「無啦啦多左幾個家姐同細妹 Season 2」: 雨天

我抬頭望一望天，發現開始有雨滴落黎，雖然而d雨唔算大，但可以感覺到好快會變成一場大雨。

如果雨落得太大既話，比賽會唔會分分鐘要腰斬呢。

Anna：「開始落雨呢。」

我：「係啊真係識揀時候落，陸運會先開始咗一陣就黎落雨，如果一陣再落大D既話今日既比賽分分鐘要腰斬添呀。」

Anna：「咁都無辦法架啦只可以話天公不造美，咁對你咪仲好，又可以多D時間練，全場總冠軍肯定手到拿來喇。」

又講…我已經緊張到胃都有少少痛喇你仲提…

「落雨呢。」

邊個又講呀，知喇唔洗講九萬幾次既。

我擰轉頭邊個傻仔又講多次，點知原來係晨哥。

佢雙手抱胸咁望住個天，懶係型咁。係既，係幾型既。

我：「晨哥？你幾時係度架？」

晨：「哦一早黎咗喇，係去咗同佢傾計啫。」

「佢」指既係lulu，原來佢係度幫手做工作人員，我頭先掛住搵Anna都留意唔到佢添。

佢攤開隻手，好似想去摸D雨咁。好似我細個咁，不過其實我而家都會咁做哈哈。

我：「哦…點呀你估今日比賽洗唔洗腰斬？」

晨：「邊個知吖呢D野，都係學校決定架啦邊有得預，只要佢唔話腰斬，就算落雨到落到瀑布我地都係要跑架喇。」

「只不過居然會咁岩又係陸運會落…個天真係鐘意作弄人…」

我：「係囉又係陸運會落雨，真係巧合。」

晨：「你知道我想講乜咩？」

我：「知呀，聽阿希講上年陸運會又係落雨落到倒水咁吖嘛。」

晨：「唔係，你咩都唔明。」

佢講完就走咗去搵lulu同佢傾計，仲拎咗件雨䄛比lulu。

唔明？我有乜唔明呀咪又落雨囉？

雨未見到有變大既趨勢，所以暫時比賽都仍然繼續。

我同Anna暫時離開咗鏢槍場地，去咗100米既召集處，因為岩岩開始女子甲組100米召集。

Anna：「同我一齊過黎真係好咩，見我跑得好既話你咪盞仲大壓力。」

我：「是旦啦，我會盡力架喇…」

Anna：「係你先好講呀，你講D野真係無次信得過。

」

嘩…咁話我既…雖然我真係有幾次都無辦法遵守到承諾，但都唔洗話無次信得過呀..？都係講下其他話題算。

我：「你今年目標係咩呀？女子全場總冠軍？」

Anna：「梗係啦，上年病咗無辦法，你上年又拎唔到比我，今年一定要拎返至少一個啦係咪先。

」

佢一邊講一邊拉筋，好似拉好弓準備一箭定勝負咁。

我環顧四周，原來不知不覺已經聚集咗唔少女仔係度，大家都係度傾計，無一個係好似Anna咁早就熱定身。

我：「加油呀。」

Anna：「洗鬼你講，你以為我係邊個，我係江家大小姐呀，預賽咋嘛會難到我咩，決賽都輕鬆贏比你個傻仔睇添呀。

」

佢講完就轉身行去賽道，行之前仲對我做咗個V字手勢，信心真係爆棚咁。

結果佢真係好輕鬆咁贏出預賽，仲贏人地幾個身位。

不過，因為落雨條跑道好似有D跣，見到有個女仔差D跣親。

Anna跑完好得戚咁走埋黎，氣都無喘一下。

Anna：「輕鬆喇係咪先，過返去鏢槍個邊囉，差唔多公佈決賽名單。」

得戚到你吖…又話嬲我？又對住我笑到四萬咁口，女人真係難捉摸，一時一樣。