「無啦啦多左幾個家姐同細妹 Season 2」: 困惑
Anna：「阿明，你點睇Kathy講既野？」
我：「呼…呼…而家就唔好理咁多住喇，既然佢唔想面對阿惠住，暫時就俾佢住係Ellen佢地屋企先。」
點解我會喘哂氣？唔好誤會唔好心邪，我只係同緊Anna係度練跑。
點解Kathy突然間會去咗Ellen Ellie屋企住？咁就要講返幾個鐘之前既事喇。
Kathy話返聖所羅王好似好奇怪，Sarah就問佢點解喇係咪因為阿惠，之後Kathy就同我地講咗好多野，內容大多都係圍繞阿惠。
佢覺得自己麻煩得阿惠太多，又要阿惠照顧佢，又要阿惠諗辦法係聖所羅王收留佢，佢覺得非常唔好意思。
佢好明白阿惠既心意，佢知道阿惠係想幫阿樂照顧自己，佢亦好感激阿惠有呢份心意。
只不過佢認為自己並唔配有呢種待遇，原因係自己曾經對我地做過好過分既事。
老實講，我又唔覺得真係好過分既，佢都只係被人利用啫，而且佢又識內疚，我唔嬲佢既。
但問題在於佢本身，佢過唔到自己個關既話一切都難搞。
令佢更難堪既係佢根本無可以返去既地方，父母唔係香港，而家又無咗Marcus既「支援」，佢只可以靠阿惠為佢提供住處。
佢之所以話話返聖所羅王好似好奇怪，就係因為而家佢著住我地既校服，但放學又去聖所羅王。
一聽到咁，身為學生會會長既Ellen就即刻走咗出黎。
Ellen：「咁你就黎我屋企住喇！
」佢當時拍哂心口，好有自信咁講呢句說話既樣我到而家都歷歷在目，好鬼搞笑。
雖然Kathy係咁用各種理由推卻Ellen熱情既邀請，但大家都知道一旦決定咗一件事既Ellen係好難被說服，所以最後Kathy都係比Ellen帶咗返屋企，就係咁喇。
哇唔經唔覺已經跑到去Anna屋企，即係已經跑咗一圈。
Anna：「但係咁落去都唔係辦法架喎…佢總無可能永遠住係Ellen佢地屋企架喎。」
呢個我都知，邊會有可能永遠住係Ellen佢地屋企吖。
我：「等過咗陸運會先再問佢喇，我諗佢而家應該好迷惘下，唔好chur佢喇。」
Anna：「哼，對佢就咁細心，對我地就愛理不理，講呀你係咪鐘意咗佢。
」喂又係咁？我關心其他人就話我鐘意人，如果我關心我老母咪亂倫？
係佢面前又點敢咁講吖，呢D說話收係心入面咪算囉係咪先。
我：「邊係啫有你地五個仲唔夠咩？話時話你唔嬲我嗱同我講咁多野既突然？
」Anna：「哼，見唔到個全場總冠軍我都唔會原諒你呀，我只係擔心Kathy所以先同你傾咋，因為…」
我：「因為佢係阿樂個妹吖嘛。」
我知道，Anna佢係想咁講。
Anna：「你明就好喇，唔講咁多喇我都要返入屋喇，有咩就whatsapp再講，Bye~
」佢講完就轉身走人，但我即刻叫住佢，唔俾佢走。
我：「喂攬下先走喇~~
」Anna：「攬你個頭你成身臭汗，快D返去沖涼啦。
」佢好靈活咁避開左我既擁抱，仲打左我個頭一下，之後就好瀟灑咁返入屋企。
好㚖咩，我又唔係好覺喎。不過佢都咁講，返去沖涼囉~
就係咁，我又自己一個慢慢跑返屋企啦。
一入屋企門口我就聞到好香既飯餸味，正呀屌你，岩岩跑完好撚肚餓。
我：「我返黎…嘩搞乜呀大家姐！！你做乜係屋企著到咁呀！？
」佢著到點？一身OL裝配一對黑絲斗零踭，最攞命係咩你知唔知呀？係佢仲要化行妝呀，好靚呀！！！
見到大家姐著成咁之後，我雙眼都無辦法離開大家姐，睇完一次又一次，就連檯上有乜好野食我都唔想望。
大家姐：「阿明你返黎嗱？我咁蓍好唔好睇呀？
」我：「好睇！
但點解…」Sarah「唔係呀大家姐，你應該要叫boss先係架~
」我都未問到原因，Sarah就打斷咗我既發言，但佢話咩boss？聽唔明喎我。
大家姐：「係喎係喎，一時太開心唔記得咗添~Boss~我咁著好睇嗎？你滿意嗎？
」咪住先…
我：「Boss…係叫緊我？
」大家姐：「哈哈~係叫緊你呀~大家姐我終於搵到工啦~聽日開始我就係你既祕書啦~
」我既祕書…？我有無聽錯？因咩事大家姐會做咗我祕書架？唔係，應該係話我做乜事無啦啦要有個祕書先係？
我：「點解…無啦啦我要有個祕書？
」我咁問完之後大家都你眼望我眼，但無人出聲。
睇黎佢地都無辦法好好解釋到我既問題架喇，算喇等陣我就去搵…
二家姐：「哦返咗黎嗱，唔怪得突然嘈咗咁多喇，岩喇一陣有野要比你。」
話口未完就已經聽到二家姐把聲，佢企係樓梯度望住我地。
係喇就係佢，想問清楚既話都係搵二家姐好D。
我：「二家姐岩啦你黎得岩，點解大家姐會做咗我祕書既，無啦啦我要個祕書黎做咩？」
二家姐：「啊，佢地無同你講呀？之前係Marcus手上拎返黎既股份而家已經全數轉到你既名下，你應該已經係全香港頭五十個最有錢既中學生喇。
」嘩做乜玩到咁大…？
二家姐：「我明白你而家可能有好多問題想問，但有咩都等食完飯先喇，我企係呢度都聞到你D汗臭味，我唔想同個成身臭汗既人同檯食飯，快D死去沖個涼啦。
」吓乜我個身真係咁臭咩，咁遠都可以聞到？
我再望一望身邊既人，大家都掩住個鼻望住我，坐係梳化既羽晨甚至用雙手掩住，搞到我好似放咗個好臭既濕屁甚至係瀨咗屎咁。
好喇好喇，我知道喇我去沖涼先囉。
我好快咁返上房沖咗個涼，之後頭都無抹就衝返落飯廳，但佢地已經開始食緊，無等到我。
今次，就連Uncle都係度，總算叫做真係一家人齊齊整整咁食餐飯。
雖然我遲咗加入呢場晚餐，不過都唔緊要，無損雅興，所有飯餸都仲係度，我一樣食得咁開心。
講開又講，D餸真係好好味，尤其係個鮑汁鵝掌，蘭姨D功夫真係世界級。
大家成餐飯都不斷談笑風生，講下自己D得意野，Sarah同Yui就當然係分享我係學校發生咗咩事喇，而大家姐就係咁講佢今日去shopping買咗D乜，全家人既氣氛都比佢地炒熱。
就連好似好耐無笑既Uncle都因為Sarah而笑咗出黎。
係啦，就應該要係咁，我想見到既就係呢D，大家都好開心咁笑住過。
食完飯之後就到咗我最期待既環節，解迷喇~~
我，大家姐，二家姐同Uncle四個人一齊上咗書房，仲要閂埋門，搞到件事好似又係好嚴重。
二家姐：「死咗條心把喇，唔會有你期待既野架喇，只係大概同你解釋下到底咩事啫。
」屌…你係咪識讀心架…
Uncle：「係，我都無謂哂口水喇，阿明我已經將係Marcus手上得返黎既股份轉讓咗比你，你而家係我地公司持股量頭三既成員喇。」
我：「等等先…點解要咁做…？」
二家姐：「反正佢遲早都係會俾你架喇，佢咁鐘意有個仔肯定會俾公司你，你而家袋住部分先咪當適應下。」
「嘛不過袋咗都無野要做既哈哈。」
嘩二家姐你呢番說話似係借我攻擊Uncle喎…
Uncle：「麗晨…你就係唔想俾阿明知道你真正用意？」
二家姐既真正用意…？即係話呢件事係二家姐做既？
我望望二家姐，見到佢臉色一沉，應該係被Uncle講中咗要害。
Uncle趁機會乘勝追撃，黎一個漂亮既反撃。
Uncle：「當初我打算交比你你又話唔要，叫我俾阿明，話咁可以幫阿明建立一個名聲，可以用黎震懾其他有異心既人，而家你居然話到係我有私心咁？對我唔係咁公平喎。」
二家姐唔要，反而提議比我…？
我：「你係想我有咗呢D股份之後就唔會有人敢搞我，所以Sarah同Yui就可以安安樂樂咁我過生活？」
二家姐：「哦？今次個腦又轉得幾快喎，完全正確就係咁喇。我之前已經同你講過好多好多次，要你好好保護Sarah佢地，唔好要佢地傷心，但可惜你一次又一次咁惹唔同既麻煩返黎，我咪唯有咁做。」
「反正我對公司，定抑或係對呢個屋企已經無興趣同期望，D股份就當係我比你既一份力量喇，可唔可以用佢保護到Sarah佢就睇你喇。」
二家姐講「屋企」兩個字既時候用一個極度鄙視既眼神望咗去Uncle個度，黎一個新攻勢。
我諗二家姐係話緊之前大家姐差D為咗救公司要嫁人既事，個陣搞到大家都好唔開心。
就係呢個時候，一直唔出聲得個睇字既大家姐終於開口。
大家姐：「咪住先阿May…你咁做唔會反而會更多人唔鐘意阿明，針對佢咩？」
二家姐：「凡事都有兩面既，會係邊面就要睇佢自己既造化喇，唔講咁多，我返房喇。
」「講開又講，一年前成身u記既窮鬼而家居然係一間大公司既股東，真係一個勵志故事，你不如去出本書鼓勵下人？
」二家姐講完就自己走咗，大家姐想攔都攔唔住，只好跟住一齊走，得返我同Uncle兩個人係書房。
我望一望佢，佢又望一望我。
氣氛有D奇怪，都係走先。
二家姐到底諗緊咩呀…