「無啦啦多左幾個家姐同細妹 Season 2」: 遲鈍
係幾個人一齊努力之下，淨低既禮物好快就包完，仲入好哂箱準備聽日拎返學校。
到第日，就由我，唯一一個男丁負責拎住呢箱曲奇返學校，行返學校個段路仲要俾其他人望住，望住我好尷尬。
佢地五個就係我前面大搖大擺咁行，原本Ellie，Yui仲有Sarah有問過我洗唔洗幫手拎，但Ellen同Anna幫我一口拒絕，話男人黎架嘛，拎個小小野邊洗人幫。
俾佢地咁講一講，原本想比佢地幫都唔好意思，D野仲要唔重既。
就係行入學校門口之際，我就聽到阿希佢地幾個把聲，仲見到佢地行緊過黎。
阿希：「喂阿明，做乜拎住咁大箱野？咩黎架？」
黑仔：「等我睇過…咦曲奇喎！正呀！俾包我吖~
」Ellen：「唔得呀，唔係俾你地架D曲奇！唔淮拎。
」就係黑仔想伸手去拎一袋曲奇個下，Ellen反應突然變得極快，即刻喝止同出手阻止黑仔，仲鬧咗黑仔一餐。
唔知頭唔知路既黑仔咁就硬食咗，佢反應相當無奈，望住我，擘大個口得個窿。
我：「呢D野佢準備咗好耐，用咗好多心機架，敏感D都好正常，你咁多手抵你俾人鬧啦，黎啦快D行。」
我隨便安慰下佢，之後就跟住Ellen去學生會放低箱曲奇。
就係放低唒D野，行返出學生會門口個一下，我地突然聽到好響亮既歡呼聲。
Sarah：「哇個邊發生咩事咁多人既。」
得Sarah提一提，我先發現原來係有多人堆哂係學校門口唔知做乜。
有一個人，帶領住其他人係人羣中行出黎，好似分紅海咁，人羣因為佢分開咗兩邊。
無錯，呢個人就係晨哥啦。
係喎，今日佢last day，肯定會有好多人想搵佢影相，不過一朝早就咁多人未免太誇張啦掛…
諾賢：「喂阿明，返上去啦，阿希佢地催啦。」
我：「哦哦…而家黎。」
原本想再睇多一陣呢個奇景，不過阿希佢地叫到，算喇。
返到上班房，我發現居然差唔多成班人都已經返咗黎，係得幾個位係未有書包。
我：「嘩係，因乜解究大家今日咁早？有功課要抄咩？」
諾賢：「咩呀？你唔記得咗嗱？今日係Kathy last day呀。」
我：「哦哦，我梗係記得啦，咁同大家咁早返哂黎有乜關係？」
其實我真係唔記得咗，不過係人面前梗係要扮記得啦。
Cody：「唔記得咪認咗佢囉，早幾日阿希咪偷偷地同我地講過話今日會同Kathy farewell，叫大家早D返黎俾個surprise Kathy。」
呀…我又真係完全無咗回事…
我：「不過Kathy頭先同我一齊返咗黎啦喎…你地個計劃…」
阿希：「放心啦，我已經叫人係樓下截住佢，行拖字訣拖住佢唔比佢上黎住架啦。」
阿希春風滿面咁行埋黎，淨係用表情就已經可以令人知道呢一切都係出自佢主意咁。
我：「哦，真有你的，咁催我上黎為乜？我有野幫到手？」
阿希：「有呀，去黑仔個邊簽相，寫一兩句野，之後返埋位坐低等啦。」
我：「係既大佬，知道大佬。」
佢今日咁有衝勁，順下佢意啦就。
我照佢既說話去做，去簽相，張相原來係開學無耐既時候，Miss Leung偷偷地係老師檯個度影既，上面有哂我地成班人，個個都乖乖地坐係度望住個screen。
我隨便寫咗句前程似錦就算，因為一時三刻都唔知應該寫咩好。
坐返埋位，見到大家都各有各忙，有D人係度排隊簽相啦，有D人就係度係黑板度畫野，寫D祝福說話咁。
唔知Kathy見到大家為佢做咁多野會有乜反應呢？會唔會感動到即場喊出黎呢？
Cody：「喂，你點坐架，坐到兩張檯歪哂都有既。」
Cody打破咗我自己既幻想，仲踢咗我張檯一腳，我個下巴差D因為咁撞咗落張檯。
我：「喂你又咁快簽完既。」
Cody：「都唔知寫乜先好，咪寫住句順風就算。」
我：「唔寫埋到付？哈哈哈。」
我講咗句李力持級笑話，但佢完全無反應，罵我都無。
自己製造咗deadair，唯有自己接受，我繼續望住D女仔係度畫黑板，直至鐘聲響起。
諾賢：「喂阿希，Kathy同Fanny行緊過黎啦。」
阿希：「全世界standby！Miss Leung呢？」
黑仔：「佢兩分鐘前wts咗我話開始去搭𨋢，應該無問題！」
我：「嘩佢地好似打仗咁喎…」
Cody：「咁咪證明佢地好認真看待呢件事囉。」
佢岩。
Kathy好快就行到門口，仲要第一眼就望到黑板上面既野。
佢既表情即時起咗戲劇性既變化，由前一秒好開心同Fanny傾緊計，變到呆咗咁望住大家。
Fanny推佢一把，等佢成個人可以行入班房。
就係呢個時候，Miss Leung都趕到，仲捧住個蛋糕，令全班人都歡呼。
咁樣既二連打衝擊，令Kathy更不知所措，到呢一刻佢都唔知咩事，真係遲鈍。
阿希：「Kathy，祝你前程似錦，旅途愉快！~
」吓？旅途愉快？
衝出黎柒，咪係呢D囉。
大家聽到阿希呢句「旅途愉快」都開始瘋狂恥笑佢，就連Kathy，頭先成個人呆咗既Kathy都忍唔住笑出聲。
阿希個傻仔仲要死撐話無講錯，大家都應該要祝Kathy旅途愉快先係，但已經無人再理佢。
除咗蛋糕，頭先大家排隊簽個張相亦經由Cody呢個女班長之手交到去Kathy手上。
佢仲同Kathy講咗兩句，內容係乜我唔知，不過見到Kathy聽完Cody講之後馬上變到眼濕濕，我估都係d感動野。
Kathy緊握住張相，眼有淚光咁不斷同我地講多謝，仲話一定唔會忘記我地，十足十D校園劇或者漫畫咁。
Kathy既事去到而家應該可以話告一段落啦，雖然係麻煩到好多人，不過所有野總算都安頓好哂，
如果阿樂知道咗的話，佢又會有乜反應呢？
今日上既所有堂，所有老師既開場白都係同Kathy講拜拜，祝佢一路順風，證明Kathy幾得老師們鐘意，明明出席率咁低。
就連晨哥，都係小息既時候專登黎我地班房搵Kathy，引起一陣騷動，好多女爭住同佢合照留念。
就連Cody，都係我既遊說下忍唔住走埋去搵晨哥合照，晨哥仲搭佢膊頭，佢執到啦真係。
晨哥影完相之後並無即刻走，而係走咗過黎我呢邊，仲笑笑口咁望住我。
晨哥：「點呀，個句野諗成點呀，諗通咗未？」
我：「個句？呀，我知你講咩啦，無呀，無諗lu。
」晨哥：「哦？無諗？
」我：「無呀，你個日走咗之後我同二家姐傾咗陣，佢話去做自己認為岩既野就得，唔洗太在乎其他人既說話，所以我就無再諗啦，廢事又走火入魔。
」晨哥：「哦~佢咁講呀？我諗佢而家應該好憎我lu哈哈哈。
」我：「二家姐憎你？點解？
」「登~登~登登~」
小息鐘偏偏係呢個時候響，真係唔岩時候。
晨哥：「你呀，遲鈍極都要有個譜吖，好好關心下身邊既人同事，自己諗下啦。
」「下下望到咁遠，忽略咗身邊既野又有咩意思？
」佢講完就揮䄂而去，又留低一堆新問題比我。
Lunch time前既兩堂我都係度諗佢講既野，但始終都諗唔通，咩關心下身邊既人，我一直都好在意佢地架。
黑仔：「喂，阿明，你女友係出面等緊你喎，你應該唔同我地食lunch架啦？我地行先啦咁。」
嘩乜lunch time架啦？唔係黑仔講我都唔知添。
俾佢提一提，我即刻望向出面，睇下佢地係咪都係出面。
係就係係出面，不過得Sarah一個。就算係咁，我都即刻跑出去，唔好要佢等。
我：「其他人呢？
」Sarah：「其他人都有野忙呀，今日得我同你咋~
」