「無啦啦多左幾個家姐同細妹 Season 2」: 開幕

之後既兩日我都係不斷咁練習，朝早就早D起身出去跑，放學就同阿希佢地去運動場練跑同交棒，之後返屋企食完飯又會出去跑一轉，總知一得閒就會跑，希望可以操得好自己D體能。

Sarah佢地幾個都有為我呐喊助威，無錯係練習都吶喊助威，搞到運動場好多人望住我地，好撚尷尬。

不過，Anna就不在此列，佢呢兩日都無同我一齊跑，話係屋企練。

Yui仲整咗唔少荼點比我係練完跑之後食，款款都係正野，不愧係得到蘭姨傳授既人。

阿希條仆街仲想偷食，差D就打到佢仆街。

你問我二家姐件事點？我已經無理，都唔到我理，大家姐都叫我唔好多事，順其自然就可以。

順其自然，呢四個字真係好好，父女關係既問題旁人都無得可以點插手。

今日，就係陸運會喇。

好似講咗陸運會講咗好耐，終於到呢日。

原本諗住今年終於可以輕輕鬆鬆咁坐係看台睇人跑，點知最後都係要搏老命，唉仲要同晨哥鬥，真係諗起都頭痛。

如果拎唔到全場總冠軍，都唔知要點去氹Anna好。

痛痛痛…好似成身就散咁，重力真係麻煩…

我拖住一副疲憊不堪既身軀，走到去飯廳食早餐，去到既時候大家都已經係度，全部人都精神抖擻，搞到我好似個異類咁。

大家姐：「早晨呀阿明~~今日就係你地學校既陸運會喇喎~~緊張無？」

我：「緊張…啊…應該有掛…我都唔知喇…」

Yui：「阿明你無事吖嘛？點解你好似咁攰既...」

係呀突然咁樣操兩日真係好攰…我諗過咗陸運會之後我真係要訓返兩日先得。

好攰，連答佢地既意慾都無乜。

我都唔係好記得自己答咗D乜，甚至早餐食咗D乜都無乜印象，只係知道自己唔再肚餓。

之後我地三個就坐屋企車去學校指定既運動場，去到既時候已經有好多同學到咗，係度傾計，討論下今日將會有咩精彩賽事。

Sarah：「好似聖所羅王既運動場大D吖可？

」

Yui：「好似差唔多..？我唔係好記得喇。」

居然係討論運動場既大細，你兩個真係吖，無你地收。

Ellen：「喂阿明~~黎咗嗱~~？

」

Ellen把聲？邊度傳黎？

我周圍望，但四圍都唔見佢，反而見到阿希佢地，佢地同Cody仲有Kathy係度有講有笑。

Ellen：「呢度呀~~看台呀~~

」

看台？我聽到之後即刻望咗上看台，好快就搵到佢，佢好似傻咗咁係咁對住我揮手，Ellie無眼睇佢家姐咁出位既表現，就企係佢後面掩住塊臉。

哈哈，睇黎Ellen都好興奮下喎對於呢個陸運會。

好啦，而家就只係差Anna…

「集隊！！」

啊要集隊嗱？一陣先去搵Anna啦咁。係訓導主任既命令下，全學校既學生好快就係看台前排成一列列，好似閱兵咁，而訓導主任就企係看台上面得意洋洋咁望落黎，都唔知佢做乜。

黑仔：「唉條友又黎料，年年都係咁佢其實係咪真係覺得自己咁好型。

」

阿希：「屌，都慣架喇有年水運會我仲以為佢會企係個跳台度講添呀，佢真係好鐘意係D公眾場合出位。」

吓…原來我地既訓導主任係一個咁既人黎架，平時真係睇唔出喎。

訓導主任：「安靜！！你地咁大個人仲唔識紀律？出到黎公眾地方都唔識安靜？唔知會騷擾到其他人？

」

阿希：「你係識既就唔會朝早八點幾拎住個大聲公係一個附近都係樓既運動場度大吵大鬧啦…擾人清夢呀老師…

」

阿希係度細細聲抱怨，附近聽到既人都忍唔住dup低頭笑，就連Miss Leung都係。

不過遠在幾乎天邊既訓導主任又點會聽到吖，佢繼續忘我咁訓示我地多一輪，之後先放我地上看台。

咁正常學校既陸運會都係分社咁坐架喇，我同阿希仲有Cody係同一個社，好自然就坐埋一齊，而Ellie同Yui亦係我地個社，所以我都可以係自己個看台見到佢地。

好快，跑道上又聚集咗一班社職同老師，開幕禮話都無咁快就開始。

先係繞場一周，之後係唱校歌升旗，呢D程序上既間間學校都差唔多架喇。

當然，唔少得既就係校長致辭啦係咪先。

校長：「好高興今日上帝俾左一個清涼而且光猛既天氣我地舉行陸運會，希望各位運動員可以盡全力公平公正咁比賽，我好期待各位可以有好成績，我宣布陸運會正式開始！

」

阿希：「喂Cody姐，條友D致辭同上年一模一樣架喎。我記得上年佢又係話一個清涼而且光猛既天氣我地舉行陸運會，結果過咗陣就落雨落到倒水咁。

」

Cody：「得你先會咁得閒去留意埋呢D低能野，諗下一陣下晝點跑你個學會接力仲好啦。

」

笑死，咁都有位比Cody笑阿希。

校長宣布陸運會正式開始之後成個運動場都開始忙起上黎，車水馬龍，人來人往。

我都唔知係邊度收一本場刊，見無聊就拎咗黎睇，睇下個時間表都好。

嘩男子甲組既比賽咁遲先開始，即係話我仲要係看台hea一陣…去搵Anna都好。

Anna個社就只係係我旁邊，一行就到，點知行到去兩個prefect攔住我，叫我唔好越社。

屌，奪舍就話唔得啫，越社探人都唔得？有無搞錯呀。

呀，去搵Ellie佢地探Anna口風咪得，我真聰明。

我奪舍失敗，呀唔係係越社失敗之後就行返去自己位度坐低，再望下Ellie佢地係邊。

Yui就唔見咗人，而Ellie就自己一個挨係欄杆度望住跑道。

係側邊咁樣望Ellie，好似有份仙氣圍繞住佢，嘩你仲要撥頭髮？咁放肆都有既你！可怒也！真係要教訓下你先得！

坐低都無兩分鐘，我又起返身，行咗去Ellie度，搭住佢膊頭，嘗試同佢睇同一樣既風景。

我：「睇緊咩呀靚女？」

Ellie：「無呀，睇緊家姐咋嘛。

」

嘩呢個笑容！！！我要定了！！天使級既微笑。

哦，原來佢係睇緊係賽道上既Ellen，身為學生會會長既Ellen係呢個大日子又點會得閒吖，佢要係司令台附近同D老師配合協調，Yui都係個邊幫佢手。

我：「點解你好似睇得咁開心既？」

Ellie：「唔知呢，見到佢做得咁充實，忙得咁開心，我就覺得好開心啦。覺得佢好似終於達成自己夢想，好替佢開心。」

唔通呢d就係孖生姊妹既感應？見到佢開心，我自己都好安慰，同佢一齊睇住Ellen同Yui忙。

雖然佢地唔係運動員，但係佢地都係運動場上為運動會揮散緊汗水，成件事好青春。

果然陸運會真係超有趣同超好玩。

咪住先…我好似唔記得咗D野咁既？係喎Anna既事！！

我：「Ellie呀…」

Ellie：「唔？做乜呀？」

我：「你估呢…Anna仲有無嬲我吖嗱？」

Ellie聽到我咁講即刻望咗過黎，用另一款既笑容望住我，係奸笑。

Ellie：「做咩咁問呀，你仲係好驚Anna嬲你？」

我：「梗係喇，你又唔係唔知佢嬲起上黎會幾恐怖架喇…講我知啦…Anna仲有無嬲我？」

Ellie：「唔…我估有掛？你見佢呢排都唔係點睬你，寧願去練跑都唔陪你。」

啊果然真係咁呀…

我：「咁你估除咗拎全埸總冠軍之外…仲有無其他方法可以氹到佢吖嗱…你知啦今次晨哥乜都有報…我好難贏到…」

Ellie：「咁呢樣野就你自己諗啦，我唔可以幫你，同埋你應承咗Anna會拎全埸總冠軍比佢架嘛，應承咗就要做到先係。」

其實…我無應承…個晚係佢自己講完就跑咗入屋…不過算喇。

我：「咁你知唔知Anna佢而家係邊？我成朝都未見過佢，想見下佢。」

Ellie：「呢個我就知，佢岩岩去咗鏢槍個邊報到，就係個邊既草地，你好似都有報男甲鏢槍？都召集緊啦你快D行啦。」

鏢槍…係喎我有報，打算搏多個機會。

既然係咁就岩啦，去比賽順手撩下Anna。

同Ellie道別之後我就急急腳走咗去草地，見到都好多人聚係度，睇黎鏢槍都好多人報。

茫茫人海中，我好快就搵到Anna，佢都搵到我。

Anna：「點呀陳煒明，準備好搏命拎全埸總冠軍比我未？