「無啦啦多左幾個家姐同細妹 Season 2」: 過去

呢件大概係我係聖所羅王四年入面經歷過最恐怖既事。

隔左咁耐，我本來以為自己已經唔記得左，但一見到呢個名，所有野都返哂黎。

個一日，我地四個睇住佢訓左係操場，身邊仲成灘血。

所有野，都要追溯返去三年前，我讀中二個陣。

當時，我仲係一個死窮撚，係學校仍然受盡歧視，成日比人串比人玩。

個陣，我係學校只係得四個朋友，Anna，阿威，阿惠同埋阿樂。

Anna佢地係點樣識唔需要再多講啦，至於阿樂，其實我更早識佢，係中一個陣已經識。

張永樂，人如其名，佢永遠都係咁開心，成日都笑笑口，好似永遠都無煩惱咁。

起初我識佢既時候，我仲以為佢係有錢仔，有錢到阿偉咁既地步，所以先可以成日都咁開心，無憂無慮。

直至到佢走左，我先知道佢其實唔係好我好多，佢屋企根本唔係咩有錢人。

講返點識佢先，其實阿樂大我地一年，我中一個時又係因為比人發現交減免學費通告比人玩，將我本手冊掟左落停車場。

當時自己仲細，咩都好緊張，慌慌張張咁跑落去停車場執。

但落到去停車場個陣，手冊已經唔係原地。

當時心諗仆街啦，唔通俾老師執左？如果真係既就麻煩啦，肯定會俾人罰。

就係我萬念俱灰之際，佢就出現左係我面前，仲拎住我本手冊。

當時我真係覺得佢直頭係我既救星。

樂：「本手冊，你既？」

我：「係吖真係唔該你！」

樂：「你以後要加油啦，好喇返去上堂啦。」

佢講完之後就拋返本手冊比我，揮䄂而去。

個下我真係覺得佢好撚型，我睇到呆左，連佢叫咩名都唔記得。

之後我lunch time見親佢都會特登走去同佢一齊食，佢又唔介意，仲同我有講有笑。

個陣我都有留意到其他人有用D奇怪，應該係厭惡既目光望住我地。

當時我以為呢D目光係針對我，但原來我估錯左。

講起我幾時知道佢個名，應該係上學期未既週會，頒獎禮。

佢個陣拎左好多獎，我聽左佢個名好多次，張永樂。

個時心諗佢讀書咁勁既，拎咁多獎。

不過，佢走都係因為佢既成績。

佢俾人冤枉話佢考試作弊，件事甚至令學校成立一個特別委員會去查。

點解會咁誇張？阿威當時話係因為阿偉，係阿偉想玩佢。當時，我已經中二，已經識左Anna佢地。

因為開始有伴一齊玩，所以我少左同阿樂一齊食lunch，不過有時撞到佢我地都會傾下偈。

亦因為咁，我介紹左Anna佢地比阿樂佢識，有時大家都會一齊食lunch，慢慢就熟絡左。

所以我地當時一聽到學校成立一個特別委員會去查阿樂佢考試作弊既時候我地都非常愕然，因為我地都好清楚阿樂佢唔係D咁既人。

佢絕對係真材實料，我地有乜功課唔明佢都可以一一解釋清楚，佢根本唔需要出貓。

我地之後都有搵阿樂，問佢到底發生乜事，但佢居然笑笑口咁答我地。

樂：「無呀，俾人貼左D貓紙係檯底自己發現唔到囉。」

我：「咁即係明屈啫！你打算點？」

樂：「清者自清，總會還我一個公道既。」

但當時既聖所羅王邊有公道可言，委員會一致裁定阿樂怍弊係無容置疑既事實。

阿樂要記一個大過。

自此之後阿樂就比人叫做出貓王，仲話佢以前D獎都係出貓得返黎。

我地四個成日都走去安慰佢，叫佢唔好理D傻鳩，佢每次都笑笑口話佢無事，多謝關心。

但一個月後，佢就係學校天台跳左落黎。

無一份報紙賣過呢件事，因為無人想得罪呢間學校既幕後巨頭。

佢亦無留低任何遺書係學校，所以無人知道佢跳既原因。

但係我地自己都知道原因係乜，自此之後我地都叫阿偉做仆街偉。

事到如今，點解阿樂個名會出現係探訪名單？阿威既說話令我覺得絕對唔會係同名同姓咁簡單。

到底係咩一回事…？

Anna：「阿明。」

Anna用兩個字將我從過去拉返黎現在，而家既我同緊佢地五個一齊係cafe。

Ellen同Ellie忙緊學生會既選舉，Sarah就同Yui用緊電話睇靚衫。

我：「嗯？」

Anna：「你仲記唔記得阿樂？」

咁突然提起阿樂…睇黎阿威都有話比Anna知。

我：「梗係記得，做乜。」

Anna：「我最近收到佢既信…

」

嘩咁猛？

我：「信？講乜架？」

Anna：「奇奇怪怪咁…話咩唔會原諒，要向害死佢既人報仇…」

報仇…

我：「應該係D惡作劇黎架啫，阿樂都走左咁多年，邊可能寄到信比我地。」

「就算真係佢，都唔會係講緊我地啦，又唔係我地害死阿樂。」

Anna：「唔係呢，我硬係覺得好唔妥，我有問過阿惠，佢話佢都有收到呢D信。」

「我之後仲去左搵阿威，佢甚至話見過阿樂，仲話好快就有好戲睇。」

「阿明，你自己要小心，我硬係覺得矛頭始終會向你度…

」

雖然Anna唔知道事情既全貌，但睇黎佢都開始察覺到小小野啦。

講唔講好呢…算啦，都係搞清楚D野先啦。

我：「唔好信阿威啦，而家既佢可能會突登講d野嚇你。」

Anna：「咁又係既，但阿惠呢？佢應該唔會呃我啦掛？」

Anna講到好激動，好似好驚咁，可能係諗起D唔好既野。

我：「無事既Anna，你諗下，可能就係阿威寫呢D信去嚇我地呢？