「無啦啦多左幾個家姐同細妹 Season 2」: 亡靈

星期六既下晝，我一個人去到愛麗絲指定既地方，一棟大廈。

大廈既保安一見到我就上前黎迎接我，睇黎係愛麗絲一早安排好。

之後我係個黑絲秘書姐姐既帶領下去左一個會議室坐低，個姐姐仲沖左杯朱古力比我先走。

哇杯朱古力真係好甜，好想再飲多幾杯，最好係頭先個姐姐拎比我。

話時話，愛麗絲咁耐都未到既，我地明明约左兩點架，而家兩點半都未見人。





開門聲？啊終於黎喇咩？咦…？

開門入黎既並唔係愛麗絲，而係兩個手執幾疊文件既OL姐姐，佢地後面仲有一個人。

晨哥。

晨：「唷阿明，黎左好耐？ 」

我：「一陣咁啦…點解晨哥你會…」





晨：「同你一樣，我都係約左愛麗絲。」

都係約左愛麗絲…？

正當我想追問落去既時候，愛麗絲終於黎到，不過佢並唔係一個人黎。

佢帶左阿惠黎。

阿惠入黎個陣既反應同我入黎個陣一樣，擘到口鬼咁大。





不過佢係見到我之後即刻合埋個口，仲好開心咁走埋黎坐低。

惠：「嘩阿明呢度好撚大呀！仲有啊，你見唔見出面D女幾撚正架！ 」

我：「屌，你都係咁諗？頭先有條女沖左杯朱古力比我，不知幾好飲呀！ 」

愛麗絲：「我帶你黎唔係俾你兩個傾計，係傾正經野。」

愛麗絲用一個好洪亮既聲線制止左我同阿惠之間既對話，仲嚇到我地兩條友即刻坐直個人。

我：「係喎..點解阿惠你都會黎既？」

惠：「哦，其實係因為學校…」

愛麗絲：「個隻亡靈原來開始行動左一段時間，仲已經做左好多野。」





我：「亡靈？唔通你係指… 」

愛麗絲：「無錯，就係你之前俾我個個名，我用好多渠道去查呢個名，發現有人用呢個名做左好多野。」

我：「做左好多野？例如呢？」

晨：「之前打你個班人，佢地話就係「張永樂」出錢請佢地黎打你。 」

惠：「早兩日，我地學校有三個老師都比人襲擊。」

我：「有老師比人打！？咁大件事！？有無報警？」

愛麗絲：「班老師並無報警，佢地唔想搞大件事，但佢地有同學校報告呢件事，所以傳左黎我度。我之後叫左阿惠幫我查下呢三個老師，所以今日叫埋
佢黎。」





惠：「係，我睇左一下個三個老師個名，係呢三個…」

阿惠講完之後就遞左個file比我，第一頁文件上面就有三個名。

我：「喂…呢三個好似係… 」

惠：「無錯…係當年個委員會既老師… 」

愛麗絲：「聖所羅王個校長仲話我知D老師係俾人襲擊之後都聽到一句說話。」

「呢D係當年你地誣捏張永樂既代價。」

嘩…痴線架？邊個會用阿樂個名去搞咁多野…





我：「你地有無咩頭緒？我諗極都唔明到底係咩人會用阿樂個名去做咁多野？」

晨：「會唔會就係佢本人 」

我：「邊有可能呀晨哥，佢已經死左架喇。 」

惠：「咪係，我地個陣仲係親眼睇到佢條屍… 」

阿惠講講下就捂住自己個頭，睇黎又回憶個個畫面。

晨：「咁，呢個係邊個？」

晨哥㩒一㩒佢部電話，會議室既投影機就播出一段影像。

條片應該係一個閉路電視既畫面，但唔知係邊度。





畫面入面影住一個男人，影既係佢既正面。

我同阿惠見到都呆左，因為畫面入面既人真係阿樂。

我：「日光日白居然會有鬼…」

惠：「屌，我今日就去拜神先得。」

晨：「睇你地既反應，即係畫面入面個個真係張永樂喇？」

我：「的確係佢，唔會有錯。」

「晨哥，條片係點…」

晨：「啊，係你個frd既監押所架。我用左唔少時間先拎到呢條片。」

「話時話，你地識唔識佢既屋企人？」

惠：「唔識，我地一直都唔知佢屋企既事，直至佢死我地先知佢既背景。」

我：「我一直覺得佢死係因為阿偉…所以而家先會有針對七星既報復…」

愛麗絲：「你又知佢係針對七星？」

我：「eh…」

仆街啦，我好似講錯d野？

晨：「你睇到個日封信？」

我：「係吖…求知慾發作…」

晨：「嘛，無所謂喇，無錯，對方目的的確係針對七星，不過目前為止仲未有乜動作，主要既都係針對緊你同你身邊既人。」

「但我好奇既係，以呢個人既背景，無可能有能力做到咁大規模既野，就算係佢父母想為個仔報仇都無咁既能力。」

我：「咁佢父母可以借錢去做架嘛。」

愛麗絲：「的確係可以咁做，但佢父母係上年已經移左民。」

我：「咁仲有邊個會知道阿樂既事知得咁清楚..唔通真係阿威？」

晨：「唔會啦，佢既一舉一動都比其他人監視住。」

「有趣既係，我發現呢個阿樂原來仲有一個阿妹，但我用盡我既所有方法都搵唔到女仔既資料，出入境紀錄都無。」

愛麗絲：「我已經派左人去搵佢父母，希望可以搵到d有用既線索。」

阿樂仲有一個妹？

我：「咁會唔會…」

晨：「好有可能係佢個妹認定一切都關你地事，所以先策劃咁多野去報復。」

「不過佢一個女仔係點做到咁多野呢？我真係好有興趣知道，哈哈。」

「仲有閉路電視入面個個張永樂，唔…好似好好玩。 」

愛麗絲：「認真D啦阿晨，緊要野黎架。」

點解好似愈來愈複雜咁既…