「無啦啦多左幾個家姐同細妹 Season 2」: 再戰
好快又到星期一，陸運會既決賽日。
今次出門口前睇咗天氣報告，話今日天氣睛朗，可以話係唔會落雨。
即係話今日既比賽應該唔會再受到天氣所影響啦。
大家姐：「加油呀阿明~~我地一陣都會黎幫你打氣架。」
我：「好呀，咁我地一陣見啦。」
講完我就同Sarah仲有Yui一齊出門口，出到去就見到有架車泊咗係度，Ellen仲係架車入面伸個身出黎。
Ellen：「快D上車啦，兜埋你地去。學生會主席唔遲得架快D啦。」
就係咁，我地就上咗Ellen車，車上面仲有Ellie同Kathy，但就係無Anna。
我：「Anna呢？定係而家去接佢？」
Ellen：「啊，佢話唔洗接佢，叫我地自己去喎。」
Sarah：「可能唔想同阿明同一架車呢哈哈。」
Ellen：「係喎佢仲嬲緊阿明架wor，唉唔怪得佢唔肯同我地一架車啦，最衰都係阿明你啦，落車！即刻落車！」
我：「講到咁…好囉停車比我落啦，我自己坐車去。唉都係唔洗停喇，我自己跳車吧喇」
我既回應引黎佢地既爆笑，就連Yui同唔關事既Kathy都忍唔住笑，係差在司機無減速。
Ellie：「家姐都係講笑架啫，唔好咁介意啦阿明。」
Ellen：「車你慌佢真係會跳車咩Ellie，氹佢做咩啫。
」我：「嘩乜你咁諗我架，我係講得出做得到既人黎架，話時話點解由岩岩開始你就不停係度㩒電腦？有新game玩？」
Ellen：「玩你個死人頭呀，我係度確認緊今日D流程呀，今日我請咗嘉賓黎，我唔想再有乜阻滯呀。
」嘉賓？
我：「之前Ellie話你D安排就係指嘉賓？」
Ellen：「係呀，D嘉賓仲要係我用人情牌請返黎呀，同埋當初同學校傾既時候用咗我幾多口水先氹到佢地批準呀，我唔想因為D小事哂咗我D心機呀。」
咁又真係可以睇得出Ellen係呢件事落咗唔少心機時間既，如果比天氣之類搞衰件事肯定會好唔開心。
Kathy：「點解你要自己去請嘉賓既？唔係一般都係由學校去請架咩？」
Ellen：「因為我想大家可以玩得開心D囉，聽學生會D人講學校請親D嘉賓都係D運動員，係就係幾出名，不過大家都話好悶囉。
」「所以我咪決定自己去請嘉賓，希望可以炒熱個氣氛，等大家可以玩得再開心D囉~
」Sarah：「有你呢個咁為同學著想既學生會主席真係我地既福氣呀~~咁你請咗咩人呀黎？
」Ellen：「嘻祕密~一陣你地咪知~~期待下啦一定會好好玩好開心架~
」Sarah：「懶神秘~黎啦Yui話我知喇，到底係邊個啫~
」Yui：「但係…
」Ellen：「咪呀Yui！唔好話佢知！eh…呢個係學生會機密！唔準講！
」Ellie：「你兩個咪難為Yui喇…
」Kathy：「係囉，最多一陣咪知，都唔急於一時喇，無謂要Yui難做，你睇下佢而家幾左右為難…
」我無加入呢場爭論，因為我知道我講乜都會有位比佢地入到。
我一邊聽住佢地嘈一邊望窗外既風景，話咁快就到咗運動埸。
又返到黎呢個鬥獸場喇…
我地一行六個人慢慢行入運動場，而家Sarah同Ellen無再為嘉賓既事爭執，變咗係討論邊個社最後會贏。當我地入到去既時候，我第一時間就見到晨哥。
咁並唔係因為佢特別出眾之類，之所以我會咁快就望到佢係因為佢同Anna傾緊計。
正確黎講，係佢聽緊Anna講野。我睇唔到Anna既樣因為佢背向我地，但仲可以睇到佢講到指手劃腳。
晨哥好快就注意到我，之後就行開咗，望我既眼神唔可以算係友善。
比賽都未開始佢就已經係認真mode。
Anna係晨哥走咗之後都擰轉身，發現到我地，仲行埋黎同我地打招呼。
Anna：「早晨呀咁多位，咦？呢個係你新女朋友呀陳煒明？
」佢故意用種好輕挑既語氣講呢句說話，新女朋友應該九成九係指Kathy。
我：「唔好拎呢D野黎講笑啦Anna，頭先你同晨哥傾乜呀傾到指手劃腳咁。」
Anna：「啊…無呀我叫佢一陣一定要打爆你咋嘛，做定心理準備啦，咁岩佢話佢今日心情唔好，一定會chur到盡咁話wor。
」我：「嘩洗唔洗呀…你唔係想我拎個全場總冠軍比你架咩？
」Anna：「唔…因為我想幫呢個遊戲增加難度囉，記住呀拎唔到既話唔會原諒你呀。
」佢講完之後就無理我，走咗去同我身後既Sarah佢地傾計。
不過藍洛晨既「chur到盡」會去到邊呢？唔通初賽既佢仲未係全力？真係令人好奇。
之後又重複返初賽日既程序，聽訓導主任9up，上看台，好似時光倒流咁。
初賽日既天氣問題令到今日既比賽流程變到好唔同，因為仲要處理個日腰斬既賽事。
所以一開始係要先進行咗乙組丙組100米既初賽先，甲組，即係我個組既決賽就安排咗係下午先舉行。
至於400米既初賽就係100米既初賽之後就舉行，所以我都一直準備緊，熱下身咁。
就係我熱身既時候，阿希同黑仔黎咗搵我。
阿希：「Yo兄弟，狀況點呀？
」我：「狀況點？不過不失啦同之前一樣。」
阿希：「哦~？不過不失既話係贏唔到晨哥架喎~你有無信心贏佢架？」
我：「信心？我都唔知呀，不過好多人都同我講叫我要贏，我諗我一定要贏佢啦，所以…係囉。」
阿希：「原來係咁，哈我都好期待你可以贏到佢，咁多人面前贏佢肯定會引黎好大迴響，分分鐘到時你可以做學校既風雲人物添呀。」
我：「哈哈我都無咁既打算，我先唔想做咩風雲人物呀，我只係想好好讀書，陪我D女朋友咋。」
黑仔：「講起你女朋友，我都有個問題想知，點解佢地會肯同你一齊既，我意思係…幾個同時同你一齊，都想問咗好耐。」
我：「啊呢個呢…我開頭都無諗過最後會變成咁，不過佢地每個對我都好重要，我地之前成日都係咁講，大家係互相依賴同需要，所以就可以六個人一齊行落去。」
黑仔：「嘩…原來係咁架，仲以為你係靠口甜舌滑先…真係睇唔出喎。」
我：「咁講咩意思呀你，話時話你兩個走黎做乜呀，我記得你地兩個都無報400米架。」
阿希：「啊啊屌你死人黑仔扯開話題搞到我差D唔記得咗正經野添，無啊其實一陣就要學會接力，所以我地咪黎睇下你咩環境囉，當係確認下選手狀態咁。我地兩個都係岩岩搵完Kathy咋嘛。」
學會接力！？完全無咗回事添！
我：「幾時係呀？我都無留意到學會接力個時間表添！」
阿希：「搞錯呀你有無心為我地動漫soc戰鬥架，eh…我無記錯既話好似係400米預賽完咗之後，收到風話當係上午既壓軸咁話。」
仆街囉400米預賽完咗之後就要再跑100米…？回唔回得切氣架…
黑仔：「哇我地係壓軸咁勁呀，咁一定要拎冠軍先得喇，之後再拎住塊金牌同Cody表白~」
阿希：「你啊…真係鐘意人就不如認認真真表一次白啦，成日係度玩玩下…」
黑仔：「扯，你理得我啫，喂阿明男甲400米開始召集喇，過去報到啦。」
唔洗黑仔提，我聽到叫咪之後就已經收拾心情準備好過去。
去到400米召集處，已經有唔少人係度熱身，個個都鬥志十足咁款。
我係第二組，同組既人都係同我同級，埋位前大家都係度吹水，好似無人當係一回事咁，得我一個好緊張。
一定要跑得快過小明先得。
我抱著呢個信念，係鳴槍聲一起就應聲彈出，希望可以搶佔先機，先拋離其他人，等最後段路可以無咁難鬥。
情況如我所料，係頭200米都未見有人同我平排，應該可以順利通過預賽喇今次。
正當我抱有呢種想法既時候，惡夢就黎了。
有條唔識既友仔突然發力，同我平排，睇佢個勢仲有力爆。
我好快就意識到自己應該要加速，於是我又爆多次，用盡身上淨低既力，希望可以拉返開距離。
最後，我做到，拎到預賽第一。
但過完終點綫之後，成個人仆咗係度。