「無啦啦多左幾個家姐同細妹 Season 2」: 獨處
就係咁，我就同Sarah兩個人黎個二人世界喇。
我地去咗新開既薩莉亞食lunch，自斟自飲不知幾開心。
我：「點解你今日唔同你班朋友食既？」
Sarah：「唔？點解咁問既？我阻住你同你D朋友？」
我：「哦梗係唔係啦，同佢地食幾時都得啦~同你二人世界既機會難得好多~」
Sarah：「哈哈我又無咁諗喎，其實我只係想同你食lunch先去搵你咋~我都係去到你班房門口check wts先知原來其他人都唔得閒。」
「不過你咁樣講一講又好似真係好耐無同你二人世界，最近都無乜機會~
」我：「原來係咁呀？睇黎我又諗多咗添，啊…係囉，我去斟野飲先！
」講起諗多咗我又諗起晨哥同二家姐講既說話，又唔想比Sarah發現，於是我借斟野飲為名行開，希望可以整理一下自己表情。
斟咗一杯滿到滿瀉既可樂，表情亦終於控制到，可以返去搵Sarah喇。
行到返去個陣D野食咁岩就送到黎，真係perfect timing。
我：「嘩正呀有野食，我唔客氣喇~~
」我有理無理，一於小理，開始食野，唔洗三兩下手勢就同佢一齊清哂黎咗既野食。
但好似唔多夠飽，反正仲有唔小時間…
我：「不如再叫多D野食？」
Sarah：「唔？啊可以啊…
你話事吖。
」得到佢既同意之後，我又叫多咗兩樣野食，呀真係開心。
雖然我就覺得好開心，不過我既女朋友仔好似就唔係咁開心，雙手托住個頭，用個令人難以捉摸既眼神望住我，望到我都有D唔好意思。
我：「做乜咁望住我呀，係咪有乜想講？」
Sarah：「啊！
唔係吖，我係度諗緊你係咪有乜野煩緊咋嘛。
」我？佢諗緊我既事？
我：「點解…你話你諗緊我？」
Sarah：「嗯，我梗係諗緊你啦，因為你係我男朋友黎架嘛，頭先見你講講下野表情突然變到好奇怪，一下子突然好唔開心咁，我就係度諗你係咪有乜事囉。」
「但你頭先又突然咁開心，搞到我又係度諗自己係咪估錯咗。
」嘩，我一意識到自己表情有事就已經即係起身走人喇喎，佢咁都留意到？真係不得不佩服佢。
Sarah：「你咁阺臉口，即係我講中咗啦？
」我：「係呀，你真係犀利，短短一瞬間都比你睇到。
」Sarah：「哈哈，因為我眼入面只有你一個吖嘛~咁可唔可以話我知係咩事，雖然我無乜用，肯定幫唔到你D乜，不過起碼可以做你既傾訴對象既~
」喂…突然講呢D，想整喊人咩…
不過男人老狗又點可以隨便喊，我鏈住春袋，強忍眼淚，抬起頭正視Sarah。
我：「無乜既，只係諗緊自己呢排做D乜啫，係呢，你覺得我呢排有無冷落你地？」
Sarah：「呢個問題呀…係呢…有呀，成日都將我地放埋一邊就算。
」！？
無諗過佢會咁直接添，仲以為佢會婉轉D講甚至話唔係。
不過佢咁直接即係證明我真係好似同晨哥講既一樣，忽略咗身邊既人啦。
我：「我…」
Sarah：「不過我知道阿明你有自己既諗法既，你唔係有心咁做，你只係想大家開心啫。」
「但我覺得你真係應該花多D時間去陪下Ellen同Ellie佢地，Ellen佢最近壓力好大，而Ellie佢就因為佢嫲嫲既事…係囉你明架啦。」
我：「嗯，我明白…」
Sarah：「仲有Yui同Anna，你有時間都多D理下佢地啦，成日坐係度唔知做乜咁做咩啫。」
我：「咁…你呢？」
Sarah：「嗯？你話咩話？」
我：「我係話咁你呢？你頭先講黎講去都係佢地，無提過你自己喎。」
Sarah：「啊…好似又係喎嘻嘻，不過唔緊要啦，你係度我就無所謂架啦，我都唔知自己仲要D乜囉。」
「更何況，你而家咪陪緊我囉？咁咪夠~
」聽到佢咁講，唔知點解我個心更加唔舒服。
咁樣當面問我先發覺自己真係做得唔夠…成日諗住自己係佢地旁邊就已經夠，明明以前做咗咁多野，又帶佢地周圍去又盛，點解而家會完全無咗呢D心機架。
我諗我大概明白晨哥係小息個陣講既野喇…
Sarah：「阿明？你又做乜呀，唔好苦口苦臉啦~笑下喇好無？你睇，又有野食喇，你頭先唔係好期待D野食架咩？快d食啦~
」就算佢咁安慰我，我個心都係好唔舒服。
我：「我呢…一直都只係諗住大家開心就夠，仲自己係度努力，無諗過因為咁而會有反效果…」
「晨哥講既野…原來真係岩架…
」Sarah：「嗯？晨哥同你講咗D咩？」
我：「佢話…下下望到咁遠，忽略咗身邊既野又有咩意思，原來係指呢件事…」
Sarah：「哦…咁佢又真係無講錯既，阿明你有時係會因為見到一個目標，咩都唔理咁向住呢個目標行，有時係忽略咗其他野。」
我：「係呀，就係咁呀..我終於明白喇，死喇點解我到今時今日先發現到架…」
Sarah：「不過如果你咁大反應係因為呢樣野既話，其實我又唔覺係咁大問題啵~
」「我地一直以來都係咁樣過架~大家都習慣跟住你行~亦好樂意咁做~點解你會突然間咁大感觸既？」
我：「我覺得自己好似自從黎咗呢度之後就理少咗你地好多，把口就用你地忙黎做藉口，其實就係自己無心裝載…」
內疚感完全無辦法遏止，不停湧出黎。
我：「我應該點做先好呢…而家先補救會唔會太遲呢…
」我開始係度自言自語，因為我意識到自己原來錯得好犀利。
只係做自己認為岩既事，但一做就忽略咗身邊既人，只係不斷向住目標行同諗住點先可以再做好D，完全都唔理會有咩影響後果。
明明之前都已經因為咁出過幾次事架啦，點解我呢個死蠢都唔識汲取教訓架…
嘩痛！！好撚痛！！！
就係我不停自己同自己講野既時候，Sarah突然好用力咁扭我耳仔，大力到我想即刻當場爆粗。
多得呢下，我重新將目光放係Sarah身上。
Sarah：「你再係咁既話我真係嬲架啦！
」我：「Sarah…
」Sarah：「如果你真係想補救既話，今日放學同我去拍拖！
」佢講完就拍檯，拎咗張單走人。
就係呢刻，我先發現新黎既野食已經全部無哂。
而我係一啖都無食過。