「無啦啦多左幾個家姐同細妹 Season 2」: 離開
聽到佢咁講，我諗係人都會感動啦，仲邊洗再問落去。
至少我唔洗囉，佢地幾個就唔知啦，我無權管佢地。
無錯啦，係放學返到屋企之後佢地幾個，都唔可以話幾個既，Sarah同Ellen係咁chur住Anna追問佢，搞到Anna做唔到自己野。
Sarah：「Anna~話俾我地知喇~~尋晚食飯情況係點架？」
Anna：「唉呀，過咗去既野仲講黎做乜啫，唔講唔講，俾我做功課啦。」
Ellen：「唔好做住啦都唔急既，功課既野十分鐘就可以做完啦，快D講下尋晚既情況先啦~~」
Anna：「有乜好講啫，咪又係普通一班人食餐飯，咪同平時同你地一齊食飯一樣，好普通咋嘛，無野好講！」
Ellen：「餐飯梗係無特別啦，我地想知既係你同個男仔之間既互動呀，話我地知啦~~唔講既話就唔比你做功課！」
Ellen講完就一手抽走咗Anna做緊既數學功課，仲開始係個細廳度圍圈跑，唔比Anna拎返份功課。
明明Anna可以好容易就追上Ellen，但佢而家居然追唔到，只係一味跟住Ellen，不斷叫Ellen俾返份功課佢。
咁既情況持續咗五分鐘，結果居然係Anna投降，真係一日唔死一日都可以有新聞。
Anna：「好喇好喇我講喇得未？你地想知道D乜呀，我講啦，俾返份功課我先啦。」
之後Ellen同Sarah問咗Anna一大輪野，例如第一眼見返個男仔感覺係點，個男仔有無女朋友，個男仔有無主動撩佢之類。
Anna所有問題都答哂，話見到個男仔感覺係好意外，意外對方唔同咗咁多之餘亦同時意外自己居然見到佢一D感覺都無。
聽到咁我就無咗聽落去，因為我知道已經無咁既必要，無謂咁八卦。
我於是將注意力轉去係另一邊埋頭苦幹既Ellie同Yui，睇下佢地做緊乜。
Yui：「過兩日就係Form 6 last day，Ellen話想準備D禮物送比佢地，我而家係度包緊囉。」
我：「禮物？咩黎架？不過既然係佢提議既，點解佢仲自己係個邊同Anna佢地吹水，唔幫你手都有既。」
Yui：「我地訂製咗朱古力曲奇比佢地呀，其實Ellen做咗好多野架，呢度每一張咭都係佢親手寫架，我只係負責包裝已經好輕鬆。」
Yui真係好好，唔會抱怨，仲會話人地仲辛苦。
我：「咁Ellie你呢？你又係度做乜？」
Ellie：「哦無，我係度幫Kathy打點緊新屋既野啫，佢今星期六就入伙，我想佢順順利利。」
連Kathy都要離開嗱？好似突然間大家都一齊走咁。
我：「係喎而家Kathy人呢？係你地屋企？」
Ellie：「唔係呀，佢放學個陣話去搵阿惠，所以應該去咗聖所羅王。」
我：「哦，不如等我幫下你地手..？有無乜係…」
我都未講完句野，就有突如其來既狀況打斷我，大家姐忽然入咗黎。
大家姐：「阿明~~阿晨黎咗搵你呀！
」晨哥黎咗搵我？
聽到呢個消息之後我就同大家姐一齊落樓去見晨哥，佢呢個時候仲著住校服，即係無返屋企直接黎呢邊？
唔通搵我有重要事？
晨哥：「唷阿明，打攪哂~
」佢笑笑口咁，又唔似係咩重要事喎。我：「晨哥你搵我有事？仲要校服都唔換就過黎，好重要架？」
晨哥：「哦又唔係咩重要野既，我唔換衫係因為一陣約咗佢地食飯，唔想咁麻煩咪唔換。」
我：「哦…咁…你搵我有乜事？」
晨哥：「唔…無呀只係想黎搵你傾兩句啫，你而家唔得閒？」
我：「唔係呀，我得閒，咁過黎呢邊傾啦。」
大家姐：「咁等我去準備茶同蛋糕比你地，等你地慢慢傾？」
晨哥：「唔洗啦，我都唔係會留好耐，無謂麻煩你。」
晨哥係拒絕咗大家姐既好意之後就同我行到去近泳池既落地玻璃，佢神色變得相當凝重，搞到我都有d驚。
晨哥：「之後就交俾你喇。」
我：「吓？你講乜呀晨哥？交乜俾我？」
晨哥：「學校既事呀，唔係既話仲可以有咩事。」
「我過兩日就study leave啦，應該一段時間都唔會再返學校，要靠你睇住啦。」
我：「我…？我何德何能呀，同埋你估我地學校係以前既聖所羅王咩，邊會有事發生要人睇住呀？」
晨哥：「唔怕一萬，最怕萬一啫，呢間學校對我黎講好重要，我唔想會有咩事。」
我：「明白…我會同Ellen佢地睇住架啦，你唔洗擔心咁多，放心去考DSE啦。」
晨哥：「好喇咁我交俾你架啦，話時話，再問你一次，黎咗呢間學校咁耐啦，覺得呢度點？」
我：「好好呀，雖然學校係細D，但學校既所有人都好好，氣氛又正，Sarah佢地都好鐘意呢度。」
「老實講呀，我完全無諗過佢地可以咁快就適應到，而家佢地係學校既朋友仲多過我，仲要個個都咁出名。」
晨哥：「又係喎可，Anna妹妹同Ellen妹妹佢地係學校而家都好出名下，真係叻。」
「有你同佢地，我諗都唔會有人敢亂黎既，好！我放心唒喇。好似交代身後事咁添。」
我：「你黎…就係想同我講呢D？」
晨哥：「唔…好似係得咁多喇。」
專登走黎就係同我講，叫我睇住間學校？
晨哥：「唔？做乜咁望住我？有野想講？講啦唔好收收埋埋。」
我：「係咩特別事既…我以為你專程黎搵我係有咩緊要事話我知添，呢d野其實係學校話我知咪得，唔洗專登走黎喎。」
晨哥：「咩呀，呢件事對我黎講不知幾重要，重要過股災呀我同你講。
」「你呀，你二家姐話得你岩架，你對每一件事既第一反應都係扯咗去錢財權鬥度，已經變成咗你既習慣同…潛意識？」
拉到去潛意識咁大件事？
我：「有無咁誇張呀晨哥，潛意識？」
晨哥：「屌，用字既野就唔需要咁執著啦，成日都在意呢d唔重要既野邊做到大事。」
我：「係係，我明你意思既，我都知道自己係好神經質，我有試過改架，不過可能仲要D時間咁囉。」
晨哥：「你知道你有呢個問題咁就最好啦，如果你可以克服到呢樣野呢，你等時肯定會好勁好勁。」
我：「會唔會呀，你誇張咗少少喎晨哥。」
晨哥：「我有無講錯，等第時就會知架啦。係咁先啦，我都差唔多要去搵佢地。」
晨哥講完就開始離開，向大門口既方向走去。
我：「啊…」
我忍唔住啊咗出聲，因為其實係我心入面仲有野想問佢。
晨哥：「嗯？你仲有野想講？」
我：「無…只係想知道點解你會咁緊張學校啫。你頭先仲話學校有無事重要過股災咁誇張…」
晨哥：「嗯，呢個的確係一個好好既問題，而且頭先個比喻係一D都唔誇張。」
「因為股災對我，對而家既我黎講根本唔係應該關心，注意既事，呢D野就留俾大人去煩啦。」
「就算我地屋企係好有錢，我地呢個年紀都唔需要去諗咁多呢D野，應該將身心都放係現實D，貼地D既野，例如學校，朋友之類。」
「而呢間學校令我識咗好多好好既朋友，令我睇到好多以前睇唔到既野，亦有好多好好既回憶係度。」
「所以比起股災，我更加緊張學校，因為兩者比較之下，學校更加貼身，你明唔明我講乜。」
我：「eh…應該明？
」晨哥：「哈哈你咁聰明，一定可以消化到我講既野既。」
「啊最後講多句啦，講埋我就真係要行喇，魯路修好憎人遲到。
」「唔好太否定以前既自己啦，咁做人好辛苦架。
」佢自己講完就走咗，都唔等我反應。
我只可以目送佢離開，因為我大腦仍然思考緊佢講既野。
不過，我雙眼仍然有反應，睇到當佢地出門口個下，有人同時係門口入黎。
個個就係二家姐。