「無啦啦多左幾個家姐同細妹 Season 2」: 挑戰
係晨哥同我「宣戰」之後，女甲既鏢槍比賽好快就開始咗。
Anna繼續展示出佢超人級既實力，第一擲已經掟到好遠，令人望塵莫及。
睇黎佢呢面金牌已經袋袋平安喇，恭喜賀喜。
我都唔係得個睇字，我係睇佢地掟既時候都有用我既寫輪眼去分析佢地既動作，睇下到底應該要點掟先掟得好，掟得遠。
好，分析完喇，我估我大概掌握到。
一如所料，Anna最後輕鬆拎到呢面金牌，不過佢自己唔知道呢件事，因為佢係掟完最後一擲之後就已經走咗去跳遠個邊，真係忙。
係宣布完結果，班女仔開始離開既時候我仲聽到D Form 6既師姐係度討論緊Anna，個個都話Anna好勁，可能仲勁過D男仔。
睇黎Anna個朵經過今次陸運會之後又會更加響喇哈哈。
「而家開始男子甲組鏢槍初賽，請各位選手準備。」
好喇我都要加油，至少一定要入到決賽先！
相比起女子組，男甲呢邊多人好多，只係嗌名都嗌咗五六分鐘。
而且唔只係數量，就連質素都好過女子組好多，都未到Form 6，應該話都未輪到我，前面既人已經表現驚人，同女子組完全係兩個世界。
「陳煒明。」
到我啦到我啦，俾心機吖陳煒明，掟野咋嘛難你唔到既，冷靜D，一定得既。
先係擺好姿勢…之後就係用力…一掟！！
好野！！所有野都好順利，全部做岩哂，正常發揮，之後就要祈禱啦。
我支鏢槍好似洲際導彈咁飛~~~呈一條拋物線咁插落草地，距離都算遠。
呼…第三呀..？我諗呢個應該都可以去到決賽既。
晨：「哦，扔得唔錯喎，睇黎你真係好有決心拎冠軍喎。」
我：「緊係啦，我要拎個全場總冠軍去氹返Anna架，頭先佢已經係度拎咗塊金牌，我都一定要係度拎金牌先得。」
晨：「好呀，我最鐘意同D認真比賽既人較量，大家傾盡全力去分勝負先有意思，我唔會因為你要氹女朋友就手軟架講明先。」
屌…我岩岩仲想叫你手下留情添…
之後過左一陣終於到佢掟，全部人都屏息以待，想睇呢隻怪物到底會唔會一掟掟到出太空。
佢功架十足，所有動作都好標準，十足十教科書教既一樣。
我諗全部人都唔意外，佢打破咗在場所有人既紀錄，擠入第一位。
無拍掌聲，亦無歡呼聲，大家都好平靜接受咗呢個事實。
佢自己亦無表達出任何高興雀躍既情感，只係冷冰冰咁行返黎，同頭先笑笑口既佢完全唔同哂。
無錯，同打係我身上既雨一樣，冷冰冰既。
認真mode…？
我個腦即刻記起呢個詞語，身體都即刻開始有種恐懼感。
我要同認真mode既佢鬥…？
雖然我既排名比我之後既選手擠低咗幾名，但我仍然以第六名成功打入決賽。
睇黎會係一場惡鬥咁喎…
入到決賽既我，緊張感比頭先多千萬倍，睇人掟既時候自己隻手都係度震緊。「要贏」呢個諗法一直係我腦入面打圈，而家每抖一啖氣我都係度諗住要贏。
唔知大家係咪同我一樣咁緊張，失誤比預賽個時更多，出現咗好多「死槍」既情況，到我掟既時候就只有一個成功留低咗紀錄。
呼…同預賽一樣個陣就可以架喇，放鬆D，唔好咁緊張，隻手唔好震，得既得既。
我深深咁連續吸咗幾啖氣，想舒緩緊張感，但都係無用，個心跳得快過小明跑步。
唉屌，合埋眼掟算數。
的確，合埋眼之後就無咁緊張，我將一切都交俾我既身體同運氣，向前一掟！！
「唉呀！」
喂做乜會有人慘叫架！？唔通我支槍插中人！？
我即刻擘大眼，周圍望睇下到底發生咩事。
無事呀…？我掟出去支槍唔單只無插到人，仲飛到好遠，比起初賽個陣好好多喎，甚至暫時拎到第一。
咁點解…會有人慘叫既？
我再細心D望多一次周圍既人，發覺有幾位Form 6既師兄係度對住我笑。
「陳同學，你可以返出黎啦，已經紀錄低你既成績。」
老師叫到，我梗係即刻出返黎啦，怕比人取消資格呀如果唔照做。
我一路行出黎個陣都繼續望住個幾位師兄，因為我真係好想知道佢地到底笑緊乜。
見到我係咁望住佢地，呢幾位師兄都開始感到唔自在，收起返個笑容之餘仲開始細細聲討論，呢一切都係係望住我底下做。
我無走埋去問佢地到底笑緊乜，因為咁做未免有D串，我唔想搞串件事。
我只係自己行埋一邊坐低，好似一個怨婦咁望住佢地幾個。
呢招居然有意想不到既奇效，過咗無耐呢幾位師兄主動行過黎我呢邊，第一句就同我Say sorry。
老老實實，我真係比佢地呢句sorry嚇親，我根本唔知道佢地為乜要道歉。
所以我今次就改咗個樣，變到扮傻，咩都唔知咁。唔係既，事實上我真係唔知佢地搞乜吖嘛，唔可以話扮既。
男師兄甲：「其實頭先D慘叫聲呢…係我扮既。
」咩話！？屌你老母頭先就係你嚇鳩阿叔我！？嚇到我幾乎瀨屎呀你知唔知？
我即刻又變多次臉，今次換成不屑，反哂白眼咁。當然，係玩下啫。
我：「想嚇死人咩大佬，係人地掟標槍個陣無啦啦慘叫，我仲要合埋眼掟，你地搞到我為我掟到人呀。」
男師兄乙：「哈哈，我地幾個就係見你好似好緊張，仲合埋眼，咪打算整蠱下你搞下氣氛，順便幫你抒解下壓力囉。
」男師兄丙：「點會估到你之後會嬲到牛咁眼望住我地，所以我地咪走埋黎同你地道歉囉。
」哦原來佢地以為我嬲緊所以先走埋黎搵我…
我：「哦其實我無嬲，我只係唔明點解你地幾個會望住我係咁笑，所以我先係咁望住你地啫。
」男師兄甲：「哦咁就好啦，幾驚你真係嬲，係喎你頭先掟得好好喎，有無咩技巧可以開心share？
」我：「哈哈多謝喎，但你都見到我係合埋眼掟架啦，完全靠運氣，邊有技巧可以分享。
」男師兄丙：「喂好似到晨哥掟…」
呢位師兄都未講完，我就聽到清脆既金屬碰撞聲。
我地幾個即刻望過去草地，睇下發生咩事。
只見一支鏢槍插係一個用黎做紀錄成績既金屬牌前方，係呢邊睇兩者可以話係零距離。
金屬牌既號碼係7號，係我既牌。
咁即係話…晨哥呢一掟…同我平手？
同預賽個陣一樣，大家係晨哥掟完之後都靜咗落黎，不過唔同既係，今次大家之所以靜咗落黎，係因為大家都好surprise。
應該無人估到晨哥會掟成咁？頭先預賽晨哥掟得遠好多架…
我唔敢講乜野，怕刺激到晨哥，你知喇，認真mode既佢係幾咁可怕。
出人意料既係，佢居然無乜反應，只係望咗支鏢槍一陣，就行開咗去坐低。
我…而家係咪有機會會贏？
第一Round好快過去，我好好彩仍然可以佔據第一位，晨哥就緊隨我後排第二。
真係無諗過會發展成咁，我仲以為會係我追住晨哥既尾添。
醒醒定定就唔會出事，可以將面金牌袋袋平安。
第二輪，亦係最後一輪馬上就開始咗，大家似乎都搵返狀態，水準返去預賽個陣。除咗第一同第二名，即係我同晨哥之外既排名都不斷變動。
話咁快，又輪到我掟喇。
我行去掟之前專登望下晨哥，一時好奇想睇下佢而家會有咩表情。
同我估既一樣，佢仲係咩表情，只係一味望住草地上既金屬牌。
喂喂…你表情未免太過恐怖啦掛？我地而家係學校陸運會咋唔係奧運會呀大哥…輕鬆D啦…
唉有D後悔望咗佢添，搞到我而家好驚添。
算啦好似上次咁合埋眼去掟啦。
我又好似上次咁連續吸咗幾啖氣，擺好pose，一下掟出去。
不過好可惜，因為支鏢槍被雨淋濕咗，掟出去既時候跣咗一下，搞到效果無想象中咁好。
最後成績都係用返第一次既紀錄。
而家我就只可以祈禱晨哥今次都失手…咁我先可以有更大機會拎到金牌。
而家就到我牛咁眼望住草地上既金屬牌，睇住D金屬牌既變動。
一個接一個改變位置，話咁快就到晨哥既一號牌。
求下你求下你求下你…
「chop！」
伴隨住呢一下非常清脆聲音既係一支鏢槍插落草地，毫無疑問，呢下係一下「生槍」。
而家就要睇距離…！
我無辦法冷靜，跑咗去班老師旁邊睇。
…
支槍…係我個牌後面…
輸咗…