「無啦啦多左幾個家姐同細妹 Season 2」: 自己

二家姐無同晨哥傾太耐，只係寒暄咗兩句晨哥就走咗，二家姐繼續行入黎屋。

而我，仍然企係原地，望住呢一切發生。

我仲係度load緊晨哥最後講既野，呢句說話真係比較難理解，我一時三刻真係唔明佢想講乜。

否定以前既自己…？我？我有咩？

二家姐：「成碌木咁企係度做乜？唔好阻住條路ok？」

佢咁講，我先郁一郁，移一移開，但因為咁我先發現自己原來一直挨住塊落地玻璃，亦即係話我其實根本就無阻住條路。

當我意識到之後，我就望向企係我旁邊，係泳池門口既二家姐。

佢亦好快意識到我望住佢，望返過黎仲問我望乜野，語氣仲要好惡，好似D MK妹咁。

我：「哦無，只係…算喇都係無野，係我唔好，我返上去搵佢地先。」

二家姐：「等等。」

就係我行咗兩步既時候，二家姐就叫住咗我。

我擰轉身望返過去，但就見到佢背向我，望住個泳池。

我無行埋去，只係保持呢個距離望住佢，等睇下佢有乜想講。

二家姐：「阿晨佢係咪同你講咗D乜？」

我：「啊，係呀，佢黎叫我要好好睇住佢既學校，同埋…eh…應該點講好呢…」

二家姐：「有咩就講啦，呢度得我同你咋嘛怕乜。」

我：「無，佢叫我唔好太否定以前既自己，但我唔係好明佢咁講係咩意思。」

「二家姐，晨哥意思係咪即係叫我改變一下？我應該點做？」

二家姐並無即刻答我，沉默係我地之間持續咗大概一兩分鐘佢先再開口。

二家姐：「唔洗咁在意佢既說話，佢話講既野都唔係一定岩，佢又唔係…唔係真係神。」

「佢又唔係你，唔會知道哂你以往既事，又點會真係知道你應該點行先岩。」

「而且，人地叫你點做你就點做？你無自己思想？去做你自己認為岩既野就得啦。」

「如果你行既路真係錯，錯得好離譜既話，自然會有人阻止你，到時你記得聽人勸就可以。」

二家姐妙語連珠，我完全無空隙可以插嘴，只可以乖乖咁聽哂。

到佢講完，我居然咩都講唔到，仲差D想拍手掌。

佢講完之後終於轉身，走過我身邊，一支箭走咗上樓。

經過我身邊既時候，佢仲講多咗句。

「唉自己諗掂佢啦屌，唔好咩都煩我，我好多野忙。」自己諗掂佢…比二家姐咁講，我即係唯有靠自己啦。

不過佢都話過去做自己認為岩既野就得，咁即係話其實我都無乜問題啫？

咁唔好諗咁多啦都係，我總係覺得如果我再諗呢個問題既話會有好大機會走咗去D奇怪既方向。

之所以會有咁既諗法係因為之前有好幾次都係咁而出事，真係諗返都怕怕，唔好再搞我喇都係。

之後我真係無理件事，因為變得忙咗，我要同Yui一齊pack緊比Form 6既禮物。

明明聽日就係人地last day，禮物聽日就要派，Ellen佢居然完全唔在乎，坐係度同Anna兩個玩電話。

我：「喂Ell..」

Ellie：「唔好嘈佢啦，等我代佢幫手喇。」

就係我想開聲叫Ellen過黎幫手既時候，Ellie就行咗過黎，自動請纓幫手。

Yui：「係啊阿明，Ellen而家有好多野煩緊，呢D小事就等我地做咗佢，當係幫佢分擔下啦。」

我：「有野煩緊？睇佢係度玩電話又真係唔覺佢有野煩緊喎，係咩事？」

Ellie：「係有關謝師宴架，家姐佢想Form 6可以唔洗俾錢就有得參加，所以佢提議可以係我地屋企公司旗下既酒店搞，但學校個邊又話咁會有利益衝突，又話程序上都會有問題。」

我：「哦…原來係咁…」

Ellen呢個學生會主席真係…點講好呢…好關心每個學生。

Sarah：「佢今日lunch time個陣仲同Form 6同埋老師個邊開會，傾咗好耐都係無成果。」

Sarah係呢個時候捧住一盤野食走入黎，盤上有碟意粉，有杯野飲仲有兩件蛋糕，好似係餐廳叫一個set lunch咁。

Yui：「啊，唔該你呀，我唔記得咗落去拎添…」

Sarah：「你忙緊吖嘛，邊個拎都無乜所謂啦~」

我：「哇好香吖，比我食啖吖~」

Sarah：「唔係比你架，呢D野食係比Ellen架。」

我：「比Ellen？唔通佢…」

Yui：「係啊，佢連lunch都無食…成日都係忙緊學生會既事。」

我：「Sarah，比盤野我吖。」

Sarah：「咪話咗呢D係比Ellen架囉，如果你係想食野既話我去叫…」

我：「我唔係食呀，比我喇。