「無啦啦多左幾個家姐同細妹 Season 2」: 慶祝
Ellen一味喊,我都唔好意思打斷佢,唯有由佢一直喊,最多掃下佢背,安慰下佢咁。
但佢愈喊就愈唔對路,因為開始好多人望住我地。
就連小食部阿姐都走出黎睇到底咩事,睇黎都係要叫停佢喇。

我:「喂,喊夠架喇,再喊就醜樣架喇。」
「醜樣」呢兩個字對女人真係特別有用,一聽到佢就即刻收聲,快過打針。
陰公囉,喊到對眼紅哂,好彩無腫到啫。

雖然佢無再喊,但佢一同我四目交投就即刻攬住我,仲埋左自己個頭落我心口。
咁樣俾人見到咪仲容易令人誤會…
我:「做乜野自己一個匿埋喊呀傻妹。」
Ellen:「我真係好驚…好驚選唔到…所以我先唔敢上禮堂睇點票…

係喎,佢自己一個匿係度,應該仲未知道結果已經出左。
我:「做唔做到真係咁重要?

Ellen:「上次…係指Knights同Light個次?」
我:「仲可以有邊次吖。」
Ellen:「eh…」
佢終於肯離開我個心口,佢再唔走我肯定巨龍哥一定會醒。
Ellen:「我最近都有諗返呢件事…」
「我諗個陣我應該係覺得輸比你都無乜所謂…嘻嘻。

屌,居然係我被人氹。
Ellen:「阿明,不如你話我知,我到底係輸左定贏左?」
佢一邊講一邊望住係我地對面既學生會室。
我:「如果你選唔到,咁你會點?」
Ellen:「一定會好唔開心囉,話哂呢個一直都係我既目標嘛。」
「出年已經無機會選啦,今次再選唔到應該會係一個好大既遺憾。」
我:「有無諗過入U再選學生會?」
Ellen:「入U再選啊…但好似感覺唔係同一回事咁…不過都可以既,咁即係話我仲有機會啦,只要我努力讀書既話。」
「好喇,咁返去啦,今日我要去屋企玩大富翁!唔準拒絕我架!

我:「你唔洗上禮堂喇?」
Ellen:「唔上啦,你講成咁即係話我其實已經輸左啦,唔想上去睇人高興呀我。

「你話我輸唔起都好,我而家真係無辦法恭喜對方。

我:「但我想去恭喜人喎。」
Ellen:「咁呀…我係禮堂門口等你囉,我唔會入去架喇。

我:「唔洗啦,要恭喜係度都可以。」
「恭喜您呀,我地既新一任學生會會長。

Ellen:「學生會會長…?你話我?」
我:「係呀,我係同你講緊野呀。」
Ellen:「但係…你頭先唔係…」
我:「我幾時有話你輸左啫?

Ellen:「呀!!你真係好衰吖阿明!!

佢知道自己比我玩之後就開始係咁打我心口,仲開始喊起上黎。
不過,今次佢係開心到喊啦。

之後,我就拖住佢上禮堂,佢開心到彈下彈下咁行,好似個細路咁。
好快,我地就去到禮堂,大家都係哂度,Eden既成員係度同其他落選左既內閣成員握手。
我:「喂,快D過去啦,尊重一下個場合。」
Ellen:「知道啦長氣,一陣再返黎搵你啦。

Ellen就係咁從我身邊離開,重拾平時一直環繞佢既自信咁走去同其他人握手。
大家見到佢終於出現係度都感到好意外,但佢並未交代原因,只係繼續握手。
大概十分鐘後,大部分人都走哂,只係得返我地六個同Eden既成員。
Ellen:「好啦呢排辛苦大家啦,有乜野等聽日先處理啦好無?

聽到Ellen咁講,Eden既成員都開始離去,個個既樣都好開心,好似無諗過自己會贏咁。
睇返Ellen呢邊,佢已經開始捉住Sarah,Yui仲有Anna四個人一齊係咁係禮堂跳下跳下。
吖點解佢地咁樣跳都唔會走光既?

Ellie:「你最後係邊度搵到佢架。

哇係Ellie,真係嚇左我一跳,無啦啦去左我背後都有既。


我:「雨天操場堆壁報板後面囉。」
Ellie:「哈哈,我仲走左去女廁搵佢添。」
「你搵到佢個陣,佢有無喊?」
嘩果然係孖生姊妹…

Ellen:「哈哈,我都估到係我贏架啦,我頭先只不過係肚痛去左廁所咋嘛。」
唔知邊個頭先喊到九彩呢。
一諗返起頭先個畫面,我就忍唔住冷笑一聲,但佢即刻就啤住我,好似話緊俾我知我一講出去就會死咁。

Ellie:「果然同我諗既一樣,哈哈。」
嗱佢自己估到架咋,我無講架。

Sarah:「咁我地而家去邊度慶祝好?」
Anna,Ellen:「你地個度囉。

Sarah:「好呀!我地快D返去囉,我叫定蘭姨整定好多好野食比我地!

喂喂唔係講好左係我Soc房咩?做乜又變左係我地屋企?
不過算啦,今日就等佢地開心下啦。
