「無啦啦多左幾個家姐同細妹 Season 2」: 身邊
離開咗個度之後，我帶住佢地去到附近既公園坐低。
我而家成個人都極度混亂，一方面仲係好嬲，而另一方面就好後悔。
後悔自己點解要帶佢地上去，點解忍唔住氣出手打人。
而家咁搞到佢有充分理由可以報警告我，唉…
見到佢係屋入面我就唔應該入去喇，一時比以前既事沖昏咗頭腦添…
Yui：「阿明…」
啊…掛住諗自己野，唔記得咗佢地添。
我深呼吸一口氣，努力擠出一個笑容面對佢地。
我：「我以前就係係一個咁既屋企生活架啦。地方好細，人又多又衰。」
Sarah：「阿明你頭先成個人都唔同哂啊知唔知…」
我：「係啊…見到佢就突然諗返起以前所有唔開心既野，好想證明比個衰人睇我而家過得比佢地好十萬倍…所以先失哂控…」
之後我就將自己以前既事完完整整講一次俾佢地聽，聽到佢地個個都不停點頭。
Ellie：「阿明，頭先個個人話佢爸爸差d就…你媽咪既事…係真既？」
我：「啊…係真架，個陣好彩我阻止得切咋，如果唔係就…唉，我真係唔應該帶你地上去，就咁同你地係周圍行下咪算，而家搞成咁…」
Anna：「而家搞成點？」
我：「吓…走上去人地屋企…仲打咗人地一餐…都唔知佢會唔會報警。」
Ellen：「阿明你咁做我覺得可以理解喎，如果有人咁侮辱我媽咪，我肯定會大巴大巴打落去佢塊臉度，再剃哂佢d眉毛。」
我知道Ellen係想氹我，但仍然無助我減低自己內心既矛盾。
我：「唉，大好既約會就咁比我破壞哂啦，真係無用，仲好小學雞。」
Ellie：「其實無破壞到呀，仲好好咁達成你既目標添。」
我：「Ellie…？」
Ellie：「你唔記得咗你話過今日係想比我地睇到你係未遇到我地之前既生活咩？」
我：「啊…我的確有咁講過。」
Ellie：「你帶咗我地幾乎去哂成個邨，俾我地睇到好多得意既野。」
「如果你唔帶我地上去既話，或者我會以為阿明你以前係過得好開心，但係當你帶咗我地上去，見到佢，聽到你同佢講既野，我先知道原來你以前既生活係咁難過。」
「所以我覺得你帶我地上去唔單只係岩，仲可以話係必要，因為咁我先知道阿明你真正既過去。」
Anna：「Ellie講得無錯，如果你唔帶我上去，我真係唔會知你同Auntie以前係過得咁辛苦。」
我：「係咩…不過我頭先同佢曬命好似好小學雞咁？」
Sarah：「你想話比佢知自己而家過得好過佢都係人之常情啫，話哂你以前因為佢地受過咁多苦，炫耀一下都唔過份呀，雖然講野既方式真係有少少小學雞既哈哈。」
聽到佢地個個都咁講，我個心總算都安樂返少少。
Yui：「阿明…你以後仲會唔會返黎呢度？」
我：「唔會，絕對唔會，我放低鎖匙都係因為我決定咗以後都唔會再返黎，做乜會咁問。」
Yui：「無，聽到你咁講我就放心啦…」
Anna：「喂，傻仔明。」
Anna突然開聲叫我，將我既注意力轉咗去佢個邊。
但當我望過去個陣，佢一下就打咗落我個頭度。
不過同以前既比，呢下細力好多，直頭都唔痛既。
Anna：「唔好船頭驚鬼 船尾驚賊啦，難得頭先你咁型，而家驚咁多野你話似乜。」
我：「你話…我型？」
Anna：「…咁你頭先出手個下係幾型既…起碼無俾人打返轉頭先。同埋如果你頭先比人講到咁都唔做返D野既話，真係唔係男人啦。雖然郁手唔係咁好，不過對付衰人就算啦。」
「就算有乜事都好啦，而家你唔再係得Auntie一個架啦，你有我地。」
屌，點解我會感動架。
我：「雖然係發生咗D不愉快既插曲，我又做咗D蠢事，你地仍然滿意今日嗎？」
Sarah：「滿意呀，今日都睇咗好多得意野，整體黎講都好好呀~」
Ellen：「好好呀，我比10分~」
Anna：「算係咁啦，起碼無悶親本小姐先。」
Yui：「好好呀，今日令我可以了解更多關於阿明既事。」
Ellie：「只要係你安排既，我都滿意。」
我：「呼…咁就好喇，我安排既行程去到呢度咋，之後你地想去邊？」
我講完之後大家就你眼望我眼，直至Sarah拎出電話㩒同忽然大叫。
我：「咩事呀？」
Sarah：「二家姐差唔多夠鐘返到香港啦！我地仲去唔去接機好？」
我地又互望多次，等人做決定。
我：「去啦。」
就係咁，我地就出發去機場，今次坐巴士，當然係無司機車咁快，用咗差唔多九個字先去到機場。
去到抵港大堂，我地幾個即刻去睇二家姐班機到未，發現飛機已經到咗香港，但二家姐應該未咁快出到黎，所以我地金精火眼咁望住兩個mon，睇下二家姐會係邊一邊出黎。
過咗無耐，我地就見到佢既身影。
佢仲同Uncle仲有我阿媽一齊行出黎。
Sarah：「咦點解二家姐會同Daddy Auntie一齊出黎既？」
Yui：「佢地應該係去唔同地方架喎…」
佢兩個講哂我想問既野，我記憶中老母佢地係去巴黎，而二家姐佢就係去東京，又會可以一齊出黎既。
大家姐：「咦你地幾個都黎咗啊？咪叫咗你地唔洗趕黎安心去玩架嘛，點呀拍拖開心嘛？」
大家姐拖住羽晨出現係我地面前，佢兩個對住我地出現係呢度似乎相當意外。
我：「eh…我地…」
都唔知點同大家姐講好，真係可以用一言難盡去形容而家我想講既野。
Ellen：「梗係開心啦，阿明帶咗我地去佢以前住個頭，睇咗好多得意野，阿明仲請咗我地食…Ellie呀，個條好似長版芝士腸既野叫咩話？」
Ellie：「唧唧冰呀家姐。」
Ellen：「呀係！唧唧冰！勁好食！」
大家姐：「係呀？咁就好喇，咁下次到我喇，阿明下次都要帶我去呀~我又要食唧唧冰~~」
我：「啊…好，下次喇。」
羽晨：「啊，二家姐！~」
大家
就係我地討論緊我地今日既行程既時候，羽晨就突然鬆開大家姐隻手，跑咗去。
而佢跑去既方向，就係二家姐既方向。原來二家姐佢地三個已經差唔多行到埋黎。
二家姐第一時間抱住羽晨，而Sarah佢地亦第一時間圍上去，得我同大家姐企係一邊睇住。
大家姐：「真係好喇。」
我：「唔？大家姐？」
大家姐：「唔？做咩呀阿明？」
我：「無，你頭先唔係講咩真係好喇咩？」
大家姐：「哈哈有咩，你係咪聴錯呀？唔好講咁多喇，我地都過去啦，好野阿May終於返黎我身邊啦~」
大家姐講完就無再理我，走埋去大家個邊。
返黎身邊…啊？都係既，而家…總算一家人齊齊整整？