「無啦啦多左幾個家姐同細妹 Season 2」: 喜歡
聽到佢講「鐘意過既男仔」呢幾個字，我成個人即刻緊張起黎，手亦不自覺用力，差d揸爆咗包朱奶。
我：「鐘意過既男仔？？？咩人黎架！！！
」Anna：「喂比個咪你講好唔好呀低能仔！！
」佢同我一樣激動，仲兜頭打咗我個頭一下。
Anna：「我想同你講…」
佢都未講到重點，鐘聲已經響起，我同佢不約而同咁望上去天花板。
我原本想叫佢快D講埋佢，點知佢已經揹袋起身，準備走人咁款。
Anna：「夠鐘上堂啦，有乜等一陣lunch time再講啦。」
我：「有咩唔好等lunch time啦，而家快d講埋佢唔好咩？又要等一個上晝。」
Anna：「呢D野唔係三言兩語可以咁快講清楚架，都唔差在個一個上晝啦，一陣lunch time先講，返去班房啦。」
佢講完就走入人羣，留低我一個同兩盒朱奶係度。
到底佢係想同我講乜呢…？唔會係想…唔會既唔會既，一定唔會既，佢頭先係話「鐘意過既男仔」吖嘛，即係話而家唔鐘意架啦，咁即係唔會有問題啦。
我不停咁同自己講，但仍然難以掩飾自己心入面既不安。
佢講咗少少又唔講埋落去，搞到人地唔知點好，真係吖。
不過佢人都走咗，我都無得再追問落去，唯有先返上班房上堂。
拜佢所賜，我上晝完全無心機上堂，阿希佢地傾個張埸地優先使用權最後傾咗賣$20定係$200我都唔清楚。
而家放小息，到底我係照原訂計劃，去搵晨哥好定係早D去搵Anna問清楚好，我已經唔知道應該點揀好。
算啦如果而家去搵Anna既話佢肯定都唔會講，要我等到lunch time，都係去搵晨哥先啦。
於是我就離開咗班房，上一層去搵晨哥。
今次好順利就俾我搵到佢，佢係班房，不過就同好多女女影緊相。
我無謂打擾人地雅興，所以我就企係外面等，但愈等愈覺得唔對路。
人無減少到，仲愈黎愈多都有既？仲開始排隊排到出班房同派籌都有既？
咁唔係好對路喎，咁搞法我小息完之前見唔見到晨哥架？
我忍唔住，走入去班房搵佢。
晨哥：「唷阿明，搵我有事呀？等我一陣呀。」
「唔好意思呀各位靚女，我朋友有事搵我，我諗今個小息同唔到你地影相留念喇，下次喇，如果拎咗籌既可以去搵魯路修，佢會幫你地mark返，下次有機會再影既時候就唔洗再排隊咁傻豬架啦~
」佢講完既一刻，我馬上就feel到有好多仇視既目光集中係我身上，好得人驚。
不過好彩既係佢即刻拉走我，等我唔洗俾呢d「光子力射線」射死。
佢帶咗我上空中花園，仲比我地見到lulu係度訓緊覺。
晨哥：「點呀，搵我咩事？」
之後我一五一十將我既請求話哂比佢知，佢聽完之後諗咗一陣。
晨哥：「唔…係有意思既，但呢方面我又唔係好擅長，不過我知阿偉同十四佢兩個識，我可以叫佢地教你幫你操既。
」你唔擅長？？你玩呀？？你唔好話你唔識字？
晨哥：「我安排下啦，如果無其他野既話我走喇，我仲要帶埋個隻野落去。
」我：「啊等陣，頭先個D女仔…你女朋友唔會嬲架咩？」
晨哥：「嗯？嬲乜
」我：「吓你頭先同咁多女仔影相喎…你女朋友仲要就係旁邊睇住…佢唔會嬲咩？」
晨哥：「哈哈，咁咋嘛有乜好嬲喎，正常社交黎啫，我又唔係鐘意個D女仔。」
「大家拍拖講個信字，佢夠會同其他男仔影相留念囉，唔通我又要嬲囉？」
「只要大家都知道自己心入面永遠有對方係度咪夠，唔通要對方為咗自己斷絕所有社交咩？郁d就為小小瑣碎事發脾氣，猜疑既話咪只會損害大家既關係。」
佢又講得真係好有道理，但係我個case好似同佢唔係好一樣…
晨哥：「嗯？你係咪有咩煩惱呀？苦口苦臉咁既。」
我：「咁如果…如果你女朋友同佢前度或者佢以前暗戀過既人一齊食飯既話…你又會點諗？」
晨哥：「哦~~原來今朝你同Anna妹妹係樓下傾既就係呢件事？佢同你講佢同以前暗戀過既人食飯？」
雖然我無話到呢個情況係我自己既情況，但晨哥完全睇穿哂，知道哂我講既就係自己既事。
佢都睇穿哂囉，無謂再隱瞞啦。
我：「係啊…佢仲講D唔講D，話lunch time先再講埋佢，搞到我而家個心好亂…」
晨哥：「哦，真係咁，唔洗擔心啦，會有咩事吖，你以為佢會因為咁同你講分手？」
我：「我就係怕會發展成咁呀…」
晨哥：「白癡，你對自己同Anna妹妹咁無信心都有既，Anna妹妹都話咗係同「鐘意過既男仔」既男仔食飯囉，即係而家已經唔鐘意啦。」
「佢而家鐘意既人係邊個唔通你唔知咩？如果佢係已經唔鐘意你，仲邊會同你哂咁多時間，直接就同你講分手啦。」
我：「咁點解…佢唔直接話無事？」
晨哥：「可能佢有其他野想同你講呢，我可以九成肯定佢唔會係同你攤牌，俾D信心自己，俾D信心Anna妹妹，同埋相信我。」
我：「好…」
晨哥：「不過我覺得身為男朋友既你一陣應該要同Anna道咗歉先。」
我：「道歉？點解呀？」
晨哥：「為你曾經懷疑過佢而道歉，我講過啦，情侶之間最重要係信任，你而家首先動搖咗呢份信任，你話係咪應該要道歉？」
我：「係既係既，我會同Anna道歉架啦。」
晨哥：「真乖，講起信任，我諗應該唔會有任何一對情侶既信任可以超越係個邊訓緊果個傻仔。」
「五年既誓約…我諗我都未必得，可能一星期就會約新女出街。但佢明知仲有其他人鐘意自己，都仲將自己封閉起黎，就係為咗等佢既人。」
「唔知有無回報既事，佢都仲堅持咗差唔多一年，真係好勁。」
「佢」指既，當然係lulu。
晨哥：「好喇時間差唔多，我要叫醒佢啦，你無乜野既可以走先。」
我：「嗯，唔該你呀晨哥，要你幫我咁多。」
晨哥：「呢D就小事啦，不過最後都係要睇你自己，俾D心機啦，同埋唔好下下有呢D事先識著緊自己女朋友，平時都多D著緊佢地啦。」
我：「知道喇，我會盡力，我都係緊張佢地，希望可以有能力保護佢地先拜託你個件事。」
晨哥：「識咁諗就好啦，你而家咁幾好吖，係差小小野啫，俾心機。」
雖然我唔知「差小小野」指既係咩，不過得到晨哥既表揚係幾開心既。
唔知係咪因為得到鼓勵，時間既流動好似加快咗，一轉眼就到lunch time。
我第一時間就去搵Anna，但Sarah佢地居然仲可以快過我到，真係不可思議。
大家咩都冇講，但都有個共識，就係先去食野既地方先。
大家都知道今日既重點唔係食D乜，所以都無點討論食乜，隨便搵咗間餐廳就算。
而家Sarah佢地係埋度，搞到成件事尷尬咗好多添…點開口道歉好呀…
唉唔理喇，死就死喇！！
我：「Sorry呀！
」Anna：「對唔住呀阿明…」
！？佢又講對唔住？
大家一齊講對唔住呢一下舉動嚇親在座既所有人，飲緊可樂既Ellen仲嗆到，要Ellie係咁拍佢佢先無事。
Anna：「阿明我有無聽錯…？你同我道歉？因乜事要同我講sorry？」
啊，俾佢搶先一步添。
我：「無…我覺得自己應該要為懷疑你而道個歉先啫。學Ellie之前講既咁，我應該信你多D先係。」
Anna：「懷疑我…你係指今朝我同你講個件事？」
我：「係呀，你今朝講到一半就走咗去，我咪係咁亂諗野…話時話，你又為乜同我道歉？你唔通真係…」
Anna：「傻架咩！梗係唔係你諗既咁啦！
」佢即刻變到好激動，企起身拍哂檯咁。
Sarah：「喂Anna..！人地望住啦，快D坐低先喇…！」
無錯，佢咁激動仲耍企咗起身，梗係引人注目啦。
佢好快就注意到四周既目光，大家都望住佢令佢馬上坐返低，仲打咗我一下。
Anna：「最衰都係你呀傻仔明！」
又關我事！？你自己激動咋喎！！
我：「係，係我唔好，咁你可以話我知你又為乜同我道歉未？」
Anna：「其實呢…我覺得自己尋晚就應該同你講清楚先，我應該話你知餐飯有佢份，但我無咁做，我覺得自己好似有心瞞你咁，個心好過意唔去。」
「當我知道佢會去既時候，我就應該即刻話你知，所以…Sorry…
」一講返正題，佢就收起佢激動既情緒，講野變到好細聲，就好似一個做錯事既小朋友。
我：「哦咁咋？唔緊要啦咁小事~你而家講返清楚咪可以。
」Anna：「你…真係唔介意？我上網睇呢d case九成男朋友都會嬲到爆架喎…
」我：「咁就算拍拖，我地都可以有自己正常既社交架嘛，同人食飯都唔係咩大事啫，我地講信任架嘛。」
將頭先晨哥同我講既野講返哂出黎添，真係好彩有去搵晨哥。
我講完之後大家都無出聲，只係靜靜地望住我，望到我開始尷尬。
我：「做乜全部人都望住我？我講咗奇怪野？」
Ellen：「無，只係無諗過呢D野會係你把口講出黎啫。」
Anna：「你好似突然成熟咗咁既，我仲以為你會好似今朝咁發癲添。」
Sarah：「你會唔會唔係阿明黎架，俾我睇下你有無戴面罩！
」Sarah伸隻手埋黎係咁搓我塊臉，搓到我口水都流埋先肯收手。
我：「咩叫發癲呀，我好正常，我就係我囉好無。話時話，個男仔點架？係咪無我咁靚仔，所以你唔心動呢~
」Anna：「唔係喎，岩岩相反，人地高大又靚仔，又charm，各方面都贏你九條街。」
Ellen：「嘩你講到個男仔咁好？有無圖呀？」
Ellen問完之後Anna即刻拎電話出黎比佢睇，睇到佢地幾個女仔嘩嘩聲。
我就梗係無睇啦，廢事俾佢地笑。
Sarah：「嘩個男仔咁靚仔Anna你都唔心動咁好野既？
」Anna：「唉無辦法啦，鬼叫我個心已經唔係自己度咩。」
「我個心早就已經俾個做咩都唔叻，成日做錯事既低能仔拎走咗啦，仲點可能對其他男仔心動。
」