「無啦啦多左幾個家姐同細妹 Season 2」: 真相
Kathy：「你話佢呃我？佢有乜理由要呃我？」
晨：「嘛，其實稍為動下冷靜D諗下都會覺得件事有古怪架啦，邊得黎一個好心人出錢又出力咁幫你去報仇？」
「對方仲要係主動黎搵你喎，一黎就提報仇，你唔覺得奇怪架？」
「再者，你唔諗下你位好心人到底係咪真係你阿哥既朋友？」
Kathy：「我…」
晨：「你咁既反應，睇黎我講既野你完全無考慮過架？」
愛麗絲：「唔好咁講野啦阿晨，個陣佢先得中一，唔識諗得咁全面都好正常啫。」
晨：「無眼睇，你講埋落去啦。」
晨哥之後好嬲咁走左埋黎，拎左我手上個面具係度研究。
我：「晨哥…點解你地會係度既？」
晨：「啊，呢個啊，我跟蹤你地囉。」
我：「吓！？」
晨：「May姐知架，我有通知佢。」
我：「二家姐知？話時話呢度到底係咩事…」
晨：「啊啊，咁多問題架你，你自己都應該知道答案架。」
佢講講下仲戴起阿樂個面具上黎，把聲即刻變左阿樂把聲。
晨：「有人想打擊七星呢個制度，所以先搵佢，透過利用我既死。」
Ellie：「晨哥…咁樣好惡趣味呀…」
晨：「哈哈哈哈，但咁好好玩喎。」
「佢只係被人利用左啫，佢根本咩都唔知，咩七星佢根本就唔知係咩黎。」
聽到晨哥咁講，我望左過去Kathy個邊，發現佢係度睇緊一曡野。
我：「個疊係…」
晨：「道歉信，個三位老師既。」
「愛麗絲將佢阿哥件事由頭到尾再查左一次，亦都將佢背後既個位所謂好心人既背景粗略查左一查。」
我：「咁到底係咩人要搞我地？」
晨：「呀，你其實唔係佢目標，只係對方想模糊視綫同更容易呃到佢先話你地有份害死佢阿哥啫。」
晨哥句野講到一半，Kathy就突然走左去，仲將疊文件扔左係地下。
愛麗絲執返份野之後就慢慢行過黎。
愛麗絲：「俾D時間佢喇，突然有人講一個同自己一直深信不疑既野完全相反既版本，係好難接受既。」
我：「你地又話唔知道佢到底係邊既？點解突然…」
晨：「啊，全部都係呃你架，因為你其實都比佢監視住，用你做餌就好容易釣佢出黎。」
佢終於肯除返個面具。
「留俾你做紀念啦，我仲有野做，下次見啦拜拜。」
有乜好紀念…
之後，我再無見過Kathy，學校又好，邊度都好，都再無見到佢。
成件事都由Ellie轉告比Sarah佢地知，一切都清清楚楚咁交代哂。
而我，咩都無講。
我唔係好想再講呢件事，感覺實在太唔舒服。
今次又同之前既一樣，我又係咩都冇做，由晨哥佢地做哂所有野。
我既唯一作用，就係做餌引蛇出洞。
我真係無鬼用。
聽日就係學生會選舉日，今日係冷靜期，唔準做任何拉票活動，所以我地六個放學就各自各返屋企。
自從個日之後，我係屋企就再無同Sarah仲有Yui一齊做功課，每日一放學就自己一個匿埋係自己房。
我呢排都係咁望住個面罩，阿樂個樣個個。
「唉…」
如果係得我一個，件事會變成點呢？
「點解每次去到最後永遠都係你一個攞哂所有好處？你明明無乜點做過野，有時甚至會搞衰件事，每次都係我地去幫你，但點解最後係你一個拎到哂名譽同地位？」
頂，點解偏偏係呢個時候先諗起呢句說話。
佢又講中左，屌真係唔甘心。
「knock knock」
敲門？唔通係Sarah或者係Yui？
我：「入黎啦。」
俾佢地入黎係唔想佢地擔心我，唔開心既野我一個人承受就夠喇。
同我估既一樣，入黎既人係指Sarah。
Sarah：「你做乜啊阿明，自從個日之後你就好似…
」我：「其實你會唔會覺得我好無用？」
我突然忍唔住，直接將我既心底話講左出黎。
靜左，間房靜左落黎，剩低既就只有風聲。
我地兩個除左四目交投之外就無做任何野，一直咁對望，望左好耐。
最後，我忍唔住，移開左視線。
我望住佢令我個心更加唔舒服，好似想喊咁。
嗯？做乜事…
就係我擰咩臉個陣，Sarah原來行左埋黎，仲攬住左我，請我食波餅。
呢一次，我真係忍唔住，直接就喊左出黎，仲要喊得好大聲。
Sarah咩都無講，就只係繼續攬住我，同埋輕輕掃我背脊。
我：「對唔住，我咁無用…咩都要靠人幫…我自己一個根本咩都做唔到…」
「連想保護自己身邊既人都唔得！」
我發左絕望既咆哮，回音響遍成間房。
Sarah：「點會呢，阿明你有好好咁保護到身邊既人呀。」
聽到佢咁講，我即刻抬高頭望下佢。
佢居然都係度喊緊…
我即刻捉實佢，問佢到底發生咩事，做乜事喊等等，但佢只係搖搖頭，擦擦眼淚。
Sarah：「我都唔知，但我見到阿明你咁，我就忍唔住喊…」
「你其實已經做得夠好架啦…你有好好咁保護我地…」
我：「唔係…我無…今次又係因為晨哥同二家姐先解開哂成件事，保護到你地既人係佢地…」
Sarah：「你記唔記得係未搞清楚成件事之前，你自己做左D乜？」
我…做左D乜？
Sarah：「你故意疏遠我地，等D人只係去搵你，我地唔會有危險呀。」
我：「咁我的確應該咁做既…開始個陣我以為Kathy既目標就只係我一個，咁我唔想因為我而連累到你地…」
Sarah：「咁就係你保護我地既方式呀。」
我：「我應該自己一個解決哂成件事先係…唔應該煩到二家姐佢地…」
「但係佢唔係咁諗呢。」
呢把聲係大家姐！？
我同Sarah都一齊望過去房門口，見到大家姐挨住道門望住我地。
Sarah：「大家姐！？」
一見到大家姐，Sarah即刻嚇到企左起身。
大家姐：「唔洗咁驚喎傻豬，你地又唔係係度曳曳。」
「不過如果你地真係係度曳曳，大家姐我都唔會講乜既~~」
哇…你咁講野既大家姐…聽到人地紅都面哂啦…
我：「大家姐…」
大家姐：「講下笑啫，見你地兩個都咁唔開心。」
大家姐講完就行左埋黎，攬住哂我地兩個。
大家姐：「件事過左去就唔好再諗啦，專心去讀書去玩啦，如果唔係就哂左佢既一番心血架啦。」
佢既…心血？
我：「係喎大家姐，你講既佢係…？」
大家姐：「唔？咪係話緊阿May囉。」
我：「你話二家姐既一番心血？」
大家姐聽到我有問題之後就放開左我地，笑笑口咁望住我地。
大家姐：「佢呀，一心都希望你地幾個可以開開心心咁過日子，遠離呢d咁樣既事，所以佢先一直默默咁係背後做咁多野。」
「呢段日子，佢一直都係度奔走，周圍搵線索。」
「佢最想睇到既，係你地既笑容。」
「唉呀你地唔好講出去呀，佢肯定會鬧死我架。
」二家姐…
大家姐：「佢一直都係咁諗，認為呢D事唔應該由你地去應付，你地應該開開心心過日子。」
「我記得佢仲同我講過咩「我會保護佢地」之類既說話，好搞笑架哈哈。
」我同Sarah聽到之後都互相對望左一下，又係咩都無講，但大家今次都笑左一下。
真係好有二家姐作風。