「無啦啦多左幾個家姐同細妹 Season 2」: 天真
六個七星…全部都係哂度…
佢地幾個見到我之後都紛紛走埋黎問候我。
當然，係有禮貌個種問候喇。
阿雪：「阿明~我地黎左喇~~
」阿雪第一時間捉住我，好似以往咁不斷請我食波餅。
我想推開佢架，不過佢夾到實一實，我又唔想用力整親佢，所以我就由佢喇。
諾儀：「阿明，你ok吖嘛？」
我：「ok！梗係ok啦，做乜咁問？
」愛麗絲：「唔洗扮喇，我地早幾日就收到阿晨同李Uncle通知，知道你屋企有事喇。」
阿信：「如果順利既話，條友今日應該會出現
」阿天：「藍洛晨頭先咪話左囉，條友已經出現左，你有無聽架？
」阿信：「喂我同你講你咪惹起我把火呀，我今日係俾臉阿明所以先肯同你同場架咋！
」阿天：「係惹你又點呀吓？你估我又好想同你一齊出現咩？
」喂做乜呢兩個人會無啦啦自己嘈起上黎架…
阿雪：「喂你兩個咪嘈啦，今日係黎幫阿明架，私人恩怨放埋一邊先ok？
」阿雪唔知幾時走左埋去分開阿天同阿信，仲推左佢地兩個一下。
不過佢岩岩話佢地今日黎係幫我？我有無聽錯？
晨：「係喇，有乜想嘈留返下次先喇，照之前講既去做，阿天阿信你地既人守係出入口，一旦Party開始就有入無出。」
「其餘既…有乜做呢？唉自己執生喇咁大個人。
」「阿明你都去台邊準備下喇，May姐係個邊等緊你。」
我：「點解你地要幫我..？我明明都已經唔係七星…
」阿雪：「啱啱相反呀，如果你係七星既話我先唔會幫你呀~
」諾儀：「我地幫你係因為我地當你係朋友呀，之前都話左架，有乜需要既話就搵我地，但你又唔搵我地，我地咪唯有自己黎囉。」
朋友呀…？佢地幾個全部都當我係朋友？
晨：「行喇屌，係度哂時間。
」晨哥唔俾我思考既時間，用力推走左我。
最後我行到去台邊，二家姐，仲有Sarah佢地四個都係哂度等我。
二家姐：「招呼完人嗱？準備下喇咁。一陣就跟住我講既說話去做，首先戴住呢個耳機。」
耳機…有乜用？我拎住二家姐俾我既無線耳機係度睇，打量佢到底係乜用途。
Ellie：「一陣我會透過呢個耳機同你講野，內容會係致辭會用到既，我講完一句你就跟住我講就可以喇。」
我：「Ellie…你應該去陪你嫲嫲先係…而唔係…仲要你幫我哂心機係呢D無謂野度我真係…」
Ellie：「尋日咪話左囉，唔好介懷呢D小事喇，嫲嫲個邊我都已經打左電話去講，佢仲叫你加油添。」
連Ellie嫲嫲都幫我打氣呀…一定唔衰得喇。
二家姐：「除左Ellie幫你應付講辭之外，如果Kathy一發現條友的話，佢都會用呢個耳機去通知你，到時我會教你點做架喇。」
Ellen：「到時我一定第一時間衝上去捉住條友添呀！」
我：「咪呀你，條友唔知會唔會有乜武器…」
我說講到一半就停低左，因為又有人出現係我面前。
係Uncle。佢睇落消瘦左唔少，頭髮好似都白好多，總之一個字去形容，殘。
Uncle：「你地幾個…萬事都要小心…」
二家姐：「得喇呢度無你既事，你去家姐同Auntie個度把喇。」
哇二家姐既語氣超惡，佢仲係同Uncle唔岩啞？
但我而家都唔時間理呢件，因為已經夠鐘，大會安排既MC已經開始係台上炒熱氣氛。
講開先講一句個仆街MC真係同個乜鳩阿Bob有得揮，把聲又大語氣又衰，聽到就想轉台個種。
不過算，呢個唔係重點，我忍。
之後就到我出場既時間，我係眾目睽睽下行上台，大家見到都拍爛手掌。
我上到去台第一件做既事就係先scan一次台下既人，想睇下有無乜人係有可疑，係同聖所羅王有關。
但咁快速scan一次又唔覺有乜人係有可疑喎…
Ellie：「先唔好理喇阿明而家專心做好致辭先喇。」
岩，Ellie講得岩。
我之後跟住Ellie講既每一個字去講，好順利做出一篇應該完美，令人再次拍爛手掌既致辭。
其實我講左D乜我都唔知。
台下甚至部分人企起身鼓掌，令我懷疑我係咪真係講得咁好。
不過係呢個時候，耳機傳黎另一把聲音，係Kathy把聲。
Kathy：「我見到喇！係佢！！中間…沙沙沙…」
喂做乜突然有雜音既！？我聽唔到Kathy講野呀！！
「噗！」
嘩連燈都熄埋既喂！？咩事呀？
「唔好慌張，我會處理。」
二家姐把聲！？
係耳機聽到二家姐把聲之後幾秒，會場就即刻有返燈，仲多左一盞射燈，照住台下一個人既背脊。
之所以影住佢背脊，係因為佢離開左坐緊既位置，向門既方向走緊。
佢亦知道自己比射燈照住，停低左步伐，擰轉頭望上黎舞台。
呢個人…好似係邊度見過？
其他賓客對於突如其來既狀況都感到不知所措，目光紛紛投向射燈下既男人。
佢真係好熟口熟面喎，我一定有見過佢先係。
二家姐：「Kathy你sure係佢啦嘛？」
Kathy：「係！我唔會認錯！」
Kathy同二家姐既對話透過耳機傳入我耳中，我仲聽得出Kathy好激動。
二家姐：「好，阿晨做野啦。」
二家姐叫晨哥做野…？嘩！！
突然間會場黎左好多戴哂黑超既西裝友，佢地仲帶走左其他既賓客同記者，成件事黎得好突然，都無五分鐘會場就已經剩低我地。
當然，仲有個個人，射燈仍然照住佢，仲有幾個西裝友圍住佢，唔俾佢走。
就連係會埸各處既七星都開始走埋去，總知就係將條友重重包圍住啦。
二家姐：「落黎啦阿明，搵到佢喇我地，終於。」
最後，我都落埋去，走到去條友面前。
走到埋去我先發現，就算條友被我地重重包圍，佢都仲係笑笑口，好似完全唔驚，好似早就知道會咁。
既然Kathy認得出佢就係M，咁佢會有咁既氣焰都好正常既，畢竟佢有能力搞出咁多事…
佢種氣勢似邊個呢…係！似晨哥！好似！
M：「咁係咩意思呢咁多位？十幾人圍住我一個？仲帶走哂其他賓客記者，想對我做D咩？」
呢把聲…
二家姐：「原來係你，搞出一切既人就係你。」
「Marcus。」
Marcus…？呀！係上次Party走埋黎打招呼既人！
Marcus：「唔？我唔明你講咩喎？咩叫搞出一切既人就係我？我咩都冇做過喎，我只係想去個洗手間啫，咁都有問題？」
晨：「咪做戲啦好令人反胃呀，你估我地真係會咩證據都無就求其捉條柒頭咩，加上你自己根本就想比我地捉到，我有無講錯？」
佢想比我地捉到？
Marcus：「哈哈，果然你真係一個好麻煩既男人啊藍洛晨。」
「無錯，係我，呢幾個月既一連續事件都係我做既，我估Kathy而家應該都係度？如果唔係你地應該認唔出我先係。」「不過，就算知道係我你地又可以點做？」佢好有自信咁講呢番說話，大家一時三刻都愕左然。
佢乘勝追撃，繼續發表佢既「偉論」。
Marcus：「你班人真係天真到一個點，以為搵到我出黎就可以解決所有野？」
「你地可以對我做乜？打我？殺左我？呢D都係犯法架，你敢郁我我就即刻報警添呀。」
「我同你地講呀，係呀我係有心比你地搵到，因為我知道就算你地搵到我都無我辦法。」
「我係用正當方法去收集你公司既股份，係正當既商業行為，阻止唔到股份流向我個邊係你地無用。」
「你地而家想靠呢D威嚇手段去拎返D股份？諗都咪諗呀哈哈。
」阿天：「我同你講我而家即刻搵人殺咗你都仲得呀！唔會有人知！
」阿天突然推開堆西裝友，走到去Marcus面前，雙手捉住Marcus衫領，好似真係想打落去咁。
不過，無人去阻止。大家都用一種副厭惡既眼神望住Marcus，好似大家都好想Marcus死咁。
Marcus：「呀好得人驚~~好可怕呀~~~七星要殺人呀~~」
「我今日黎之前就已經通知左我朋友，如果聽日我無搵佢報平安既話佢就會去報警，所以如果你真係要殺我既話你好快d準備定律師喇哈哈。
」呢個人到底係咪癲架…
愛麗絲：「放低佢先喇阿天，而家仲未係決定要點處理佢既時候。」
阿天好不情願咁放低左Marcus，之後就退埋一邊。
Marcus：「哈哈，奈我唔何呢？」
愛麗絲：「唔係奈你唔何，最壞既解決方法我地都已經準備左，我地根本唔怕你。」
「不過係行呢一步之前，我諗有必要搞清楚D野先。」
「點解你要針對阿明？佢應該同你無仇無怨先係。」
係喎，我都比Marcus既瘋狂影響到搞到一時間醒唔起呢個問題添。
愛麗絲問完之後大家都等緊Marcus回答，但Marcus就好似失去理性咁係度笑。
就好似係倉庫被識穿身份既夜神月個陣咁。
Marucs：「因為好好玩啊！玩弄一個人既人生！
」「你地唔係唔知道聖所羅王既隱藏制度呀？」
聖所羅王既隱藏制度…？
我同Sarah佢地幾個聽完之後對望左一陣，因為我地根本都未聽過呢個所謂隱藏制度。
Marcus：「啊，話明隱藏制度，你地呢班曾經係入面讀書既唔知都好正常既，不過個邊個阿叔仲有藍洛晨既話你地應該知道先係？唔好諗住扮唔知呀藍洛晨，我知道你最近都係度打探緊呢件事架。
」阿叔係指Uncle…？而家呢度可以稱得上阿叔都只係得佢啫。
佢兩個知道？係點知道架？
唔只係我，就連在場既其他七星都同我有同樣既反應。大家好似都唔知道呢兩個人其實係知道呢件事。
晨：「你呀，將個制度用係一個完全相反既方向度呀知唔知？
」晨哥終於開聲，語氣相當不悅，眼神好似想食人咁，毫無疑問已經入左認真Mode。
Marcus：「係咩？我覺得自己無做錯喎，反正最後都係向緊同一個目標啫。
」晨：「你就係因為咁所以先一次又一次針對佢…？你到底係點睇中佢？
」完全聽唔明呀，仲覺得呢兩個人既對話好奇怪，尤其係晨哥佢D用字好似有陣GAY味咁。
我忍唔住要打斷佢地既對話。
我：「你地可以解釋你地口中既隱藏制度未？我完全理解唔到你兩個到底講緊咩呀。
」我成功扭轉佢地既注意力黎我呢邊，不過佢兩個既反應就相當兩極。
Marcus聽到之後又開始係度大笑，而晨哥就係好嬲。
Marcus：「可以呀，佢唔講既話就等我而家話你知，聖所羅王書院既另一面喇。
」「專收有錢人，係有錢同有權勢既人既天下，呢個應該係普遍人對以前聖所羅王書院既印象？」
「仲有用黎培訓李家繼承人呢個功用，我有無講錯？」
我：「係呀，咁又點？呢D關你話既隱藏制度咩事？」
Marcus：「唔通你真係從來都諗過點解當初你，一個係基層出身既人都可以入學？仲拎到學費減免？」
佢想講D咩呀到底…唔通佢係想話…
Marcus：「無錯，當初係因為我，你先可以入到聖所羅王書院。」
「所謂隱藏制度就係一班大企業既老闆會每年dup一大筆錢落去聖所羅王書院，目的就係用黎觀察有無合適既人才，日後可以幫到佢地既公司。」
「而呢筆錢會用係咩地方？就係你個時收到既學費減免喇。」
唔撚係掛…？即係話我至今既人生，都係因為呢條友先有？
