「無啦啦多左幾個家姐同細妹 Season 2」: 星夜

幾經辛苦終於返到屋企，對手拎野拎到幾乎斷咁濟，D衫真係重到仆街，都唔知佢地到底買咗幾多。

一返到屋企二家姐就拿拿聲衝返上房，唔知係咪仲係介意係戲院既事。

大家姐：「唉呀，佢好似仲係好嬲添，仲以為帶佢去買衫會令佢開心返D添，而家點算好呢~」

我：「都話咗咁做唔好架啦…大家姐你仲要拋個波比我等我做罪人… 」

大家姐：「因為我都驚阿May對我發嬲囉哈哈，唔緊要啦佢唔會真係嬲你既~ 」





我：「唔會真係嬲我？咁係咩意思？ 」

大家姐：「啊無，無事，你都快D返上房沖個涼啦，好似就食得飯，我都上房試下D新衫先！~ 」

大家姐講完就拎走咗其中一袋衫，急急腳跑咗上房。

我沖完涼之後就返咗落飯廳，個陣大家都已經係齊度傾住計等開飯。

Sarah同Yui就拎住幾件衫係度襯，原來二家姐有買埋佢地個份。





講起Sarah，睇黎佢終於酒醒，無再呆下呆下。

Sarah：「阿明阿明！我著呢件既話好唔好睇呀？二家姐買比我架！ 」

我：「唔得！！唔可以著呢件！！ 」

見到Sarah係我臉前show二家姐買比佢既新衫，我即刻彈起身，不停揮手搖頭。

因為Sarah拎住既係一件黑色lace低胸大露背晚裝。





Sarah：「吓點解呀…我覺得呢件好靚wor…點解唔得呀… 」

我：「總知就係唔得！！點都唔得！！嗱Yui呢件就幾好啦，你睇下幾優雅大方！ 」

我一邊講一邊指住Yui手上既白色lace長裙，呢件雖然都有露背，但就無低胸，而且都好靚。

Sarah係聽完我咁講之後就望住Yui件衫，好好咁打量咗一番。

Sarah：「哦…原來係咁…嘻嘻。 」

我：「咩…咩呀！ 」

大家姐：「阿明你諗緊乜我估大家都知道咗喇，唔洗再扮喇，好喇去食飯喇~」

我真係咁易睇穿咩。 





我地成家人又聚首一堂一齊食飯，就好似今朝咁，有講有笑，只不過換成大家姐分享今日去街既趣事。

Sarah：「啊點解你地今日去街唔叫埋我啊…我都好想去睇戲啊… 」

大家姐：「鬼叫你咁渣，飲個小小酒就暈咁耐，下次等大家姐同你練下酒量啦~ 」

二家姐：「喂家姐…呢個唔係重點呀… 」

大家姐：「哈哈有乜所謂啫遲早都要學架啦~Daddy你話係咪？ 」

Uncle：「飲得多傷身呀，唔好飲咁多知唔知？大家姐：「哈哈放心喇我知道架啦，我會錫住佢地架啦，不如而家就開支酒？ 」

二家姐：「唔好咁癲喇家姐…尋日飲完今日又飲… 」





大家姐：「咩喎連你都咁話我…算喇今晚唔飲~~Sarah Yui一陣食完飯黎我房吖，俾我D新衫你地睇下。 」

Sarah：「好呀好呀！Yui我地不如一陣都試下D新衫囉~ 」

Yui：「嗯！我好鐘意頭先二家姐買比我個條白色裙…好想快D試著… 」

我：「岩岩食飽就去試衫，你地會唔會著唔落架。」

Sarah：「你咁係咪即係話我地肥呀！ 」

我：「唔係唔係！邊敢呢，你地咁fit，咩衫都會岩著啦係咪先。 」

大家姐：「你睇下你吖，禍從口出呀阿明~女仔最介意人地話自己肥架，罰你一陣無得睇我地著新衫！ 」

吓原來我可以睇架！？喂但係我從來無提過個肥字喎！ 





Sarah：「岩呀大家姐，俾D教訓佢就岩架啦！夠膽話我肥！」

Yui：「乜我好肥咩… 」

大家姐：「點會呢~Yui你不知幾苗條，唔好理阿明啫，我地而家就上去試衫啦~ 」

就係咁，大家姐就帶住Sarah同Yui先行離席，得返我，Uncle，老母，二家姐同羽晨繼續留係飯檯。

我揸住碗飯，望住佢地三個遠去既身影，感覺自己好似送走咗一片美好風光。

二家姐：「抵啦。 羽晨乖，食飽就自己抹嘴啦。」

羽晨：「嗯！我食飽喇！各位慢用！ 」





羽晨講完就蹦蹦跳跳離開飯檯，二家姐就慢慢跟係佢後面。

Uncle：「食飽唔好跑咁快呀，會有盲腸炎架知唔知。」

羽晨：「知道！~ 」

就算羽晨已經離開咗飯檯，但佢個把得意既聲線仍然可以透過空曠既大廳傳到黎我呢邊。

而家得返我地三個，唉都係先走為妙。

我之後都加入後生仔個邊，離開飯廳返上房。

途中我仲經過大家姐間房，道門閂埋不過我聽到入面佢地既笑聲，好似試衫試得好開心咁。

啊好想睇，真係好想睇。不過無辦法啦。

我之後繼續返自己房，途中又經過一道門，一道打開咗既門。

門後面，係一條樓梯。

以前呢度有樓梯架咩？

好奇之下，我行咗上呢條樓梯，原來係通向天台既樓梯。

我第一次上到黎呢度，呢度望到既天空比起係露台睇到既更大更廣闊，至少唔會比自己間屋遮到。

我除咗留意一望無際既天空之外，我仲留意到一件事。

原來二家姐都係度。 佢就咁盤腿坐係地下，抬頭望住個居然滿載星星既夜空。

二家姐好快就注意到我，轉身望住我。

二家姐：「上黎做乜。」

我：「eh…見到下面有條未見過既樓梯…所以咪八卦走上黎睇下，原來係上天台既樓梯…」

二家姐：「低能架你住咗咁耐而家先知條樓梯係上天台？ 」

我：「咁…平時道門係閂埋架嘛，好人好者無啦啦點會走去開道閂埋既門… 」

二家姐：「啊睇黎係我唔記得閂門，你落去既時候幫我閂返，廢事羽晨貪得意走上黎。」

我：「啊哦…知道…」

我望住個天，D星星真係好多好靚，又要大粒，係香港無乜幾可可以睇到，搞到我睇到著咗迷，連二家姐講乜都唔係聽得好清楚。

直至到佢搵野掟我，我先回過神，將目光放返係佢度。

二家姐：「仲唔走做乜？你都知道咗條樓梯係有乜用喇，仲唔返落去？ 」

起哂槓咁…仲為爆谷既事嬲緊？

我：「見D星星好靚所以想留多陣睇啫，好似好難得會有咁多咁大粒既星星。」

聽到我咁講之後，二家姐呆左一陣，之後再望返個天。

二家姐：「係，所以我先專登走上黎天台睇，想儘可能睇多D。」

「咁樣既天空，真係會令人睇到唔想走，可惜既係時間唔會等人，同黃昏一樣，總會有天光日出既時候，再靚既夜空都會完。」

「可以既話，我幾咁希望時間可以停留，咁既話我就可以永遠睇住呢片天空仲有…係囉。」

我：「但人總要向前行…加上第二晚又會可以睇到夜空，所以應該唔好咁執著要時間停留…」

二家姐：「哦？無諗過呢D說話會係你把口度聽到。」

「話我知，而家既你會想要乜？」想要乜？

我：「咪同之前一樣，同Sarah佢地一齊囉。」

二家姐：「就只係得咁多？」

我：「而家我有佢地五個我就已經好滿足架啦，我都唔敢再去求D乜，而且有佢地幾個我都夠啦，都唔會去諗想要乜。」

「硬係要講想要乜的話…而家想係陸運會贏囉。」

二家姐：「陸運會…係指阿晨既事？」

我：「係啊，我點都想贏到佢…雖然我知道咁係近乎無可能…」

二家姐：「無野係無可能既，當初你夠無可能變做個有錢仔同係阿偉手上搶到Sarah啦，而家你咪又係做到。」

「只要你有付出夠足夠既努力，一定會有贏既可能性既。」

小可喎二家姐居然會對我講D咁正面既鼓勵說話。

二家姐：「你係度笑咩呀。」

我：「無，只係無諗過你會突然同我講呢D野鼓勵我啫。」

「我以為你仲介意緊今日爆谷既事，會係咁搵機會串我添。」

二家姐：「講起呢件事我就真係嬲嬲地，你係咪痴咗線呀，淋爆谷有乜意思呀到底，搞到我成身都係爆谷不突止，D焦糖仲搞到我D頭髮痴笠笠，仲要執餐懵！你知唔知我執既時候俾D職員望住係幾尷尬呀！」

一提起爆谷單野佢就失去理智，破口大罵，果然係好介意，我又踩中地雷了。

我：「真係唔關我事架…係大家姐意思…」

二家姐：「佢叫你就要做架？你唔識自己諗下架？」

我：「最後淋既都係佢…只係佢一淋完就即刻dup咗個桶比我，所以你先會以為係我淋你…」

二家姐：「…原來係咁，做乜唔即刻解釋？」

我：「大佬你個陣好似食咗炸藥咁，我仲點敢講野呀…」

二家姐：「唉算數啦而家知返件事就得啦，我一陣會去話佢架啦，Sorry呀今日怪錯你。」

「不過睇黎你真係成長咗少少咁喎，係咪因為做咗股東個人成熟咗呢？無再諗埋D低能白痴既事之餘仲有一個正面既人生目標，仲要同我講人生道理，真令人意外。」

我：「哈哈…我諗唔關事既…」

二家姐：「點都好啦，陸運會要加油，家姐佢好似話會去睇你地決賽。」

「贏比佢地睇喇。」

二家姐講完就落返樓，留低我仲有呢片星空係天台。