「無啦啦多左幾個家姐同細妹 Season 2」: 惡魔

因為佢，我先有而家既一切？

因為佢…我先有得係聖所羅王讀書，我先可以遇到Sarah同Anna佢地？

呢一切唔係咩命運或者奇蹟，而係由一個人所掌控住..？

Ellie：「就算係有呢個制度都好，點解你要揀阿明，仲要做咁多野去騷擾佢，個制度應該係比你地去暗中觀察，而唔係去干預先係。」

Ellie突然出聲，中止左 Marcus既狂野。

Ellen：「係囉係囉，仲要明明阿明佢已經轉埋校，點解你仲要搞事，仲去到搞佢地屋企既公司？」

而家連Ellen都走埋出黎…但係我一時三刻仲係接受唔到，甚至後退左兩步。

但好快我就停低無再向後退，因為我撞到人，撞到二家姐。

佢咩都無講，只係用雙手捉住我膊頭，好似叫我留低咁。

我知道我係要留低，只係…

Marcus：「點解係佢？哈哈，其實原本我既第一順序唔係佢架，原本我係打算揀Kathy阿哥，張永樂。」

佢話…係阿樂？佢原本係揀左阿樂？

Marcus：「係你入學前一年，我都有揀一個基層出身既人幫佢入讀聖所羅王書院，就係張永樂。」

「至於點解要咁做？因為我覺得用六七年時間係一邊睇佢地成長，再評估佢地到底係咪符合自己所需要既人才實在太哂我時間囉。」

「倒不如我暗中，唔俾人意識到既情況下去係學校策劃，引發起一D事件，去測試下咪仲好，咁慳返好多時間。」

係學校引發D事件…？佢？點做到架？

Marcus：「張永樂佢第一年既表現令我好滿意架，成績好好，就算佢係學校俾人排擠，一個朋友都無都好，佢都表現得好優秀，好有做公司管理層既潛質。」

「不過我點都估唔到佢係遇到你之後會捱唔過我為佢準備既考驗。」

「呀，無錯，就係出貓個次，其實係我安排。」

阿樂出貓件事係佢做既！？

Marcus：「開頭我打算睇下佢有無方法係面對指控既時候為自己討回公道，點知佢居然咩都唔做，啊唔係，佢選擇左逃避，跳樓自殺。」

「原本我打算只要佢可以通過呢個考驗，到佢畢業既時候我就會招攬佢入我既…」

我無等佢講哂成句野就衝左埋去，一拳打埋去佢度。

我唔知力度有無好似晨哥講既「比頭先大力十倍既力度」，但呢拳已經係我可以揮出最重既拳。

佢即刻仆低左，當我想乘勝追擊，再打多佢一拳就已經比其他人攔住我。

我：「放開我！！係佢！係佢害死阿樂架！！」

Sarah：「唔好呀阿明！冷靜D呀！打佢既話就中左佢計架喇！」

Yui：「佢會報警架，到時你就會有案底…」

就算Sarah同Yui講左成千上萬句野去安撫我，我仍然無辦法冷靜落黎，拳頭仍然係握緊既。

就係我如此激動既同時，佢居然又再發出個把奸到好似魔鬼咁既笑聲，仲慢慢咁企返起身。

Marcus：「岩岩個拳既話我唔會報警呀，唔錯既個拳，而且我欣賞你為朋友報仇呢種心態。」

「不過你應該搞清楚，害死你朋友既人係你自己而唔係我。我只係引發起件事，佢絕對有能力去解決。」

「但係佢因為你，因為唔想連累到你地幾個，所以先選擇自己攬哂上身，等其他人無辦法再因為呢件事大做文章。」

「居然因為擔心會連累到班識左一年都無既朋友而選擇自殺，我對佢真係好失望。」

「不過佢既死都有些微價值既，就係俾我重新發現左你呢個絕好既人才。」

「今次我學精左，用幾年既時間去籌備，不過世事呢家野真係無奇不有，邊有人估到你會突然成為曹家既人。」

「你完全超出我預期，居然去到最後仲成為七星，名流社會上既地位甚至過左我。」

「所以我煽動你朋友既妒忌心，去俾第一個考驗你。」

朋友…？唔通佢係指…

呢條友…用惡魔都不足以形容佢…Ellen：「無可能…你邊有辦法做到呢個地步…」

Marcus：「小姐，你要知道呢個世界係有住千百萬種可能，只要你有夠多既錢，你想點都可以。」

「之後既事我諗我都唔需要多講喇？Kathy扮成阿樂去向你報仇等等一連串事都係我安排，而你都一一解決左，雖然唔係完全靠自己。」

愛麗絲：「咁點解阿明離開左聖所羅王之後你仲要追撃佢？應該已經唔係個制度既範圍喇。」

晨：「因為見阿明拋棄哂所有野，所以你覺得佢好有意思，想睇佢如果再遇上呢D野會有咩反應，我有無講錯？」

Marcus：「不愧係你呀藍洛晨，完全明白我諗乜，我有時會諗其實我地兩個都幾似，你覺唔覺？」

晨：「我先唔想似一個比人渣更人渣既人，你做既野完全就只係為左睇人係痛苦下生活。」

「人地遠離是非，只係希望同身邊既人開開心心咁過日子，但你仍然執意去破壞人地既寧靜，你真係我見過最差既人。」

晨哥一連串既發言令在場既人都不斷點頭，我都係其中之一，因為句句都係我心聲。

唯一笑既人，就只有佢自己。

阿天同阿信呢個時候都行左出黎，仲拎左份文件出黎。

阿天：「最後警告，簽左呢份文件佢，將陳煒明屋企公司既股份全部交返出黎，咁既話我地就唔會用最後既手段。」

Marcus：「我諗你地仲未搞清楚情況，我之所以會比你地捉住係因為我想咁，唔代表你地掌握住局面。」

「掌握住局面既人由始至終都係我。