼。
我可能係蠢，但就算係傻既都知道，都感覺得到喇…
二家姐頭先根本就係度講緊大話…