「無啦啦多左幾個家姐同細妹 Season 2」: 憧憬

雖然我心入面係有疑問，不過我最後都無去問Anna，因為岩岩Ellie先話完大家之間應該要有信任，我仲邊好意思問Anna咁多野。

係啦，我都應該信下佢地，如果唔係訧講唔通同唔公平啦。

我地一齊經歷咗咁多野，一定唔會分開既，只要我做好自己應該要做既野。

講起應該要做既野…係喎都應該要出去跑步喇。

我馬上就付諸行動，起身離開飯檯，大家呢個時候仲回味緊頭先既飯後甜品。

大家姐：「阿明？你去邊呀？咁快就上房訓覺嗱？而家仲好早咋喎。」

我：「哦唔係呀，我想去換衫出去跑步咋。」

Sarah：「跑步？陸運會已經過咗喇喎，仲要去跑步既？

」

我：「咁又唔係一定要係因為有比賽先去跑步既，我想開始操返體能，叫做鍛鍊下咁。」

大家姐：「嘩咁你會唔會操到有六舊腹肌架，大家姐好想摸下呀~~

」

大家姐一邊講一邊走埋黎想抽我水，好彩我反應夠快，避開咗。

我：「咁我上去換衫先喇~~」

我一邊講一邊跑上樓梯，免得大家姐又再發動下一輪功勢。

之後，我一個人走到去條街度，望住條比街燈照住，昏黃色既路。

唔知如果而家打電話比佢，問佢出唔出黎跑步既話佢會唔會應承呢…

算喇都係唔好喇，佢今晚約咗人食飯，可能仲未返到屋企，就算返咗屋企，都俾佢早d沖涼休息啦，聽日仲要返學。

講起返學，聽日返學仲有好多野做，又要同阿希佢地傾野，又要去拜託晨哥…

屌，諗咁多做乜，跑完個步先再諗呢D野啦，而家咁樣自己一個企係條街on99咁做啫。

可能因為始終太耐無練體能，一時間要追返進度真係有D難度，我跑咗只係以前平時跑開既－半左右已經喘哂氣，剩低既都要減慢節奏去完成。

每日咁操既話，我諗好快就可以操返fit既。

係回程既途中，我經過Anna既屋企，對腳不自覺就停咗落黎，視線亦好自然咁望住間屋。

間屋無開燈，係因為入面既人訓哂定係因為出哂去仲未返？答案我唔知。

我拎出電話，打開同Anna既Whatapps對話，見到佢最後上線係一個鐘前，而且佢都無係我地個Group入面講野。

點解我會有咁既舉動？我自己都唔知，可能我始終都比個份奇怪既感覺影響緊掛。

我之後無再係佢屋企門口逗留，開始慢慢行返自己屋企。

一入門口，我就發現屋入面既燈光較暗咗，睇黎大家都已經去哂休息。

Yui：「阿明…？你返黎嗱？

」

嘩原來Yui坐咗係門口旁邊，嚇親我添。

我：「Yui…你做乜係度訓覺呀？返房訓吖嘛。仲有你攬住D乜呀？」

Yui：「毛巾同水…想等你返黎可以即刻有得飲水同抹汗，點知等下等下就訓著咗…

」

我：「哈哈，你真係細心，唔該你呀，D野我就收咗佢啦，你快d返房訓啦，你睇下你隻眼，好似灌咗鉛咁就快合埋啦。

」

Yui：「嗯…咁早抖啦阿明…」

佢講完就慢慢起身，開始行上房，不過佢行到跌跌碰碰，我睇唔過眼，出手佢上去。

安頓好佢之後，我就望住佢為我準備既水同毛巾，心突然有種溫暖湧上黎。

呢D…都係我憧憬既生活既一部分，雖然好小事，但就係我想要既野。

第日，我見到Anna喇，平時咁，係學校門口見到。

原本我想問Anna尋晚同邊個食飯，不過我都未開口，Ellen已經幫我問咗。

Anna：「無，同D小學同學食飯敘舊啫。」

哦…原來係小學同學，唉我真係吖，諗咁多。

一聽到係小學同學，我當堂鬆一口氣。

Anna：「係呢阿明，我有D野想同你講，可唔可以行埋一邊講？」

佢突然咁講令大家都好愕然，Sarah仲第一個上前問Anna係咪發生咩事，因為Anna神情比較凝重。

Anna：「無事，唔關你地事既，行啦阿明，唔快d既話就會夠鐘上堂。」

佢咁講到，唯有跟佢行啦。

我打手勢叫Sarah佢地幾個上班房先，自己就跟住Anna行去小食部個邊坐低。

有野想同我講…？會係咩事呢？

坐低之後Anna並未即刻同我講野，而係放低袋走咗去買兩包朱奶返黎。

Anna：「嗱，一包比你既。」

我：「哦唔該…」

突然間，我覺得我同佢之間既距離遠咗好多，好似大家唔係男女朋友關係咁。

所有野都係一瞬間，兩句對話之間就俾咗咁既感覺我。

好似有層睇唔到既隔膜係我地之間咁。

不過，我既感覺成日都錯架啦，學二家姐話齋，我成日都諗錯野，今次一定都係咁。

Anna：「你…有無咩野想問我？」

佢咁問我，搞到我差D噴咗d朱奶出黎。

我：「吓唔係你話有野想同我講架咩，點解你而家掉返轉頭問我有無野想問你都有既。」

Anna：「哦無…見你尋晚企係我屋企門口，好似想搵我咁，所以今日見到你咪問返你係咪有野搵我先囉。」

原來尋晚佢見到我！？

我：「尋晚你見到我咩？我仲以為你一係訓咗，一係未返添。」

Anna：「尋晚咁岩行緊返去，見到你傻傻更更望住我間屋，我仲以為你會打比我，等我仲企埋一邊等你電話添。」

我：「哦…尋晚我去咗跑步，回程經過你屋企，諗起你出咗去啫。」

Anna：「哦…咁…你想唔想知我尋晚同咩人食飯？」

我：「咩呀，你唔係話咗同d小學同學食咩？」

佢個樣尷尷尬尬，同平時好有威嚴既佢有好大既反差。

不過多得佢呢d尷尬，我先覺得頭先個份隔膜無咗，頭先個種feel直頭好似係想講分手咁。

Anna：「係喎可，都岩既咁講，但又岩唔哂，點講先好呢…」

我：「唔似你喎，你係我既Anna哥，出名霸氣架嘛，有咩咪講。