「無啦啦多左幾個家姐同細妹 Season 2」: 重來
Sarah咁大反應並唔常見，當下我完全唔識反應，淨係識望住佢走。
當然，之後我有追返上去喇，但佢已經唔睬我，一支箭咁走返學校。
我有試過氹佢，叫佢唔好嬲，你點話點好，聽哂你話之類，但佢都係無反應，繼續行佢既路。
一路行一路氹佢，周圍既人都開始望住我地，但佢仍然不為所動。
最後我都無哂辦法，只可以送佢送到返佢班房，之後就自己一個離開。
唉我又做錯事…點解要咁呢陳煒明…
垂頭喪死既我，好快就比人發現，俾Anna佢發現咗。
Anna：「喂傻仔明，做乜頭dup dup咁？測驗唔合格呀？」
我：「唔係呀，最近都無測驗…」
Anna：「咁做乜個人咁謝既？你唔舒服？」
我：「頭先同Sarah食lunch，講咗兩句之後佢好似就嬲咗我…唉…」
Anna：「Sarah會嬲你？佢喎！？你肯定做咗D好過份好離譜既事佢先會咁，講！你係咪想搞人！
」我：「痴線啦！我似D咁既人咩！
」聽到呢個嚴重而且無理既指控，我無辦法唔變得激動。
Anna：「唔係都唔洗咁激動既，你冷靜D先，咁你話我知，你頭先食飯個陣同佢講咗D咩？一五一十話我聽先。」
我之後就真係一五一十，將頭先所有既事，包括我既心路歷程都講埋出黎。
Anna：「唔…又難怪佢會嬲你既…你真係衰人黎。」
我：「點算呀咁？？頭先開始佢已經唔睬我喇。」
Anna：「你真係吖…人地不停話唔緊要，無怪過你，你都仲要係度扭扭擰擰，仲要係人地面前！你話你係咪低能！
」我：「係…咁我頭先真係…」
Anna：「放學同佢去拍拖，搵位氹返佢喇。」
我：「咁你地…」
Anna：「死蠢，呢個時候梗係氹返嬲咗個個先啦，仲諗其他？
」「反正我地幾個今日放學都有野做唔得閒，岩哂啦，就由你陪Sarah啦，一於咁話，唔准有異議！」
「之後既就自己諗掂佢啦，你既話一定可以氹返佢既~
」佢講完就走咗，又留低我一個。
時間好快就過去，話咁快就放學。
唔知點解，我呢一刻咩都無諗，行咗去Sarah班房。
當我去到佢班房既時候，佢咁岩就行咗出黎，我地差D就撞到對方，大家都俾對方嚇咗一跳。
不過佢比我更快整理好心情，好快就變返木口木臉。
Sarah：「行喇我地。」
佢一手拖住我，帶住我行行行，由班房門口開始，經過走廊，出到學校，直至走到去地鐡站都無放手。
同時亦都無講過一句野。
自知理虧既我當然唔敢出聲，唯有乖乖地跟住佢行。
係拍八達通入閘個下，佢終於都放一放手，等我地可以各自入閘。
我亦終於搵到我既機會，一定要好好把握呢個機會！
就係大家都入咗閘，收好八達通之後，我採取主動，一下拖住佢隻手。
呢一下奇襲收到預期中既效果，佢嚇咗一跳，甚至「啊」一聲咁叫咗出黎。
我打蛇隨棒上，加快自己既步伐行到去佢旁邊，笑笑口咁望住佢。
我：「嘻嘻~
」Sarah：「哼！
」佢鼓埋泡腮，好似仍然係嬲緊，但係我眼中好可愛，好想搓佢塊臉。
我：「點呀，你想帶我去邊拍拖？」
Sarah：「旺角。
」旺角啊…都係大路野黎既。
我：「好呀~你點話點好喇~今日我成個人同心都係你既。」
Sarah：「得今日係咋？」
！？
我：「唔係~我意思係…係呢一刻呢一度得我同你兩個啫~
」Sarah：「哼，聽住先喇。
」嘩…佢而家個氣場真係十足十Anna咁，原來Sarah嬲起上黎都係咁得人驚…
以後都要注意，唔好激到佢先得…
不過我諗進展應該都算順暢？佢起碼無甩開我隻手同埋態度又算好咗少少，肯同我講野…
坐咗好多個站，我地終於去到旺角站。
我：「Sarah，你想去新…」
Sarah：「呢邊吖。」
我以為佢會想帶我去新之城個邊行，因為我記得佢之前講過佢新識既朋友帶過佢去，點知佢居然拉我行反方向，去E出口個邊。
佢一直都無停低過，直至行到去呢度門口，佢先肯停。
潮特門口。
我：「Sarah…
」Sarah：「仲記唔記得呢度？」
梗係記得啦…我上年就係係度從阿偉手上搶走Sarah…可以話係一切既開始…佢帶我黎呢度到底係…
Sarah：「入去喇。」
佢無多講，拖住我行入去。
佢就好似平時咁，一見到有岩眼緣就會走入去間鋪睇，仲會拎D衫放上身上問我覺得佢著件衫好唔好睇，如是者咁樣行咗兩層佢都無講乜特別野。
我知道佢帶我黎呢度係別有用意，但行咗咁耐，衫都買咗兩袋佢都唔講關於個件事既野…
Sarah：「啊，終於黎到呢間鋪啦，我仲以為無咗添。」
我：「嗯？」
佢咁樣講一講，令我環顧四週，發現原來唔經唔覺我地已經行到去個間裇衫鋪。
Sarah：「如果個日我無跟你走，唔知而家會係點呢？」
我：「我諗..我同你仲係姊弟關係掛…可能我甚至會比阿偉打死添。」
Sarah：「係啊可，所以我…」
「我好慶幸自己個一刻有勇氣跟你走，如果唔係既話我根本無可能有而家咁開心既生活，見到咁多野。」
「一瞬間既決定，居然可以改變咗咁多野，人生真係神奇。」
我：「嗯…」
Sarah：「由一開始我就一直都相信阿明你，信你所有決定都係為咗我地，為咗大家好。」
「你只係太想一個人去做好所有事，先會有D冷落咗我地既感覺，其實你無錯架。」
「所以，唔好再係度諗咁多啦，將呢份心力放係陪我地，重新出發，同我地幾個開開心心咁過好無？」
我：「好…」
Sarah：「咁就乖喇~~
」佢居然使出我慣用既摸頭，俾咁多人望住真係有D尷尬…
不過，聽到佢咁講，仲要係呢個咁有意義既地方，個心真係好舒服。
透過佢把口證明我以往做既事其實無錯，真係令人好好受，感動到幾乎喊出黎。
Sarah：「好喇我地而家去食野啦咁，我諗呢個行程諗到成個下晝搞到而家好肚餓添。
」我：「明明就一個地方，咁都叫行程？」
Sarah：「你講咩呀！
」我：「扮咩嬲啫，其實你知唔知你嬲到鼓埋泡腮個樣好可愛？我頭先見到真係好想搓落去。
」Sarah：「我任何時候都係咁靚，咁可愛架啦~
」我：「係係~好啦去食野啦~
」唔知係咁岩定係命運既安排，我地搵地方食野居然搵到去個間café，無錯，係魯路修屋企間café。
我：「你係特登帶到我黎呢度架？」
Sarah：「嗯？我跟你行架咋，我仲以為你係有心黎呢度添。」
我：「哈，我諗呢D就係命運啦，係命運將我地帶到黎呢度，唔好講咁多啦，你唔係話肚餓架咩，我地快D入去坐低叫D野食啦。」
Sarah：「又好啫，話時話我記得呢度…」
「咦你兩個咪係…唔好企係度啦，入黎坐低慢慢傾仲好啦！
」當Sarah講野講到一半既時候，個個冬菇頭姐姐就突然走咗出黎歡迎我地。
我地亦無拒絕佢既好意，係佢既帶領下入座。
Sarah：「姐姐你…認得我地兩個？」
Sarah一坐低就問咗我都想問既問題，我地明明只係黎過一定兩次，仲要係成年前既事，但呢個姐姐一見到我地就咁熱情歡迎我地，好似認得我地咁。
冬菇頭姐姐：「哈哈叫我美星姐啦，我梗係認得你兩個啦，第一個用我鋪頭急救藥箱既人喎。」
我：「哈哈…個陣真係打攪哂…阻住你做生意添。
」美星：「啊唔緊要，比起我細佬班朋友，你地呢D算得係咩吖，係呢，點解會走上黎既？有事搵阿晨？」
我：「哦唔係吖，我地只係係附近拍拖行到肚餓，行行下就黎咗上黎喇。」
美星：「哦肚餓！岩哂啦我試緊整新既意粉，有無興趣試下？」
Sarah：「嗯！麻煩你喇美星姐~
」美星：「哈哈，我最鐘意咁乖咁有禮貌既細佬妹架啦，要唔要飲D野，唔岩飲咖啡既呢度都有果汁或者紅茶架。
」我：「咁麻煩你畀兩杯紅茶我地吖。」
美星：「好~等陣啦咁，好快有得食！
」佢講完就跑咗去廚房，幹勁十足咁樣。
Sarah：「美星姐好好人啊可？」
我：「係呀，覺唔覺佢有D似大家姐？」
Sarah：「係呀係呀，唔怪得有種親切感咁啦！
」係等野食既呢段期間，我同Sarah係度傾計，又係呢個咁靚既環境影下相打下卡之類打發時間。
消磨咗一陣時間之後，野食同野飲就送到我地面前。
美星：「黎啦~卡邦尼意粉同大吉嶺紅茶~
」Sarah：「嘩賣相好靚呀！阿明快D幫我影相！
」果然係相機食先啊…
不過又唔係咩問題，所以我都乖乖幫佢影咗幾張，之後我地就係美星姐望住之下開始食。
嘩，又真係好好食喎。
美星：「點呀點呀，好唔好食？
」我：「好食…」
屌，我講講下唔小心跌咗條意粉落件衫度添。
美星：「哈哈，吞埋啖野先講吖嘛，咦？點解你係著住我細佬學校既校服既？我記得你…」
我：「係呀，我地轉咗校，今年開始係你細佬學校讀書。」
美星：「係啊？你地同魯路修同級？」
Sarah：「唔係啊，我地今年Form 5，低佢一級。」
美星：「嗯~明白，仲諗住可以係你地口中知道個傻仔平時係學校係點添，算喇~」
我：「你話…想知道佢平時係學校係點？點解既？」
美星：「啊…講唔講好呢？算喇，其實自從佢女朋友去咗外國讀書之後，我呢個細佬就變咗好多，好少見佢笑，所以我想知道佢係學校係咪都係咁，如果都係咁的話，我諗我可能要同佢好好傾下喇~
」我：「哦…呢件事我都有聽晨哥講過…
」美星：「其實呢碟意粉我都係想佢可以開心D先試整，但而家諗落又怕佢見到會諗起阿妹…唉我都唔知點算好…
」Sarah：「我諗佢一定會知道你既好意既，知道你係為佢好。」
美星：「我希望係啦~你把口真係識氹人架啫~
好！等我請你地食蛋糕啦！
」佢講完就跑咗去蛋糕櫃度拎咗兩件蛋糕過黎，Sarah見到之後對眼變到好似識發光咁。
美星：「同自己鐘意既人分開係一件好痛苦既事，所以呢，你地要幸福呀，任何時候都唔好放開對方，用盡一切方法都要呀知唔知？」
佢一邊放低蛋糕一邊向我地訓示，偏偏係今日聽到呢D說話，真係命運既安排。
我無意間望咗Sarah一眼，卻發現原來佢都望住我。
大家咩都無講，只係望住對方微笑。
我諗而家既我地，應該都唔需要為呢件事講任何野，大家都知道要點做。