「無啦啦多左幾個家姐同細妹 Season 2」: 再見
屏幕上既影像，係Anna被縛住係一張櫈上面，不斷爭扎。
大家見到咁都嚇左一跳，根本無人諗到佢仲有呢一手。
呢招以前阿威都有用過，當時係捉左二家姐，如果而家諗返，一定都係呢條友教佢咁做。
Marcus：「仲記唔記得係廁所個陣，你話面具已經唔會再有用，而我就話係咪真係無用呢？」
我：「唔通你…」
Marcus：「無錯喇，你估得一D都無錯，就係今朝我用呢個面具去搵呢位江小姐，佢真係以為我就係你，完全無懷疑過哈哈。」
我：「你個衰人！！」
我又忍唔住衝上去，想再一次一拳打落去佢個塊死人臉度。
但係，今次我打唔中佢，佢用手接住左我既拳頭，就好似晨哥一直做既咁。
Marcus：「今次唔會再比你打架喇，痛架因為。」
佢講完就一手推開左我，仲慢慢離開包圍網，走到去屏幕下坐低望住我地咁多個。
無人阻止佢，連晨哥都無，大家甚至退開形成一段路比佢行
佢既態度始終如一，睇唔起我地任何一個。
Marcus：「快D揀喇陳煒明，要江小姐定要自己屋企公司？」
如果係平時既話，我諗都唔洗諗一定會答要Anna，但如果我咁做既話我地屋企就會…
Sarah：「阿明，不如我地報警，而家咁樣既話我地就有足夠證據…」
Ellen：「係囉，我地根本唔需要向呢個衰人屈服，Anna就交俾警察救，我而家就報警…」
Ellen一邊講一邊拎出電話，但我見到佢雙手不斷震緊。
雖然報警好似好無用，但呢個的確係可以兩樣都保住既方法…
Marcus：「如果報警既話，佢就會即刻死喔。」
！？咩話！？
就係我以為自己搵到方法既時候，佢再一次封鎖我既希望。
Marcus：「唉我都知道你其實兩樣都唔捨得架啦，好喇我大發慈悲，俾多個選擇你把喇。」
俾多個選擇我…？
佢係衫袋度拎出一把軍刀，拋到我地面前。
Marcus：「如果你自殺既話，我就會將兩樣野都還俾你，呀唔係，應該話交返出黎先岩，因為到時你都收唔到啦哈哈。」
仲有呢個方法呀…？
我慢慢走埋去，執起把刀。
大家見到我咁都即刻衝埋黎㩒住我，甚至想搶走我手上把刀。
大家姐：「唔好做傻事呀阿明，唔值得架，揀Anna喇，公司無左可以再開過架嘛！」
阿雪：「係呀！我地都有辦法阻止佢架！你唔好咁衝動呀！死左就咩都無架喇！」
Sarah：「你死左既話我地點算呀！唔好呀阿明！」
雙拳難敵四手，我最後都係被迫放低把刀。
我突然好憎自己，憎自己咁無用，點解自己無辦法阻止呢一切。
我好想救Anna…我唔可以無左佢，但我又應承過大家姐佢地話一切都會變返好…
Ellie：「你點證明呢個係真既Anna，我點知你會唔會又搵人用面具去扮成Anna咁？」
係我就快崩潰既時候，Ellie突然挺身而出，旁邊仲有二家姐同晨哥。
Marcus：「唔…？仲可以咁冷靜分析，你真係唔錯呢陳二小姐。你地大可以打電話比佢，睇下會唔會係入面既人聽電話？」
二家姐隨即拎佢既電話出黎俾Ellie打，好快電話就接通，而屏幕入面既Anna，亦有人拎個電話比佢聽。
Anna：「阿明…」
同時，Anna把聲同時由場內既音響同Ellie手上既電話傳出黎。
Anna：「唔好理我…唔好屈服向呢個衰人屈服…」
的確係佢…真係Anna…
我頂唔順，成個人跌坐係地下。
大家聽到Anna把聲之後都好慌張，雖然而家人唔算多，但都好明顯feel到嘈左。
但佢地講D乜，我已經聽唔到。我而家個腦只係不停重播Anna頭先講既個兩句野…
真係Anna把聲…唔係其他人扮…咪住先，D面具可以連聲都Copy埋，會唔會都仲係有其他人扮佢既可能性？
唔係喎…Ellie打過去，係screen入面既人聽電話…而且兩邊既對話內容都係一樣，即係話Screen入面既人就係Ellie打比既人，亦即係Anna…
呀！！！我唔想再諗野喇！！！
我不斷用手捽自己個頭，唔理今日gel到有幾靚仔都好，我都起勢咁捽。
我甚至想扯走自己D頭髮，但最後我選擇左掩住自己對耳同合埋眼，去逃離呢個殘酷既現實。
絕望我試過好多次，但咁短時間內經歷咁多次絕望我真係第一次試，感覺真係極度辛苦，個心好似被人撕開幾忽咁。
我唔知道自己維持呢個狀態維持左幾耐，但帶我走出呢個狀況既人，係阿惠。
佢好用力咁拍左我膊頭一下，仲鏈住我膊頭，令我不自覺咁鬆開個對一直捂住耳既手。
阿惠：「起身喇，大佬明。」
唔知咩原因，聽完阿惠既一句說話，我居然自自然然企左起身。
阿惠：「唔好衰俾佢睇，條友就係想睇到你痛苦先咁做，點都唔好俾佢得逞。」
我：「我知道呀…但去到呢步我真係唔知應該點做先岩…」
二家姐：「就揀你認為更重要既野喇。」
就係我仍然苦惱緊既時候，原來所有人都已經圍住左我，所有人。
二家姐叫我揀更重要既野…？咁即係要我捨棄其中一樣？
我：「但係二家姐，Anna同屋企既公司對我黎講都係好重要…我真係揀唔落手…」
二家姐：「話明兩樣之中更重要，就應該只得一樣，自己好好諗清楚，到底邊樣對你更加重要。你點揀都唔會有人怪你。」
「佢講得無錯，呢個的確係為你而設既一個考驗。」
兩者更重要既…
我個腦開始運轉，但一秒都唔洗我就得答案。
我：「Anna。」我知道自己應承過二家姐會同佢一齊合作ko呢個衰人，拎返公司既股份，但呢個情況下，我真係無辦法再守住呢個承諾。
我真係唔想Anna有事，就算換成任何一個人都好，我都會選擇救佢地。
不過如果被綁既係呢類人渣，我肯定即刻話要股份。
大家姐講得岩，就算公司真係無左都好，都可以再建立，但人無左就會永遠無左，永遠都返唔到黎。
將兩者放係天秤上既話，高下立見，一定係揀人命。
大家聽到我既答案都無乜特別大反應或者反彈，就連睇公司睇到好重既Uncle同二家姐都係一樣。
二家姐聽到我講出Anna呢個字甚至笑左出黎，直接頭好似一開始就想我答Anna咁。
二家姐：「既然你已經落左決定，就去講啦。
」好，一於咁做。
我好似分紅海咁走開圍住我既人羣，再一次面對Marcus。
佢仍然係相當淡定，囂張至極，好似用表情話我知我無辦法贏到佢咁。
Marcus：「睇你個款睇黎你終於有決定喇？要我等咁耐，明明應該好易揀啫，如果係我既話我一定會即刻答話要股份。
」「學高登仔話齋，有錢你慌…」
我：「我要Anna，交返佢比我。」
我打斷佢既自言自語，嚇左佢一跳。
當我講完成句野，佢既表情已經唔同哂，由好自信變到好困惑。
Marcus：「What? Are you serious?
你揀要條女？你寧願放棄…」我：「係，公司你想要既就拎去，我淨係想要返Anna，交返佢俾我。」
Marcus：「救命，你未免太令我失望喇掛？我仲以為你會同張永樂唔同，結果你都係一樣，係最後既關頭先走黎令我失望。
」「你之前狠心到連朋友都可以送去坐監，而家居然因為一條女將全家人既身家都唔要？唔係掛？
」我：「我知道你想點，你想我揀你會揀既路，你以為我係同你同一類人，我可以話你知，我唔係，我唔會令你得償所願。
」「所以，俾返Anna我。
」我講完之後靜左一段時間，大家都無出聲，佢亦只係望住我，咩都無講。
沉默大概持續左幾分鐘，佢終於有所行動，佢企左起身，深深咁嘆左一口氣。
Marcus：「如果我話你知我都唔會令你得償所願呢？
」咩話！？佢想反口！？
Marcus：「Just kidding，我未至於係呢D情況下講過唔算數既。」
「放江小姐走喇，記住禮貌D。係呀，我話放佢走呀你係咪連廣東話都唔識聽？」
佢拎出電話，講左一句又收返埋。
之後我係佢後面既screen見到有人即刻為Anna鬆綁，仲帶走左佢。
Marcus：「嘛，咁應該無乜問題啦，我走喇咁，真係好玩，多謝咁多位為我提供一場咁精彩既娛樂節目。
」佢就咁係我身邊走左，氣定神閒咁走向大門。
我：「你真係會放走Anna？
」我忍唔住心入面既疑惑，擰轉身大聲問佢，佢都停低左，聽我既提問。
Marcus：「你連公司都比埋我咁濟，俾返你女友你都無乜所謂啦。」
我：「由此至終你既目的到底係咩…？」
Marcus：「呢句野你應該好熟既阿Batman，呢句野都可以形容我既目的既。」
「Some men just want to watch the world burn.
」佢留低The Dark Knight入面Alfred既名言之後就繼續離開，大家都無阻止佢。
但佢走到門口就停低左，仲停左好耐。
我開始覺得奇怪，想話睇下佢到底發生咩事，但佢就即刻訓低左。
佢身上仲插住一把刀。
而大門個度仲有另一個人。
Kathy。
呢一刻空氣好似凍結左，時間都一樣停滯左。
無人會估到事情會發展到呢個地步，所以根本無人知道而家應該點做先好，大家都呆左係度。
最先行動既，係晨哥。佢好快就回過神，跑過去Kathy個邊。
阿惠，阿天同阿信見到晨哥有所行動都跟左上去，我都係一樣，跑左上去睇下Marcus既情況。
跑到埋去個陣，Marcus已經成身血，佢自己捂住傷口附近既位置，但仍然笑緊。
真係唔明點解佢仲可以笑得出，大佬講緊會死架仲笑。
至於Kathy呢，阿惠捉住左佢，令佢同Marcus之間有一段距離，無得再補刀。
Kathy都同Marcus差唔多，佢一樣係度笑緊，但唔同既係佢同時都喊緊。
Kathy：「終於…都可以幫阿哥報到仇喇哈哈！
」報仇…呀？的確係既。
雖然佢講到好似好開心，但我感覺到佢已經係一個崩潰既邊緣，所以我都唔敢講乜去刺激佢。
阿天：「喂我地點做好，由佢死定送佢去醫院好？
」係喎差D唔記得Marcus添。
阿信：「佢仲不停咁標緊血喎，再唔止血既話佢死硬緊喎，幫佢蚊返把刀出黎先？
」阿天：「低能架你，如果真係蚊佢肯定失血過多呀，點做好呀藍洛晨。
」大家都係度等緊晨哥既指示，但佢只係冷冷咁望住訓係地下既Marcus，咩都無講。
我：「喂晨哥…我地都係call白車先喇，救人要緊呀。」
阿惠：「但係如果送佢去醫院既話，警察一定會問到底發生咩事，到時Kathy就會…」
係喎，咁既話Kathy就會被人拉…但再唔送佢去醫院佢就會死…應該點揀好？
Kathy：「無所謂，你地可以送佢去醫院，拉我都無問題，我已經報左仇，已經再無所求。
」我：「喂Kathy…」
Marcus：「哈哈哈哈，報仇，做得好，做得好咳咳..」
就係我想諗方法安撫或者開解Kathy呢種偏激既想法既時候，Marcus居然突然放聲大笑。
我：「喂你而家就咪出聲喇，你分分鐘會死架你知唔知。」
Marcus：「死又有乜所謂，我從來就唔怕死，反而要怕既係你地先岩，警察過幾日就會搵上門架喇。
」「你地想救Kathy既話都係快D夾定口供吧喇，我講過架喇，掌握住局面既人…」
晨：「答我，你想生定係死。」
就係Marcus繼續放肆，繼續大放厥詞既時候，晨哥拋出一句說話，一下就令Marcus佢收聲。
Marcus：「做乜呀而家，學我咁話囉？我知道你諗乜，你想趁我而家咁既樣就迫我交返D股份出黎？」
「我先唔會中你計，我死左之後我所有資產都會交俾我律師，而佢都唔會交返比你..地。
」晨：「咁你即係選擇死喇？
」Marcus：「係，寧願死我都唔會俾你地威脅到，你地永遠都唔會有辦法係我手上拎返D股份，因為呢個係陳煒明自己既選擇。
」晨：「係咩？但我諗我有辦法喎。
」Marcus：「哈哈，你又會有咩辦法…咳咳…
」晨：「就係十五分鐘前，我已經完成左幫你做面具個間公司既收購，佢亦已經開始著手幫我造你既面具。」
聽到晨哥咁講，唔只我，連Marcus都嚇左一跳，佢仲想起身，但礙於傷勢佢無辦法咁做。
Marcus：「哈哈，你果然好野，但你無我既指紋又無我把聲，你想點扮我？
」晨：「啊多謝你既提醒，聲音樣本我岩岩已經有喇，至於指紋呢…等你死左之後就割哂你十隻手指去採集喇。
」「而家掌握住局面，仲有你既生死既人係我呀。
」原來晨哥頭先唔出聲又咩都唔做就係準備呢D..？
晨：「原本我係打算將你既公司成間收購既，不過我又考慮到你可能將阿明佢公司股份以你個人名義持有，所以..總知一句講哂啦，你而家仲諗住就咁死都無問題？無意義架喎。
」勝負已分啦…而家就只係睇Marcus佢仲會唔會執迷不悟…
Marcus：「哈哈哈哈，我明白喇係我輸喇，你想點就點喇。
」晨：「你我都係聰明人，你知道我想你點既。」
Marcus：「俾返所有野你地，仲有唔好同警察講Kathy捅我既事吖嘛。」
晨：「仲有以後唔好做埋呢D無謂野。」
Marcus：「呢個我就無辦法保證啦，叫你仲會唔會救我？
」晨：「嘖，真係一個麻煩既人，阿信，叫你醫院派部車黎接佢喇，快。」
阿信：「係喎我屋企有間醫院架喎，我居然唔記得左。」
…
點都好，係晨哥既指揮下大家都開始行動，好快就有人帶住醫療用具黎左，檢查Marcus既傷勢，再帶走左佢。
佢臨走前仲同我講左聲再見，可以既話真係唔好再見啦唔該你。
晨：「嘛，而家就要睇佢自己既造化喇，你無問題吖嘛Kathy？」
晨哥將重點帶返去Kathy度，佢而家仲係好似頭先咁。
Kathy：「我頭先其實咩都聽到哂，我真係好憎好憎佢，佢害死我阿哥，仲講D咁涼薄冷血既說話，我個下真係好想直接殺左佢。」
「但當我準備捅落去既時候我又諗起我阿哥，知道就算我殺左呢個人都好，我阿哥都無辦法返黎…」
「我仲話自己報到仇…其實自己都殺唔到佢…哈哈…
」佢講講下就開始喊起上黎，我都唔知點處理好，交俾阿惠啦都係。
晨：「喂阿明，你快D走喇，去搵你重要既人。」
係喎，Anna…要快D去搵佢先得。
我擰轉臉想話叫Sarah佢地走，點知佢地原來已經聚哂係我背後。
我不禁笑左一笑。
我：「行囉。」
係同晨哥，阿惠，Kathy仲有愛麗絲佢地道別之我地就即刻飛去Anna屋企。
當我地到達既時候，Anna自己一個坐係門口，雙手環抱住自己。
我見返佢喇…好彩…
Anna：「傻仔明！
」嘩咩事呀！！
佢見到我之突然起身，仲跑過黎送我一個飛膝撞！
