「無啦啦多左幾個家姐同細妹 Season 2」: 瞬間
Sarah：「嘩Anna咁快已經拎到四個金牌嗱？真係厲害喎~~全埸總冠軍肯定都唔會有問題啦~」
Ellie：「係呢~~至少比起某人更易喇。」
Sarah：「係囉係囉，唔知佢會點做呢~會唔會最後要喊苦喊…」
我：「喂，唔好借D依喎，我會嬲架真係。」
Sarah：「哈哈，好可怕哦~Ellie我地都係快D走啦~」
Ellie：「咁我都係過去家姐個邊睇下有無乜野可以幫手。」
呢兩個人係我面前係咁傾計，把口講到好似驚我嬲，但事實上佢地根本一D都唔care。
因為佢地知道我根本嬲唔到佢地。
之後Ellie就真係走咗過去Ellen個邊幫手，至於Sarah就繼續係我旁邊，同我一齊係跑道旁邊睇人比賽。
不過其實都已經無比賽，上午既賽程去到學會接力就已經結束，大家而家都係圍住E神轉，不論學生定老師都係，大家都為E神而著迷同瘋狂。
所以即使已經無比賽既我同Sarah繼續留係度都無人理。
而我呢，就繼續悶悶不樂。
見到Anna已經有四個金牌之後，唔知點解我就唔係咁開心，頭先贏個種興奮熱情好似一下子就比人淋熄咗咁。
突然又覺得自己好無用，春袋都就快摙爆，仲要同人組隊先拎到一塊金牌，Anna一個人淡淡定就輕鬆拎四塊，高下立見啦係咪先。
Sarah：「做乜呀？真係因為Anna拎到四個金牌唔開心？」
就係我陷入自責羞愧既循環既時候，Sarah用佢個種開朗既語氣拉返我出黎。
我：「唔知呢…可能真係都未定，不過我真係恭喜佢既，拎到四面金牌。
」Sarah：「傻既，你擺明就係唔開心啦~~唔洗扮喎~~黎等三家姐攬下你~
」佢一邊講一邊攬住我，完全唔理周圍其實有好多人。
我：「喂唔好咁啦Sarah…好多人望住架…」
Sarah：「有乜所謂啫反正大家都知道我地係情侶既。
」我：「不過..你都岩既有乜所謂吖。」
我諗咗一下，之後就放棄思考，同佢攬埋一舊。
呢個擁抱黎得好及時，緊緊既擁抱將大部分負能量都蒸發走。
真係想永遠抱住佢。
Sarah：「萬一，萬一啫，萬一你拎唔到全場總冠軍既話，你會點做去氹返Anna呀？」
點解又會返返呢個話題架…難得鬆一口氣…不過都岩既，都要諗下架啦，因為都無乜機會拎到全場總冠軍。
我：「我諗…我會比哂全部牌比佢，再用我既誠意打動佢掛…
」Sarah：「誠意呀哈哈？岩既阿明你最多就係誠意~
」我：「點解我硬係覺得你係串…」
「哇你兩位眾目睽睽下咁親熱叫我呢D單身狗情何堪呀。
」阿惠把聲？
我同Sarah聽到阿惠把聲之後都即時放開對方，一齊望向把聲傳黎既方向，果然見到阿惠成個人企係度。
佢仲好自然咁向我地揮手，好似當正自己係呢度既學生咁。
我：「點解你會係度架？」
阿惠：「surprise~？驚唔驚喜？意唔意外？」
我：「好驚喜好意外呀，你走黎呢度做咩呀？唔洗返學咩你？」
阿惠：「學校個邊既野交咗比Ashe佢地處理，有得睇大佬明既英姿我梗係要黎吖，不惜一切代價都要啦係咪先。」
「聽講你仲會同晨哥大戰九百個回合，我買定爆谷睇表演架啦，有無咩靚位安排比我睇戲？」
我：「你呀…學生會會長唔可以咁架你知唔知？」
Sarah：「我唔覺得阿明你有資格話人地點做學生會會長囉~」
Sarah一講完就同阿惠一齊對住我大笑，笑到其他人都開始望住我地。
我：「得喇夠喇，我知我唔識做學生會會長喇得未？不過我估你黎都唔會係睇我比賽架啦，係想睇Kathy咋？」
我一講完阿惠就即刻收聲，表情仲變到好尷尬，完完全全俾我講中咗死穴咁款。
阿惠：「哈哈哈哈…喂我有D肚餓呀，你地幾時放lunch呀？一齊食吖。」
Sarah：「我諗都差唔多喇，訓導主任佢都已經走咗出跑道囉。」
阿惠：「咁不如我去攞位先囉？一陣見喇我地。」
咁就俾佢搵到位甩身。
就如Sarah所料過咗無耐訓導主任就宣布放lunch，我就即刻去搵其他人，但 Ellen同Yui就話唔得閒，話學生會耍要同E神仲有校長佢地食。
結果就得我，Sarah，Ellie仲有由Sarah專登幫我請黎既Anna四個人。
不過，阿惠個邊都有驚喜比到我。
我地四個去到餐廳既時候，居然見到Kathy已經坐係佢隔離。Anna：「阿惠個衰仔…借約我地食飯過橋黎黎溝女？」
Sarah：「唔係好事咩如果佢地兩個可以一齊。」
Anna：「你又岩，咁算啦做下媒人又唔會小忽肉既。」
Ellie：「咁一陣入去就記住唔好亂講野啦，知唔知呀阿明？」
我：「吓原來係話緊我？我唔會亂講野囉好無？」
Anna：「入去啦仲講，係度開場城市論壇比你好無？」
駛唔駛呀...
Anna都開到口講到咁，大家都唔再多口，直接入去搵佢地。
阿惠同Kathy見到我地黎咗之後都無表現出尷尬，同頭先完全唔同。
大家坐低叫完野食之後就開始談笑風生，Anna就講好多佢比賽既野，拎黎同以前比較，而Sarah就阿惠學生會既人最近點。
阿惠當然有一一回答，仲有問返Kathy覺得接力好唔好玩，Kathy就話好好玩，對住阿惠笑得好開心。
而我做緊咩？我咪坐係一邊陪笑囉。佢地都唔理我，提都唔提起我。
Sarah：「咦大家姐岩岩wts我話我知佢地而家岩岩出門口，黎緊呢邊喎。」
阿惠：「咦你地家姐黎緊？點解既？」
Sarah：「無，同你一樣想睇阿明既英姿囉~
」Anna：「真係可以睇到就好囉呵呵~
」阿惠：「咪咁啦Anna哥，我地既變革者阿明哥一定可以做場好戲比我地睇既，你話係咪？」
Anna：「話咗唔好叫我Anna哥！！
」阿惠又犯咗禁忌，硬食咗Anna一拳，Kathy見到嚇到震咗一下，好愕然咁望住Anna，係阿惠話咁好正常佢先收返起個表情。
Anna：「不過虧你仲記得變革者呢個詞語喎，個陣我地笑咗幾耐？
」阿惠：「哈哈，周不時都會拎返出黎笑架啦，話咁快就一年囉。」
Ellie：「而家你咪做咗新既變革者囉。」
阿惠：「哈哈我點及阿明吖，好多野都係因為有你地做落我先做得順利既。」
我：「真係咩？聽講你做咗學生會會長之後好多女仔倒追你喎~仲話做得唔及我？哇！
」我之所以突然哇一聲，係因為Sarah突然用力搣咗我大脾一下，仲用個好惡，叫人收聲既眼神望住我。
雖然唔知自己衰乜，但我都係乖乖收聲。
之後我地就返去運動場，係門口仲撞到大家姐同二家姐，大家姐一見到我就衝埋黎攬住我，派哂波餅。
大家姐：「阿明~~！大家姐黎同你打氣喇！~開唔開心呀？
」我：「開…開心..
」身邊既人見到佢咁樣請我食波餅，都用個好愕然既眼神望住我地。
咁岩係呢個時候，晨哥就出現係我地面前，大家姐就放開我，改為搭住我膊頭。
大家姐：「晨仔，我細佬一陣就會贏你架啦~
」晨哥：「可以呀，我都會用盡我既全力去跑，放馬過黎。
」講完佢就同其他人一齊入咗運動場。
大家姐：「咁得戚都有既，阿明！要贏呀知唔知！剝佢栅牙！最多贏到佢大家姐帶你去食好野！
」我：「知喇大家姐，我會盡力架啦…所以…唔好再搖我啦好嘛我好暈呀…
」大家姐：「oops sorry~~錫哂你呀~~
」我都想贏佢，我個身體都做好準搏到盡，問題係…
400米既決賽，居然唔見佢。
決賽名單上有佢，甚至寫住佢就係我隔離條賽道，但就係唔見佢出現。
工作人員打鑼打鼓咁搵佢，其他人都討論緊佢點解唔出現，直至到最後召集完大家都仲討論緊。
不過，佢都係唔見人，最後得七個人跑。
雖然佢無參加到，但我都係落足一百二十分既力去跑，事關甲組既Form 6都唔惹少，絕對唔可以輕敵。
跑到最後100米我都仲同兩位師兄差唔多身位，唯有合埋眼一下爆埋過去。
最後，我贏咗，聽講係贏半個身位。
就係我行埋一邊回氣既時候，大家姐唔知係邊度撲出黎攬住我，二家姐就企係佢後面。
大家姐：「阿明你好叻仔呀~~！跑得咁快都有既你~」
我：「多謝大家姐，不過晨哥無參加到…所以我都係贏唔到佢。」
大家姐：「唔緊要喎，你仲有其他項目架嘛，一定有機會贏架喎~唔好咁在意~而家就先去休息一下，備戰下一場！」
我：「知道喇大家姐，咁我而家就過去跳高個邊喇..你地都唔好周圍走喇，會俾到麻煩人地架。」
大家姐：「哈哈會咩，我見頭先好多人搵我地影相搞到我以為我地好受歡迎添，好喇聽你話喇~」
好多人搵你地影相係因為…唉唔講喇。
之後我就去咗跳高個邊，打算搵下晨哥既足跡。
但同樣地，佢都係無係呢邊出現。
正當我諗緊佢會唔會出咗咩事既時候，突然響起一段中央廣播。
「中六4x100班際接力即將開始，請無關人士離開跑道。」
之後就傳黎不亞於E神出場個陣既拍手同歡呼聲。
「啊我都想睇晨哥跑班接呀，最後一次啦已經。」
「佢上年跑真係快過Flash呀，痴撚線架。」
佢…去咗跑班接？
聽到身邊D人咁樣講，我忍不住好奇行咗出去賽道旁邊望下，睇下可唔可以搵到晨哥。
神奇地，我好快就係好遠見到佢，佢係最後一棒，正在係度熱身。
全場總冠軍唔會計班際接力架喎…點解佢要放棄400米同跳高？
唔通佢係有心比我贏？唔係，佢唔會係D咁既人。
點都好，我都係專心係而家呢場比賽先，最多一陣先問佢原因。
決定好之後我就背住一遍掌聲，行返去跳我既高。
可惜既係，跳高並唔係我既專長項目，我平時亦無乜點練，最後搏到盡都只係得個銀牌。
拎完牌既時，中六既班際接力早就已經結束，但D人仍然討論緊場比賽，話晨哥跑得有幾快。
的確，佢跑得快都唔係咩新鮮事，我都唔意外。
不過真係無諗過100米決賽會放係最後，當係壓軸比賽？
而家我有一金，三塊銀牌，而佢就至少有兩金，即係話點都要贏到呢場100米，我先有機會全場總冠軍？
唉一諗呢D野個頭就好鬼死痛，都係唔好諗咁多，專心跑好過啦。
就係咁，我傻下傻下走到去100米召集處熱身。
「乞痴！」
做乜鬼突然打乞痴，肯定有人講緊我壞話。
晨：「唷，阿明。」
晨哥幾時係度架！？明明佢頭先都唔係度架！！
我：「晨哥。」
冷靜D，輸人都唔可以輸陣。
晨哥：「終於黎到最後一場比賽喇，估唔到100米決賽會放係最後吖可？」
我：「係呀，不過點解你頭先400米同跳高都唔黎？」
晨哥：「啊…我去咗準備跑班接吖嘛，所以咪無去到，D比賽時間撞咗真係麻煩~」
我：「但係全場總冠軍唔會計班際接力架喎…點解你唔搵其他人幫你跑？」
晨哥：「少一兩塊牌又有乜所謂，我只係做自己想做既野，想幫我個班贏啫。」
我：「但你咁咪有可能會無咗全場總冠軍囉？你報哂所有項目唔係都係想咁咩？」
晨：「啊…雖然由我講好似唔係好岩，不過有時又唔可以只係掛住一兩場勝負既，人生有更多更重要既野既。」
「而且我而家都有五塊金牌啦，全場總冠軍應該無乜問題既~你不如擔心下自己點同Anna妹妹交代好過啦~
」五塊！？WTF？？？
晨：「不過最後既比賽居然係半分鐘都無就會完，真係唔夠過癮呢~~
」「我中學生涯最後一場比賽啦咁就，陪我好好咁跑啦阿明。
」無錯，最後既勝負一瞬間就會結束。
所以，一秒都唔可以放鬆。