「無啦啦多左幾個家姐同細妹 Season 2」: 金牌

得咗…意思即係…我地贏咗？

我捉住阿希係咪搖佢，問佢我地到底係咪贏咗，但條仆街又唔答我，一味係度傻笑同喊，真係想一拳打落去。

E神見到我咁激動就拍拍我膊頭，叫我冷靜D，仲話我地真係贏咗，恭喜我地。

係E神口中聽到我地真係贏咗真係特別令人興奮，我忍唔住即刻當場嗌咗出黎。

講咗咁耐，大家叫做努力咗咁耐，緊張咗咁耐，而家得到呢個結果，都咪話唔令人激動，叫人點平靜到落黎。

呢個時候，黑仔同Kathy都行到埋黎，大家都即刻攬埋一舊慶祝，沐浴於一片掌聲之下。

阿希條友而家喊到口水鼻都係度狂流，好核突但呢一刻大家都唔介意，只係掛住慶祝。

黑仔：「得咗喇我地！！贏咗喇！！頭先見到空手道條友差D追到阿希，我個心真係離一離！！

」

阿希：「你估得你係呀？我…」

個我字之後既說話我一個字都聽唔到，因為佢講到一pat野咁。

不過所有野都唔緊要，我地贏咗，咁就已經足夠抵哂所有野啦係咪先。

00入面俄羅斯荒熊講既「勝利既美酒」，我諗我總算體會到。

「勝利既美酒」的確係會令人一試難忘。

頒獎儀式隨即就係賽道上舉行，仲要係E神做我地既頒獎嘉賓。

可以由佢手上得到呢面金牌，真係可以話係另一種獎勵。

E神仲同我地講咗唔少鼓勵讚賞既說話，話我地做得好好，係一個好好既團隊，大家各自都表現得非常出色，交棒又好流𣈱之類。

大家聽完佢咁讚之後都好開心，拎住頸上既金牌望住大家係度笑。

正當我地想從頒獎台度落黎既時候，司儀卻叫我地留步。

「以下將會由學生會主席頒發學會接力既特別獎勵。」

Kathy：「特別獎勵？原來有特別獎勵架？

」

阿希：「eh…我記得係話有既，但係咩黎…好似係…

」

我：「吓，你唔記得咗？你之前開口埋口都話要個場地優先使用權架嘛？你而家居然同我講你唔記得咗？

」

阿希：「係喎可，哈哈贏咗之後太開心，個腦一片空白咪一時唔記得咗囉。

」

黑仔：「而家你就諗下呢個場地優先使用權應該賣幾錢仲好啦。

」

阿希：「well，我諗…」

阿希未講完，Ellen就從掌聲之中出場，佢仲好似 TVB D節目嘉賓出場個陣咁向大家揮手，氣勢好勁。

佢走到我地面前個陣先同仲係度既E神打招呼並握手，之後先輪到我地。

Ellen：「恭喜您地呀，日本文化協會，呢度係你地應得既特別獎勵。

」

Ellen講完就交咗一個信封比阿希，之後就離開，走既時候佢仲笑笑口咁對我眨咗下眼。

阿希急不及待咁打開佢，一打開就見到一張紙寫住場地優先使用權，仲有學生會印章同Ellen簽名。

但入面唔只呢張紙。我地四個都發現到呢件事，大家對於收係張紙後面既野都好好奇，阿希仲即刻拎開張紙，睇下入面仲有乜。

結果係四張E神演唱會飛，仲有一張memo紙痴係上面，寫住「唔好話比人知XD」。

阿希：「嘩E神演唱會飛…」

唔只係阿希，我地三個見到張飛都傻咗。邊會有人諗到獎品會有E神演唱會飛？

我望住呢幾張飛，再望下仲企係我地面前同緊校長傾計既E神，佢咁岩又望咗過黎。

E神：「到時見喇四位。

」

佢講完就同校長佢地行咗去司令台，而我地都離開咗頒獎台，繼續討論呢幾張演唱會飛。

黑仔：「嘩點解個行數咁奇怪既？英文黎既？」

Kathy：「應該即係話係VIP飛？應該會係好前？」

阿希：「嘩咁正！？會唔會有得握手架？哇拎去炒既話肯定fat fat啦。

」

我：「喂咪啦，呢D VIP飛拎黎做獎品既你拎去賣，人地會點諗我地學生會呀，以為學生會拎D飛係用黎炒呀。

」

阿希：「唔…你又岩既，咁而家我地點處理D飛好？」

黑仔：「仲可以點啫，一人一張分咗佢，到時去睇囉。

」

阿希：「好囉，嗱拎住啦，咁張場地優先使用權就我keep啦，大家有無意見？」

我：「是但啦，你係主席你話事啦，話時話，我地咁搏命幫你贏個冠軍返黎，主席你有無咩表示先？

」

黑仔：「係囉，之前係咁chur我地參加，而家贏咗無理由咩表示都無架？Kathy你話係咪呀？

」

Kathy：「都應該要獎勵下既…

」

我：「嗱Kathy都咁講呀！」

阿希：「唉得喇得喇，最多我遲D請大家食飯啦咁得未？

」

黑仔：「咁就差唔多，喂急尿呀，有乜遲D再傾。」

就係咁，我地四個人就地解散，各自各去做自己既野。

而家剩低既比賽都係晏晝先搞，即刻話我而家就係等放lunch就得…可以休息下。

休息夠的話，一陣就可以用最佳既狀態去應付100米同400米…

咦？Sarah同Ellie？

就係我思量緊下晝既事既時候，我就見到Sarah同Ellie企係欄杆旁邊望住我笑。

我：「咩事笑得咁開心呀兩位？因為見到我贏咗？」

Sarah：「係呀，睇到你頭先係咁搖阿希好好笑所以咪笑囉。」

我：「吓…搞錯呀，我以為你地係替我開心所以先笑添。原來唔係架…」

Sarah：「梗係都有喇~恭喜你呀阿明，拎到金牌。」

佢一邊講一邊走埋黎拎起我頸上既金牌黎睇，仔細咁打量我塊金牌。

我：「做乜呀你，塊牌有乜好睇啫。」

Sarah：「無呀，想睇下塊牌上面寫咗D乜啫。」

佢終於肯放手，再扯既話我條頸真係分分鐘唔洗要。

Sarah：「終於贏到呢。」

我：「喂喂你咁係咩意思呀，咩係終於贏到呀！」

Sarah：「哈哈哈，無呀我講事實咋嘛~~無其他意思架~~

」

我：「我知…但聽落就好似…」

Sarah：「贏既感覺係點呀？

」

我都未講完，Sarah就插把口埋黎打斷我。

贏既感覺…

我：「好痛快！會突然間咩都唔記得，個腦淨係得返開心既感覺，連自己攰到顛都會突然唔記得。

」

「好奇怪，明明以前係聖所羅王參加陸運會個陣贏都唔會有痛快既感覺。

」

Sarah：「咁唔係幾好咩？」

我：「好呀，幾正添！所以我諗住…」

Sarah：「話時話，Kathy真係跑得好快啊，甚至仲快過D男仔，佢以前唔通有跑開？」

Ellie：「呃…佢好似話過以前自己有玩開田徑，不過都有兩三年無玩喎。」

Sarah：「咦你又會知既？」

Ellie：「佢呢排都係我屋企住嘛，有次佢練完跑返黎同佢傾計咪知道囉。」

呢兩個人，完全無理到我…自己係度傾計…

Ellie：「阿明，家姐比你地個信封入面除咗張場地優先使用權之外仲有D乜？我見你地好似仲發現到有其他野咁？」

我：「嗯？原來連Ellie你都唔知架？咪呢個囉，係咪好正呢？

」

我拎出張演唱會飛，係佢兩個面前揮舞。

Sarah：「哦~原來係E神演唱會飛呀？」

Ellie：「以家姐既作風既話唔出奇既，佢都請得E神黎，有佢既演唱會飛做特別獎品都叫做合情理既。」

佢地完全唔感到意外咁喎…

Sarah：「但係阿明你得一張飛，諗住自己去睇呀？

」

我：「係喎你咁講一講我先發現呢個問題添..點算好呢..咦？

」

就係呢個時候，Anna出現係我視線中，佢都望到我，不過佢好似無打算行埋黎咁。

我即刻拎起頸上既金牌向佢炫耀，想睇下佢會有乜反應。