「無啦啦多左幾個家姐同細妹 Season 2」: 結果
雖然個心始終都係有根刺，但我個人總算開心返好多。
諗返尋晚大家姐講既說話，呢一切都好有二家姐既作風。
咁我都要好好報答二家姐先得，要好好咁過日子。
我諗起以前，二家姐叫我要好好對Sarah，唔可以要佢傷心。
估唔到二家姐居然會為左Sarah開心而做咁多野，睇黎佢真係好錫Sarah。
Yui：「阿明，夠鐘食早餐啦。
」我：「嗯，而家落去架啦。
」呢個面罩，就收埋佢啦。
唔？無錯，其實我一朝起身又走左去睇個面罩。
過左去既野，就真係由佢過去啦。
我之後就同Yui一齊行落去飯廳，少有地，二家姐已經起左身，仲食緊早餐。
感覺敏銳得可怕既二家姐好快就注意到我望住佢，佢都望左過黎我呢邊。
係大家四目交投既一刻，我選擇左用笑容回應。
二家姐：「你笑得好核突。
」二家姐講完就繼續食佢既早餐，無再望我。
被咁話既我，呆左咁揸住隻叉，Sarah佢地見到我咁都忍唔住笑左出黎，就連Yui都笑埋一份。
二家姐食完佢份早餐之後就咩都無講咁離開左餐檯，行左去泳池個邊。
在場既人都目送佢離開，但無人講任何野或者做咩野。
直至二家姐佢消失係大家視線範圍，大家先繼續食早餐。
Uncle：「聽你地講，今日係學生會投票日喎，緊唔緊張呀泳琦？
」Yui：「少少…」
Sarah：「一定候到既，之前候選內閣辯論大會Ellen講得咁好，你地D政綱又咁好，一定會多人投你地架啫。」
「阿明你話係咪？
」我：「係啦，你地咁俾心機，一定會成功既。
」之所以我知佢地咁俾心機，係因為我有好幾晚都見到Yui凌晨三四點仲係度畫緊宣傳用既Board。
Yui：「希望喇…
」我又諗起上年我地選學生會個陣添，時間過得真快。
老母：「好啦，都差唔多夠鐘啦你地好行啦。」
Sarah：「我隨時行得架啦~」
Yui：「我都係。」
我：「啊…等一等我。」
我講完之後就急急腳離開餐檯，走到去泳池。
無錯，我係去搵二家姐。
二家姐坐左係池邊既沙灘椅度，專心望出出面既景色。
佢披左浴袍上身，背向我。成個畫面都好靚。
但好快佢就注意到我，側一側頭望左過黎。
二家姐：「係咪有咩事？」
係喎…我過黎係想做乜呢？
我：「無，想同你講聲我地去返學啫。」
二家姐：「啊？哦咁路上小心喇。」
佢講左之後就繼續睇佢既風景，而我都開始轉身走人。
「多謝。」
我臨走之前好細聲咁講。
有個咁既家姐，真係好。
之後我就同Sarah，Yui一齊返學，我地仲係學校門口撞到Anna同Ellie。Anna：「傻仔明，終於捨得笑架咩，呢排都死老豆咁既款。」
我：「咁我親生老豆的確死左嘛，雖然已經係好耐既事，咦Ellen呢？
」Ellie：「佢好早就出左門口啦，應該係返左黎set野。」
我：「哈哈，我明佢點解會咁既，話哂佢恨左做學生會會長咁多年。」
Sarah：「唔知我地有無乜野可以幫到Ellen呢？」
Ellie：「而家的話應該就無喇，不過我地可以預先準備下慶祝Party或者安慰佢既Party既。」
Sarah：「好，咁我一陣就去準備下啦，Party係邊度開好？」
Anna：「如果係阿明間soc房搞，你話得唔得呢？」
我：「一陣lunch time再傾啦，而家上左堂先。」
Anna：「扮咩好學生吖你。」
我地就係咁，係一遍喧嘩聲下行下雨天操場，仲俾我地見到Ellen。
佢一個人係度擺緊「Eden」既攤位，Yui見到咁就即刻行左埋去幫手，Ellen見到佢成個人即刻好開心，捉到Yui實一實。
Ellie：「你唔過去幫手？你女朋友喎？」
我：「哈，咁你又唔過去？你家姐喎。」
Ellie：「唔知呢，我覺得係呢邊睇就夠。」
我：「我都係，覺得咁樣既佢好靚。」
咁樣認真做野既Ellen，真係別有一番魅力。
返到班房，大家都係度討論緊今日投票日應該投邊個好。
但係，始終都見唔到Kathy既身影。
就我聽返黎我地班好多人都話會投「Eden」，話佢地既政綱好，主席又靚女之類。
我聽到佢地讚Ellen靚女我都不禁沾沾自喜，心諗洗乜講，我女朋友黎架。
今次Ellen贏面應該好高啦，一定會係慶祝Party啦。
阿希：「喂阿明，你有無聽講話Form 6既人會唔投票呀？」
我：「吓？無喎，點解佢地要咁做？」
浩賢：「係晨哥啦，佢叫Form 6既人唔好投票。」
晨哥點解要叫人杯葛今次投票呀？
我，黑仔仲有阿希聽到浩賢咁講都呆左，我諗大家都無諗過原因會係晨哥。
浩賢：「啊，你地唔洗咁既樣，聽人話佢地咁做唔係想話杯葛個選舉。」
黑仔：「吓叫人唔好去投票唔係杯葛仲可以係咩呀。
」浩賢：「佢話因為Form 6只會留係學校多大概半年，但學生會係服務成年，如果Form 6投票，可能會影響到選舉結果，所以唔應該投wor。」
聽到我一頭煙，係咪因為我蠢
Cody：「用另一個講法係，佢認為學校既未來係屬於我地既，所以學生會應該完全由我地選出，Form 6唔應該干預到喎。」
咁既講法反而更加易明，雖然奇奇怪怪，不過都好有晨哥style。
話時話…
我：「你偷聽我地講野呀？
」Cody：「你都痴線，自己講野講到咁大聲走去屈人偷聽。
」好大聲咩我地講得…
阿希：「喂miss黎啦，返埋位啦。
」隨住Miss入黎班房，我地都開始上堂，將投票既事放埋一邊。
不過又邊有可能可以專心上堂吖，上左一陣我就頂唔順開始周圍望。
Cody：「你D傷點呀？」
嗯？佢同我講緊野？
聽到Cody細細聲咁講，我望左過去，但發現佢仍然好專心咁聽緊書，抄緊筆記。
應該係我聽錯啦，呢排都唔係好夠訓，搞到有幻聽啦屌。
Cody：「喂問緊你野呀，你D傷點呀？」
屌，今次唔係幻覺啦，佢走黎篤我張檯喎。
我再望多次過去，今次佢真係望住我啦。
我：「哦，都過左咁耐囉，好返哂啦，有心。」
佢好似係自從個件事之後第一次主動撩我講野，唔通佢準備話我知佢鐘意晨哥既原因？
Cody：「你覺得今次會係邊個閣會贏？」
我：「Eden啦，呼聲咁高。」
Cody：「唔係因為個主席係你女朋友？話時話個主席我好似見到有兩個一模一樣既人咁既？
」我：「啊，你唔知咩？佢地係孖女黎。」
Cody：「唔怪得啦，咁邊個係你女朋友？」
我：「eh…兩個都係…
」Cody：「吓！！
」屌你上上下堂叫得咁撚大聲你係咪想死。
Miss：「Cody？係咪有咩事？
」Cody：「eh…無，見到有隻死左既蚊啫。
」之後佢成個上晝都黑哂面，無再同我講過一句野。
我都係講事實啫，都差唔多係時候同阿希佢地交代，唔想再偷偷摸摸。
Lunch time話咁快就到，即係話投票時間已經過左一半。
我係第一個小息就已經身先士卒咁去左禮堂投票，途中仲見到Ellen係度叫人去投票。
佢投入到連我係佢前面都見唔到，只係一味咁叫d睇落好得閒既人去投票。
我見到佢咁都唔想打擾佢，自己一個默默咁去投下支持佢既一票就算。
我：「喂，你地投左票未？」
Sarah：「梗係投左啦，我仲叫我個班既人去投Eden添呀！」
Anna：「點會未投呀，Ellen呢話時話？」
Ellie：「佢好似話想自己一個靜下，所以應該係學校。」
Yui：「佢應該好緊張…佢好似成日都心不在焉咁…」
Ellie：「佢其實一有呢D大事就會係咁，我諗佢上次學生會選舉都應該係咁。」
Yui：「咁我地洗唔洗去關心一下佢？」
我：「eh…我諗唔好啦，佢都話左想自己一個靜下，我地就唔好打擾佢啦。」
直至放學，我地都無見過Ellen。
四點半，投票結束，開始點票，但Ellen並無同佢既候選內閣一齊出現係點票站。
我走左去問佢地，但無人知道Ellen去左邊。
點票點得非常快，不出半小時，正如我地預期同期望，學生會宣佈Eden以七百三十票大比數勝出，成為新一任學生會。
但Ellen都係無出現。
我開始擔心佢，開始去周圍搵佢。
操場，多用途室，除左女廁之外學校所有既公眾地方我都搵過哂。
但我就係搵唔到Ellen。
打比佢，無人聽，Whatsapp佢，無睇到。
最後我走返去雨天操場，Eden既攤位前面。
到底去左邊呢Ellen…
咦…點解…有喊聲…?
我慢慢推開眼前既壁報板，嘗試去接近喊聲既來源。
最後，我搵到佢。
佢匿係堆壁報板後面，一個人係度喊。
出於自然反應，我即刻走埋去，緊緊咁攬住佢。
但佢反而喊得更大聲，喊聲響遍成個操場。