「無啦啦多左幾個家姐同細妹 Season 2」: 感謝
嘩認真呢？一蚊租一個單位？？仲要係租一年？？？
在場對於呢個租金感到驚訝既人，就只有我同Kathy。
得我同佢嚇到眼都突埋，其他人全部都不以為然，搞到好似我地先係異類，一蚊一年完全無問題咁。
Kathy：「一蚊一年…？你係咪一時口快…？定係我聽錯？」
阿雪：「唔係呀，你無聽錯，我都無講錯，我地一早已經決定咗無論你最後揀邊間都好，都係會用一蚊租比你架~」
我：「嘩咁好都有既，不如都用一蚊租一間比我喇？」
Sarah：「乜你同我地一齊住好唔開心咩？要搬出去住？」
我：「啊，梗係唔係啦，我講下笑啫，同你地一齊住好開心，我一D都唔想搬走！」
屌，差D又踩地雷，好彩兜得快，唔係就拜拜！
就係我因為呢件事作為契機，同Sarah佢地傾野既時候，Kathy就突然開聲。
Kathy：「咁無問題咩…咁平租比我？其實可以收返我正常既租金架喎…我可以出去做兼職賺錢交租比你架。」
阿雪：「咁呀…好呀咁收埋你每個月萬二蚊租，每個月一號交租，遲一日交就罰款一萬，好無？」
阿雪咁講完之後原本吵吵鬧鬧既Sarah佢地都即刻靜咗，全部人都望住阿雪。
大家都好似係度等緊阿雪再講落去，但佢無，只係繼續保持住佢個個開朗既笑容，望住Kathy。
佢都係度等緊Kathy。
萬二蚊一個月租對於一個無屋企人係身邊既普通中學生黎講又真係太高既，Kathy會點做呢？佢頭先先叫阿雪加返租…
Kathy：「我明白啦，我會盡力準時交租。」
Kathy一應承咗阿雪既要求之後Sarah，Anna同Ellen就馬上行埋去佢度，叫佢唔洗咁做都得，無謂辛苦自己。
見到情況變成咁，我就再望咗次阿雪，見到佢笑住咁同諾儀對望，但諾儀就一臉無奈咁。
於是我慢慢行去一直係二家姐旁邊既Ellie，問下佢有乜睇法，因為Ellie一直都係頭腦最清醒，睇野最透徹既人。
Ellie：「阿雪都係講笑啫，阿明你應該都睇得出架。
」我：「係…係而家Kathy應承咗，我訧唔知事態會發展成點喇。」
Ellie：「唔~咁就要睇阿雪喇。
」阿雪：「唉呀算啦唔玩啦，就算你肯比我同愛麗絲都唔同收架，唔好為個少少錢辛苦自己啦。」
話口未完，阿雪已經忍唔住率先開聲。
阿雪：「倒不如全心全意去讀書啦你，呀！就當間屋係你既獎學金！一於咁話啦！
」「唔好講咁多啦，就咁決定，唉呀我地都係快D走喇諾儀，我真係唔識處理呢D野。」
阿雪一邊講一邊拖住諾儀，轉身想離開呢度，但行咗兩步又比Kathy叫住咗。
Kathy：「真係好多謝你地，不過點解你地要對我咁好…明明我地今日先係第一次正式見面…
」阿雪：「要多謝既，就多謝阿明啦，因為佢我地先會幫你。」
「不過，原來做呢D野既感覺都幾好，我都多謝你俾呢個機會我啊哈哈。
」佢講完就同諾儀走咗。
但係…點解關我事？
佢兩個走咗之後，Sarah佢地都同Kathy講真係好喇之類既說話，仲不停勸Kathy叫佢唔好去做parttime辛苦自己，話有乜需要既可以同佢地講，佢地一定會照顧佢。
呢D說話由我講既話好似會好奇怪，而且可能又會引起不必要既誤會，所以我決定咩都唔講，同Ellie坐係二家姐旁邊等佢地講完。
不過二家姐好似就對之後既事無乜興趣，收起Macbook，離開咗飯廳。
Ellie：「二家姐佢…係咪有咩心事？頭先好似無出過聲，只係係一邊㩒電腦。」
我：「或者係掛…但二家姐有時唔係都會咁架咩？又唔係無試過完全唔出聲咁企or坐係一邊。」
Ellie：「係…不過…」
Ellen：「喂係喎陳煒明！唔係Kathy提一提我都差D無咗回事添！點解阿雪會話因為你先會幫Kathy！！明明係我同Ellie拜託佢地既！」
「你係咪同佢有乜不可告人既關係？！」
就係Ellie想繼續講落去既時候，Ellen嬲爆爆咁走埋黎，仲捉我不停搖。
我差D就比佢搖到將前日晚餐都嘔埋出黎，好彩Sarah同Ellie出手制止，如果唔係就肯定嘔到一地都係。
我：「咩不可告人啫…我其實同佢都唔熟，我夠想知點解佢話係因為我咯…」
「如果我係同佢有乜不可告人既關係既話，我就會知道佢地今日會黎啦，頭先仲邊洗係咁問地到底係邊個會黎啦。」
道理總係可以說服人，Ellen聽到之後都開始諗返件事，終於肯放開我。
Ellen：「咁點解佢會話係因為你既？」
我：「我頭先咪話咗我都想知囉…可能佢見我靚仔，所以就幫身為我女朋友既你地，想賣個人情，想我第時以身相許報答佢掛？」
Ellen「唔~~會唔會因為阿明係晨哥既朋友，阿雪又好尊敬晨哥，關係搭上搭之下所以就幫我地呢？」
佢完全無聽我講野，自己係度同Sarah討論原因。
Ellie：「或者係因為阿明以前係七星個陣阿雪已經當咗阿明係朋友，所以當我地去搵佢幫手既時候，佢出於幫朋友既心態就幫我地囉。」
「家姐你俾D信心阿明啦，成日少少事就懷疑疑阿明同其他女仔有野，咁邊得架。」
講得好呀Ellie，幫我出返口氣。
不過講起成日懷疑我…仲有一個人又係成日懷疑我，但今日居然完全無因為呢件事出聲…
我望過去Anna個邊，見到佢掛住睇電話，好似完全唔在乎呢邊發生既事咁。
就同頭先既二家姐一樣。
我：「Anna？」
Anna：「嗯？你地講完嗱？
」我：「啊唔係…只係見你好似有d奇怪啫係咁望住個電話，係咪有乜事？」
Anna：「無呀，咩事都無，唔洗擔心。
」我：「啊不如…」
Ellen：「啊走喇走喇~返去諗下Form 6 Last Day點歡送班師兄師姐，仲要諗下Kathy搬屋需要D乜，好多野做呀！」
睇黎Ellen終於比Ellie訓示完，仲打斷咗我原本想約Anna既念頭。
原本想話約Anna去練跑，不過唔緊要啦，幾時約都得既。
Anna：「啊咁我都返去啦，今晚約咗人食飯。」
約咗人？好少聽Anna自己約人食飯喎。
當我想問Anna約咗邊個既時候已經太遲，佢地已經出咗門口。
點解會有種奇怪既感覺既？