「無啦啦多左幾個家姐同細妹 Season 2」: 傻瓜

咁樣正面食Anna一腳，我諗就算係超人都會覺得痛。

而且我仲要唔係超人，咁樣食一個飛膝撞就扣左我九成既HP，成個人飛到差唔多九尺遠，仲撻左係地下。

令人感到困惑既唔只係Anna既攻擊，仲有Sarah佢地既態度，佢地見到我飛到咁遠，表情咁痛苦，佢地居然咩都無表示！你話有無搞錯！

我都未搞清楚到底發生咩事，Anna就已經再有進一步行動，佢走左埋黎，的定左我。

哇做乜你表情會咁恐怖架大佬，我又做錯D咩呀？

Anna：「你個白癡仔！！

」

Anna用一個震撼性既聲音去鬧我，幸好我既耳膜夠硬淨，無被震穿，不過唔多唔少都有D回音。

我：「我做錯D乜呀Anna姐…

」

扮慘，而家扮慘扮死狗一定係最好既方法，扮到咩都唔知，要Anna去解釋佢到底嬲乜，佢講講下既時候我又氹下佢，咁佢應該會下左啖火喇？應該。

Anna：「我咪叫左你唔好理我架囉！做乜仲要揀我唔要返自己公司！而家搞到無左間公司啦！咁我地呢排一直心掛掛到底為乜呀！

」

「你個傻仔，點解要救我…而家仲要擺出個一臉無辜既樣，叫人點嬲你…

」

都唔洗我氹佢，佢就已經自己喊左出黎…

原來佢係因為呢件事而嬲我…

而家都唔知邊個先係傻仔喇。

我想安慰佢，但係我而家仲比佢「的」住，雙腳仍然係離地，咁去安慰佢好似有D唔妥當。

所以我稍微用一用力，打算先掙脫Anna既束縛。

所有野都如我所料，我一掙脫Anna就嚇左一跳，我就趁機會攬住佢。

我：「因為我覺得你比公司更加重要囉，所以我咪揀左要你。」

嗱，咁樣講一定夠哂感動喇你話係咪？

咦？做乜佢會推開我既？

今次輪到Anna推開我，佢仲要轉身，用個背脊對住我。

Anna：「你傻架？你知唔知你間公司值幾多錢？你咁做會令你地屋企身家無咗幾多你又知唔知？」

「你真係蠢到無人有，咁簡單既數都唔識計。」

吓佢唔係仲嬲緊呀？

我：「唔係呢，咁事實上係我心入面你既安全的確係比公司重要嘛，如果我揀公司既話，可能以後都見你唔到，我唔想咁呀。」

「點講好呢，我同你幾乎每日都見，如果突然間無左你，我會好唔開心架。」

「加上公司對我黎講，其實都唔重要，我之前都有同你地講過喇，我係想同你地平平凡凡咁過日子，就算無哂錢都無乜問題架係咪先哈哈。」

「而且而家我地公司都無事，已經拎左返黎，所以唔好嬲啦好嘛？

」

我直頭雙手合十，求佢原諒，但奈何佢始終都唔轉身望我。

我都講到呢個地步，我都唔知仲可以做D乜去氹返佢喇，所以我求助於Sarah。

Sarah好快就接收到我既信號，佢再即刻同Ellen交換眼神，兩條友好快就走埋去Anna身邊一齊氹佢。

氹佢既說話其實黎黎去去都係個D，都係話我係個超級傻仔，包容下，又話我見到佢俾人捉左個陣驚到瀨尿之類既說話，痴線我邊有瀨尿，真係屈得就屈。

係Sarah同Ellen既五分鐘無間斷轟炸下，Anna終於開口講野。

Anna：「要我原諒你都得，陸運會你拎個全場總冠軍比我喇，咁我就原諒你。」

吓！？我今年淨係報左男甲100米咋喎！點拎全場總冠軍呀大佬！

Anna：「學校見喇咁。」

喂等陣呀！唔好走住呀！！

我叫都叫唔住Anna，佢已經一支箭咁跑左入屋了。

仆街喇今次…咁Anna咪一定唔會原諒我囉…

Ellen：「呵呵，有人有難了，Ellie我地都返去囉，我諗我要order定一箱花生爆谷啦，陸運會肯定有好戲睇。

」

Ellen佢係學生會主席，所以佢應該係知道我陸運會報左咩項目，如果唔係佢唔會咁講。

Ellen講完就拖住Ellie好開心咁走，走既時候Ellie仲對我苦笑左一下。

睇黎Ellie都知道呢個係一個不可能的任務喇。

Sarah：「咁我地都返去囉？大家姐佢地應該都等緊我地返去。」

唔記得講，Uncle，老母仲有兩位家姐都返左屋企先，因為今日搞左成日都攰架喇廢事佢地仲過黎陪我食風喇。

我：「好喇咁一齊返去啦，都夜架喇有乜留返聽日再諗。