「無啦啦多左幾個家姐同細妹 Season 2」: 勝負
仆街喇。
無論係物理上定係精神上，我都仆咗街。
今次真係全車靜哂，司機減速咁既感覺，頭先嘈到拆天既看台都好似突然靜咗落黎。
我真係名乎其實既「柒到仆街」喇…都唔知要點面對江東父老好…
「喂無事吖嘛手足，起唔起到身呀？」
就係我仲諗緊點樣收科先可以無咁柒既時候，突然就聽到有人同我講野，仲向我伸手。
我慢慢企返起身，拍拍個身。
我：「哦我無事呀，唔該你。」
望過去頭先問我有無事個個人先發現原來係頭先追到同我平排既人。
男：「你真係好野，只係預賽都搏到咁盡，抵你入到決賽既。
」我：「哈哈…多謝你，你都好勁呀，我都係因為見到你就快追到我搞到我嚇咗一跳，所以我先即刻爆多次。
」男：「點都好，祝你決賽可以有好表現。
」Ellen：「阿明！！
」係我想同呢個人握手既時候，我忽然聽到Ellen叫我個名，於是我望咗過去，果然見到佢跑緊過黎，身後仲有Yui拎住箱野。
男：「唔阻你同你女朋友喇，走先。」
佢講完就行咗去另一邊搵佢班friend，而我就行咗去Ellen個邊。
我一行到埋去Ellen就捉住我不停問我有無事，個樣仲好驚咁。
我：「無事，爆盡之後一時無力先仆咗係度啫，我無事呀唔洗擔心。
」Ellen：「無事？？你睇下你自己個膝頭啦，流緊血呀，快D行埋一邊等我地幫你消毒先啦。
」我望望自己膝頭哥，又真係流緊血，唯有乖乖跟佢地走。
佢兩個扶住我行到去跑道旁邊既欄杆度坐低，之後Yui就急急腳打開個箱，原來入面既全部都係急救用品。
我：「嘩你係邊度拎黎架，唔似係救護站架喎。」
Yui：「唔好嘈住，我而家要快D幫你消咗毒先…」
第一次俾Yui叫我收聲，原來佢都會有惡既時候。
唔只係Yui，就連Ellen都幫埋一份幫手消毒，身為學生會主席幫人消毒，搞到好多人望住我地呢邊。
不過都唔係持續咗好耐，因為佢兩個都好熟手，好快就幫我消完毒，仲痴咗膠布。
我：「好啦，唔該哂你地，我而家真係真係無事啦，多得你地細心照料。」
Yui：「你係咪真係無事架…你呢排好似有時會雙腳突然無力…」
我：「無事，而家即刻跑個100米過你睇都仲得呀。」
Ellen：「你係先好講呀，唔好一陣又仆低要我地黎救你呀，呀大鑊！差唔多夠鐘！Yui我地快D行囉！阿明你自己小心D呀！
」我都未問咩事夠鐘佢兩個就已經架法拉利咁飛走咗，得返我同個急救箱係度。
之後我就帶住個藥箱先去司令台一趟，然後先再返去頭先我熱身既地方。
果然，Kathy，黑仔仲有阿希三個都係齊度。
阿希：「喂你點呀，有無整親邊度？」
我：「哦，我無事只係擦傷咗D啫，仲跑到既唔洗擔心呀會長。
」阿希：「係就最好啦，我地一個都不能少！嗱飲啖野休息下，趁而家快D補充體力啦，距離比賽應該仲有D時間既。」
佢講完就拋咗支寶礦力比我，我接過之後就即刻坐低飲，學佢話齋補充體力。
黑仔：「話說D人係看台正前方塊草地set緊乜？頒獎台？但又好似太大陣仗喎。
」阿希：「妖理得佢吖，做好準備吧啦你。
」呢個時候咩都冇講既Kathy終於開聲。
Kathy：「仲有咩學會參加？
」我地聽完Kathy咁問之後都你眼望我眼，好似大家都唔知道答案咁。
阿希：「我諗…手球…籃球仲有田徑呢三個一定有參加掛，我都無特別留意有乜對手。」
黑仔：「哇聽落對手好似好多都好跑得喎，我地贏唔贏到架。
」阿希：「嗱呢個問題呢…」
阿希講野講到一半，看台就突然傳黎極大既尖叫同觀呼聲。
我地四個都唔係聾既，當然都比呢片聲音吸引到，大家都慢慢行出去睇下發生咩事。
嘩…個個係…E神呀？
黑仔：「嘩係，條友扮E神又扮得幾似喎，咩人黎架呢？」
阿希：「喂唔係喎好似真係佢黎架喎？」
黑仔：「講笑咩我地呢間咁既學校又點會請得起E神呀，九成係我地學校既人扮架啦，不過把聲又真係好鬼似喎，點解之前一直唔見佢玩singcon？唔通…」
Ellie：「個個真係E神黎架，唔係其他人扮。
」Ellie突然唔知係邊度走出黎，嚇咗我地一大跳。
我：「真係E神黎？就係Ellen請佢黎既？
」Ellie：「嗯，家姐用咗好耐時間同好多心機先請到佢黎。阿明你無事嘛聽家姐講你跌親。」
我：「哦無事呀，只係擦傷少少，無大礙既，放心~」
黑仔：「真係E神！？有無可能呀人地係天王巨星黎架喎！？點解你家姐可以請得郁佢？你家姐係金牌經理人？有無佢演唱會飛？利申自用！
」阿希：「佢家姐你都識架咪Ellen囉..你痴咗邊條線呀…
」黑仔：「係喎可，一時太興奮唔記得咗添，不過真係無諗過會請到E神黎，Ellen點做到架？」
阿希：「有錢咪得囉，你又唔記得咗阿明佢地咩身分？
」黑仔：「呀係wor Sorry sorry。」
我：「咩叫咩身分呀聽落好礙耳喎，我同你地一樣都係普通學生咋。
」阿希：「哈哈你明我講乜咪得囉係咪先，話時話Kathy去咗邊？
」係喎，唔提既話真係唔為意Kathy突然唔見咗人。
Ellie：「Kathy既話，頭先佢聽到真係E神黎咗就已經衝咗落去跑道囉。
」聽到Ellie咁講之後我地幾個都紛紛走落去跑道搵佢，因為都差唔多係時候要去召集處。
落去既途中阿E神終於講完D行貨，即係咩好榮幸獲邀黎到，自己以前中學個陸運會個陣點點點之類。
佢終於開始唱歌，唱《七百年後》。
唱到副歌個Part我地就搵到Kathy，佢同其他人一樣，係度揮手，玩得好投入。
阿希：「唔通佢好鐘意E神？Mark低佢先哈哈。」
黑仔：「十個入面有八個都鐘意…」
黑仔都未講埋E神個名，我地就已經聽到廣播，叫學會接力既選手去集合。
我：「行囉，阿希你去叫Kathy啦。」
就係我想動身既時候，一直係我身邊既Ellie突然拉住我。
Ellie：「量力而為，唔好勉強自己啊知唔知。
」我：「我會架啦，呢度多人呀，你上返看台啦我怕d人撞親你。
」Ellie：「嗯，咁你自己小心。」
同Ellie道別完之後我地四個就慢慢行去召集處。
其實我呃咗Ellie。
比賽又點可以量力而為，唔好勉強自己吖，一定係搏到盡，燃燒自己生命架啦。
雖然唔係同晨哥鬥，但呢場都係一場勝負黎，唔可以留力。
係E神大展歌喉既時候，我地四個正係賽道上摩拳擦掌，準備呢一場期待已久既比賽。
令人感到意外既係場上並未見到D係學校入面比較有名既運動健將或者運動型既學會，反而大部分都係D好似我地咁既興趣學會。
電腦學會，棋藝學會，舞蹈學會，時裝設計學會，睇落唯一跑得下既都只係得空手道學會。
阿希：「咦，乜原來手球籃球田徑班仆街都無份參加呀？真係估唔到喎。
」黑仔：「哦，係咪因為呢幾個學會大部分既會員同時都係對方既成員，為免難做所以呢D學會索性唔報？
」我：「唉點都好喇，而家少咗D勁敵唔好咩，而家咁睇我地呢隊好似係係最勁？
」阿希：「好似就係喇，嘩係咪即時信心大增呢咁多位~
」黑仔：「哈哈，我硬係覺得唔會咁順利，九成會有人臥龍藏龍既。
」阿希：「妖你真係無鬼用，Kathy呢？Kathy你點睇？
」阿希將話題拋俾一直係我地旁邊熱身既Kathy，大家都望住佢，但佢好似毫不在乎，繼續做佢既熱身。
Kathy：「盡咗力先算喇，何必諗咁多呢。
」一句就秒殺咗我地。
三個人即刻收聲點頭，之後就各自各埋位。我就被阿希安排係第二棒，Kathy就係第一，黑仔就係第三，最後既就係我地既會長阿希。
佢話身為會長梗係要壓軸出場，所以佢一定要跑最後個棒咁話，都唔知咩道理。
唉，接力既野無可能一個人贏到既，相信佢地吧喇，學Kathy話齋，自己盡咗力先算喇。
當我地各就各位，準備好跑既時候，E神又咁岩唱完一首歌，仲幫我地主持鳴槍。
「呯！」既一聲，所有第一棒既選手都向我呢邊衝過黎。
當然，當中都包括Kathy，佢仲跑得特別快。
見到佢原來係跑得咁快，我都呆咗一秒，不過都只係呆一秒，因為我知道自己好快就要接棒。
佢跑得好快，係咁多人之中突圍而出，成功拉開一小段距離之下交棒比我。
交棒過程非常順利，直頭可以用無縫去形容。
我一拎到支棒之後就起勢向前衝，希望可以保持甚至擴大Kathy製造既優勢。
好彩頭先有坐低休息下啫，而家已經無頭先跑完400米咁攰，可以全速向前衝！！
因為咁，我可以話比預期輕鬆跑我個100米，無人係我三個身位之內。
我愈來愈近黑仔，開始可以見到佢笑到四萬咁口望住我，仲係咁伸手示意叫我快D交棒。
最後幾米個陣我想好似Kathy個陣咁，乾淨利落咁交棒比佢，不過過程中條仆街差D甩手，好彩最後都係有驚無險，佢可以順利出發。
交完棒，目送佢個背影遠去之後我先至望下後面，見到其他隊而家先開始交棒。
之後就要靠黑仔同阿希喇，keep住呀。
「曾付出 幾多心跳 來換取 一堆堆的發票
人值得 命中減少幾秒 多買一隻錶」
原來E神係我地跑緊既時候又開始繼續唱歌，我太專心係比賽都無留意到添。
《陀飛輪》…我都好鐘意呢首歌，好有feel。
係喎一時掛住聽歌唔記得場比賽添！！而家跑成點呀？？
我一意識到呢一點就已經即刻係場上搵黑仔既身影，好快就比我係第四棒既位置搵到佢。
佢氣喘喘，上氣唔接下氣咁望住終點。
係佢目光既引領下，我都望咗去終點線，咁岩原來E神都係企咗係個度唱，仲見到佢係度拍緊一個跪咗係度既學生，可能係其中一個選手。
我即刻再望下運動場既電子計時版，已經停咗，即係話呢場比賽已經完咗。
咁我地到底係贏定輸？
我好想知道答案，所以我都開始行過去終點個邊，頭兩步又好似跑完400米個陣咁，對腳忽然無力，好彩今次無仆低。
睇黎我都係太緊張啦。
每行一步，我就愈近終點綫，同時亦開始睇得到跪係地下既人到底係邊個。
係阿希。
我知道咗係阿希之後就開始跑，仲跑到好狼狽，差D又仆街。不過我最後都係無事咁跑到過去搵阿希。
阿希見到我黎就好想企起身，但佢做唔到，唯有喊哂口咁望住我。
阿希：「阿明…我地得咗喇…
」