「無啦啦多左幾個家姐同細妹 Season 2」: 奇跡

返到屋企，就只有老母同大家姐坐係度等我地。

佢地見到我地返黎都即刻問我地Anna點，有無受傷之類既問題。

受傷既話有啊，不過係我受傷囉好唔好。明明無做錯到都要比人鬧仲要比人嬲。

好撚委屈呀我真係。

我無答到大家姐佢地既問題，而係交比Sarah同Yui幫我答，我就自己一個返房沖涼訓覺。

原本我仲想搵二家姐傾下今晚發生既事，不過佢閂埋門，我又咁攰，就唔好打搞佢喇，都係訓返個好覺，養返好D精神先再講喇。

唉真係好耐無安安樂樂咁訓一個覺喇，希望之後一直都可以咁安樂喇屌。

唔知係咪因為腦入面係咁有呢種諗法，我一訓落張床無耐就成功進入夢鄉。

咁本應係一件好事既，但最大問題係我入錯夢鄉，入左個惡夢呀。

係我個夢入面，我差一個金牌先拎到全場總冠軍，而Anna就拎到女子全場總冠軍。

佢知道我拎唔到之後就「嘖」左一聲，頭也不回咁走左去。

我想追架，但入面既我跑左好多，對腳已經攰到癲，仲要不斷震，行都行唔到，莫講話追佢。

之後點？我都想知，因為我個陣已經嚇到醒左。所以如果你知既話不妨話我知。

我醒個陣Yui已經係我身邊，仲問我發生咩事做乜事係咁發開口夢同標汗。

我：「哦無事既…發惡夢啫，係咪嚇親你呀對唔住啊。」

Yui：「無啊…但係…」

但係？唔通我做左D咩白癡蠢事？

Yui：「就夠鐘返學喇…你再唔換衫去食早餐既話就會遲到架喇…」

遲到？嘩而家成七點架喇！？平時唔係六點半我仲未起身既話就會叫我架咩？

我：「好唔該我而家即刻換衫！！你返落去繼續食早餐喇，我好快就落黎！」

我有理無理即刻帶埋套校服跑入廁所刷牙洗臉，順便換埋套校服，我真係無乜幾可換衫換得咁快。

好彩，最後無遲到，仲可以食到早餐，不過要係車度食。

一大朝早就整D咁既野，唔通係唔好既預兆？唔通個惡夢會成真？

點都好喇，我都係要諗辦法報多幾個項目先得，如果唔係既話真係最多得一個牌架咋，衰過個夢入面。

所以我返學校之後第一件事就係去搵阿希，想睇下呢個成日話自己神通廣大，識好多人既佢到底有無辦法救到我。

阿希：「吓？你做乜而家先走黎加單呀？後日就係喇喎，點幫你加呀大佬。

」

我：「無…激嬲左女朋友，佢話要我拎個全場總冠軍比佢先肯原諒我喎。

」

阿希：「哈哈，有女都有有女既煩惱，但你今鋪真係神仙都難救喇，咁遲…咪住先…神…？

」

呢間學校一提起個神字大家第一時間會諗起咩？

梗係會諗起果個男人喇。

原本我打算叫埋阿希一齊去，但佢話因為D歷史問題所以唔去喇，所以最後又係我一個去搵晨哥。

去到班房，佢又唔係度，今次都唔知係第幾次了。

不過又未打鐘，係門口等下佢喇，話哂呢件都係一件重要事，我唔敢怠慢。

等左陣，佢終於出現，仲行得鬼死咁風騷。

晨：「哦？原來你係度呀？等我仲係你班房等你添。

」

係我班房等我？

我：「你都有事搵我咩？」

晨：「哦無，你一陣返班房就知架喇，你呢？搵我咩事？」

我之後就將成件事話俾佢聽，佢聽到頭頭是道咁款。

晨：「無問題呀，我一陣幫你同體育MISS講囉，你話我知你想報乜囉。

」

「不過真係無問題？我今年全部項目都有報喎。

」

屌你呀..？

好人好者為乜要報哂全部項目呀？好型呀而家？唔好以為自己靚仔又高大就大哂先得架。

我忍唔住用一個不屑既眼神望住佢，佢注意到我既眼神之後居然哈哈大笑。

晨：「哈哈唔好咁樣喇，我都係見今年最後一年我先報哂所有項目啫~邊估到你咁岩要氹Anna妹妹啫。

」

「嗱況且我係報唒所有項目喎，邊有可能夠體力贏哂先，可能你都係可以拎到埸總冠軍呢？

」

唔…雖然佢講到咁，但係我始終覺得事情發展最後會去一個完全唔同既情況。

不過我都無權要求人地因為我而唔參加比賽或者讓我，我又唔係邊個，加上比賽本身就應該要係公平公正，點可以用呢D旁門左道。

所以都係靠自己努力把喇。

即係話今次陸運會我一定要贏晨哥幾次先有機會拎到全場總冠軍喇…？唉難度即刻幾何級數上升。

盡人事喇都係，今日開始練返跑先得。

之後學校就打鐘，我都開始慢慢行返自己班房。

唉而家成個腦都係陸運會輸比晨哥既畫面，真係諗起都覺得驚。

講真吖，晨哥運動神經咁好，之前睇過佢打幾次籃球屈機到癲，要贏佢，仲要贏幾次既話真係除咗奇跡之外都無乜可能。

咦，做乜入面咁嘈既？唔通又有咩八卦是非聽？快D入去聽埋一份先。

因為從外面就可以聽到班房既嘈吵聲，我加快咗腳步行入去，想睇下到底咩事。

一入到去就見到好多人圍係其中一張檯附近，呢個場面好似似曾相識咁既。

浩賢又係自己一個坐係一邊，望住堆人羣。所以我走埋去佢度，問下佢因乜解究咁熱鬧。

浩賢：「哦，Kathy終於返咗黎囉，就係頭先晨哥帶佢黎既，講開又講，晨哥好似搵你。

」

我：「哦哦唔該你，我頭先已經見過佢。

」

不過Kathy返咗黎？點解咁突然既？

我唔該完浩賢之後就嘗試接近人羣堆，去見下Kathy，順便問下佢咩事。

點估到Kathy既人氣高得可怕，想逼入去都逼唔到，唔知仲以為呢度有幾百人逼緊咩限量或特價野。

我就逼唔到入去，不過阿希就係人羣入面走出黎，仲好開心咁款。

阿希：「喂阿明，Kathy返咗黎呀！

」

我：「我知喇，頭先浩賢話咗我知，你睇落好高興咁喎。

」

阿希：「小小喇哈哈，咁我地係咪一定夠人跑學會接力呢？

佢頭先話好期待陸運會啊。

」

啊學會接力…係喎仲有呢件事喎，我前日仲問過Kathy有無興趣黎玩下，唔通佢就係因為咁而返黎

我：「我諗係喇，個班友仔聽到Kathy返咗黎的話應該好願意參與既，再或者可能Kathy自己親身落場呢？

」

阿希：「哈哈諗起都開心，喂係喎而家諗起你早排講既野，話Kathy或者會返黎玩陸運會，而家佢真係返咗黎喎！咁神奇既你！

」

我：「哈哈，我都係9up下啫。

」

講真我真係無諗過會成真，點估到Kathy真係會返黎，仲要係件事過咗一日就返。

阿希：「而家睇直就係奇跡咁款添啦~

」

奇跡呀…？算啦阿希開心咪得。

我最後都係無同到Kathy講野就返咗埋坐，個陣Cody已經坐低咗，好似浩賢咁望住Kathy個邊。

我無主動撩佢傾計，只係默默坐低。

Cody：「佢終於返咗黎喎。

」

唔？佢係同我講野？

我掛住收拾書包入面D野，都無望到Cody，唔知佢到底係咪同我講野。

我望過去佢度，咁岩呢個時候佢又望過黎，大家就對望左一下。

我：「你同我講緊野？」

Cody：「廢話喔，呢兩行而家得你同我，唔係同你講唔通我同空氣講呀？」

係喎，幾乎全班人都係Kathy個邊，呢兩行又真係得我同佢兩個。

我：「哦，係呀我見到佢我都好surpirse，不過大家見到佢返黎都好似好開心咁。

」

Cody：「話哂佢本來係度個陣就已經好受大家歡迎，唔見咗咁耐而家突然返翻黎大家梗係一窩鋒去關心佢喇。」

我：「well，聽落你好似唔係咁開心喎，提子人地受歡迎呀？

」

Cody「痴線我邊有，佢返黎我都開心既，而且佢返黎既感覺好似唔同咗，無第一次見佢咁奇怪。」

我：「係喎，我記起你第一次見到Kathy個陣講既野喇哈哈。」

Cody：「笑乜，我個陣真係覺得佢個feel好奇怪，扮到好想同我地friend但自己就收收埋埋，笑得又假，皮笑肉不笑咁。總知就係好似黎想攞D野，攞完就走咁。」

Wow，佢講既野大部分都中喎，如果佢真係好似佢講既咁，一開始就睇到的話，佢真係好勁喎。

我：「咁而家呢？」

Cody：「而家？好似變nice咗囉，你地之間係咪發生咗咩事？

」

我：「我？關我咩事呀？

」

Cody：「仲未講得呀？咁當我無問過囉。

」

哦係喎我話過遲D會話俾Cody知Kathy既事，估唔到佢會追問，咁八卦都有既。

我：「哦，小事啫，佢對我同我D朋友有D誤會，早排我同我朋友搵到佢，大家解返開個誤會，佢可能一時接受唔到，自己匿埋咗一段時間咁囉。」

「佢而家返黎，我諗佢已經諗通哂…掛？

」

咁講應該可以喇掛？

Cody：「講D唔講D，正撚樣。

起立！」

痴撚線無啦啦鬧人都有既。

不過佢都提醒咗我，應該要同Kathy傾下？

唔止同學，就連老師，特別係班主任Miss Leung見到Kathy返黎都好開心。

Kathy都好快融入返我地，無論係圈子定係讀書都係，真係想知佢呢排都有自修，如果唔係既話佢點解可以追到我地進度。

我諗最開心既人應該會係阿希喇，我見佢成朝到而家都掛住個笑容黎上堂。

佢會唔會仲係想溝Kathy呢哈哈。

唔知係咪因為氣氛好而且大家又開心，一個上晝好快就過去，又到咗食lunch既時候。

啊，睇下佢地得唔得閒一齊食lunch先。

我打開我地既Whatsapp Group，send 出一句簡單既 ‘lunch?’

好快，電話就震了，仲要係連續震左幾下。

哇。Ellen，Yui都話學生會有好多野做同唔到我食，Anna呢，就咁覆一句唔食。

好彩Sarah同Ellie話無問題，話係門口等。如果唔係既話我都唔知搵邊個陪我食好lu。

我慢慢行去門口，唔知點解我就係想放慢腳步。

而家好似已經無野需要我趕，除左急屎。加上趕乜鬼吖，不如留返D力水放學去練跑好過喇。