「無啦啦多左幾個家姐同細妹 Season 2」: 謎團
最後Ellen佢地三個都黎埋，唯獨Anna一個無出現。
我地五個係阿惠佢地既陪伴下一齊係聖所羅王漫步，行個個新花園。
佢地幾個就係度欣賞美景，而我就係度諗自己野。
我一直諗到底係邊個同我有咁大仇口，到底我做左D乜對方一定要向我報仇。
Ellen：「好喇我同Ellie都要走喇，今晚我地屋企要去一個聚會。」
我：「哦哦…咁我送左你兩個走先喇。」
Ellen：「唔洗喇，司機已經係門口等緊我地架喇，唔洗送啦聽日見咪得。」
我：「哦…咁…聽日見啦。」
我同完Ellen講，之後再望過去Ellie度，原來Ellie已經走到去我前面，佢仲輕輕咁抱住我。
Ellie：「唔洗咁擔心，萬大事有我係度。」
當然，呢句野係佢係我耳邊細細聲講，無比Sarah佢地聽到。
聽到呢句野，我成個人突然都放鬆落黎，好似一下子拋開一切咁。
之後隔左無耐我都同Sarah Yui返屋企食飯，我中途仲偷偷咁打左個電話比愛麗絲，將目前知道既一切都話哂佢知。
佢聽到之後就話會循呢方面去查對方身份，叫我唔好輕舉妄動。
換句話講，即係叫我咩都唔好做。
雖然講係咁講，但我自己都係做左小小野。
呢段日子，我有意無意咁係學校避開Sarah佢地，因為我唔想將佢地都捲入件事。
反正對方目標係我，有咩危險都向我一個人黎就夠。
好彩Sarah佢地而家都有自己既新朋友，都好小成日痴住我，所以我刻意疏遠佢地都唔會好覺。
我仲叫我地既司機一到學校放學時間就到學校等Sarah佢地，如果到五點都未到就一定要打比Sarah問。
Anna佢地既司機都係咁，保障住佢地既安全。
就係咁，又相安無事咁過左兩星期。
愛麗絲既方面仍然未有消息。我仍然繼續返學。
話咁快，就要測驗啦。
今日係測驗前一日，所以可以早放。
阿希：「喂，你知唔知呀，Kathy約我去溫書呀！」
我：「哦，我真係恭喜您呀。」
唔知點解我自從聽完Ellie，Yui仲有浩賢對Kathy既感覺之後我就對Kathy無乜好感。
黑仔：「加油啦將軍。」
「登登登登~」
正，放學喇可以返屋企。
Kathy：「喂你地幾個~」
一落堂Kathy就走埋黎，表情仲相當高興。
Kathy：「不如我地幾個一齊去溫書？」
屌，仆街聽完之後我同黑仔一齊笑左出黎，再望向阿希，佢即刻灰到隻狗咁。
原本我係想拒絕既，但一時惡作劇心作怪，應承左。
同佢保持距離…應該無問題既。
Kathy：「不如Cody你都一齊黎，大家一齊交流下嘛。」
居然叫埋Cody？佢好少會叫其他女仔架喎。
啊不過講起Cody，自從個次之後佢對我既態度就nice返，變返好似開學頭兩日咁。
但佢仲未講埋上次既事。 雖然我好想知道件事到底係點，但出於尊重，我咁耐都無主動問。
或者同佢講既一樣，未係一個好時機啦。
Cody：「但係我慣左自己溫架喎…」
Kathy：「試下啦~可能咁你會溫到更多呢？」
Cody望一望我，好似想叫我救佢咁，但我都無辦法，唯有縮一縮膊。
無諗過呢下交流都會比Kathy捉到，佢即刻問我同Cody係咩關係。
我：「吓…可以係咩關係，咪同學囉。好似你同阿希咁。
」我專登咁講，之後好衰咁望住阿希，條友即刻向我舉中指。
Kathy：「普通同學會有咁既眼神交流？
」Cody：「唉唔好嘈啦，我去咁得未？
」Kathy：「好野！好啦我地快d行啦。
」原來一切都係Kathy既計劃之中。
之後我地五個人就去左我地既soc房溫習，完全既學術性討論。
Soc房點黎？係呢兩星期申請返黎的，位於五樓，化學室旁邊一間房仔。
溫左大概兩個鐘，總算溫完一科中文，Whatsapp問下Sarah佢地而家點都好。
我拎左個電話出黎都無五秒，Cody就突然開聲。
Cody：「你地肚唔肚餓？我有少少肚餓…想出去買野食。
」係喎我地連lunch都未食架喎。
Kathy：「我都有D餓，不如我地一齊去買？」
Cody：「可以吖…你地呢？食唔食？」
我：「我要芝士撈麵。」
黑仔：「加一，我要大既，阿希個死仔要芝士湯麵。」
Kathy：「喂咁你地搵個同我地一齊去啦，我地兩個女仔邊拎到咁多。」
咁講又有道理，阿希去左屙屎，黑仔又不為所動，咁都係我架啦。
我：「咁我同你地一齊去啦。
」就係咁，我地三個出發去採購食物。
好快，我地就一袋二袋咁行返學校，沿途大家都無乜交流，氣氛有小小尷尬。
不過尷尬好快就被取代。
因為有四五個手執棒球棍，戴哂口罩既人突然出現係我地面前。
「你就係陳煒明？
」其中一個口罩人揸住支棍指住我咁講。
始終都係會咁呀？
我：「係又點，你地係咩人？」口罩：「我地著到咁你覺得仲會話你知我地係咩人咩？你認你係陳煒明就得啦。」
「兄弟們做野。
」佢自己一輪嘴咁講，仲好得戚咁係度舞佢手上支棍。
佢個班所謂既兄弟係佢既號令下亦開始徐徐咁走埋黎我地呢邊。
點算好呢…打架我真係唔太擅長喎，但至少唔可以令Cody佢兩個受傷先得。
我：「你兩個幫我拎住先，之後向相反方向走，有咁遠走咁遠。」
我一邊講一邊將手上既撈麵交俾Cody同Kathy，仲慢慢咁推佢地走。
Cody：「喂…佢地係咩事…洗唔洗報警？」
我：「我都唔知佢地係乜事，但要報警都行遠D先啦，如果就咁企係報警，我諗佢地連你地都會打，快D走喇。」
我開始唔耐煩，索性用力推佢兩個，之後自己就擰轉身，準備黎一場惡戰。
但我無諗過對方會咁好禮貌，搞左咁耐佢地居然都仲未郁手，甚至企左係度望住我地。
不過，禮貌都到此為止，當佢地見到Kathy仲有Cody開始慢慢走遠，佢地都開始重新行動。
一打五，對我黎講實在太難，避開得一棍，背脊就會食一棍，好快痛楚就席捲我全身。
就算係咁，我都無放棄反撃，我不停揮拳，仲俾我搵到機會搶到支棒球棍。
我拎到支棍就起勢咁舞，仲比我負負碌碌打中其中一個口罩人，佢即刻彈開埋一邊。
哈哈…知道比碌棍打中有幾痛啦…
仆街喇，隻腳好撚痛…想企穩都有難度添。
Cody佢地應該安全啦…？
「去死喇！！
」大獲！！
係我掛住望自己隻腳既時候，原來有一個口罩人衝緊埋黎。
佢仲瞄準我個頭黎打，如果比佢打中，我肯定會即場暈低，所以我即刻舉起雙手，保護自己個頭。
不過，呢一棍最後無打到落黎，拎棍既人居然訓低左，身邊仲有個足球。
「有意思，居然夠膽日光日白打我學校既人？
」呢把聲係！！晨哥！？
我即刻擰轉臉，果然佢就企左係度。
佢威風凜凜咁慢慢走埋黎，好似完全唔care班人拎住武器咁。
同埋雖然佢係同幾個人一齊黎，但就只有佢自己一個過黎。
佢意思好似話「我一個人就足夠」咁。
佢經過我身邊個陣，仲拋低左一句說話。
「做得好好，跟住就交俾我喇。」
口罩人：「唔關你事！走開！」
晨：「嘛…咁你咪當我多事囉，唔好講咁多啦快d黎啦我都好耐無打交喇。
」口罩人：「咁想比人打就打埋你！上！！」
剩低既四個口罩人全部都衝哂去晨哥度，無再理我。
一打四既話，就算係晨哥都未必…我都要去幫手先得。
咦？
我突然跪左係度，但咁完全唔係我本意，而係我隻腳真係無哂力。
我只可以睇住晨哥一個人同佢地打，自己完全幫唔到手。
點解我咁無用…
「你已經做得夠好架啦，你成功咁保護到身邊既人。」
頭先係晨哥身邊既個班人走左埋黎扶起我，其中一個未見過既女仔仲睇穿我諗乜，開聲安慰我。
我：「如果我做得夠好，就唔會麻煩到晨哥啦。」
其實，呢句野係同我自己講。
晨哥動作好流𣈱，對方所有既攻擊佢都輕鬆避開，雖然佢無架餐係手，但佢仍然打到對方呀呀叫。
佢甚至可以令對方打錯自己人，好似完全玩弄對方於股掌之間。
好快，四個口罩人全部都訓哂係度。
但第五個，亦即係比晨哥用波踢中個個原來已經起返身，仲轉身走人。
晨：「喂喂喂，有膽打人無膽比人打唔得架喎，留低~
」佢一邊講一邊挑起頭先個足球，仲大腳抽射埋去。
個波一D偏差都無，正中對方背脊，條友即刻訓返低，郁都唔郁。
晨：「呢招叫咩好，遲d要叫魯路修幫我諗個好名。」
啊…原來現實足球都可以殺人…
晨：「好啦十四，綁起佢地先，等警察黎處理佢地。」
「唷，無大礙嘛阿明。
」佢一臉輕鬆咁走埋黎，完全唔似岩岩先同人打交咁。
我：「如你所見，比人打到成身都傷哂。」
晨：「哈哈，搞到我諗起第一次見你個陣添，好喇我地行啦，呢度交俾十四佢地處理。
」行？去邊？
佢地幾個之後就扶左我返學校小食部，阿希佢地都即刻係soc房落黎，仲問我做乜搞成咁。
我：「鬼知咩，佢地一問完我係邊個就開始打我啦，係喎晨哥點解你會黎救我既。」
晨：「啊，呢個你就要多謝呢兩位可愛既小姐啦，佢兩個一見到我就衝上黎叫我去幫手。」
晨哥指一指係佢身邊既Cody同Kathy，佢兩個仲頭dup dup咁拎住岩岩買既野食。
「係我地，唔好太自以為是呀。
」嘩晨哥居然會比人打？仲要係一個女仔打佢？
欣：「阿明你好吖，我係阿欣，係呢條友既女朋友。
」我：「你好…」
佢就係晨哥既女朋友？居然會係一個咁平凡既女仔？我成日以為會係愛麗絲咁既人添。
一知道佢係晨哥既女朋友，我就忍唔住望下Cody，佢個頭dup得更低，更加用力拎住個膠袋。
但無諗過D膠袋聲反而吸引到晨哥。
晨：「咦咩黎架？係咪食得架？
」轉話題轉得咁突然，唔好話Cody，在埸所有人都唔知點俾反應佢。
Cody呑呑吐吐咁講出「芝士撈麵」四個字，晨哥聽到之後更加興奮，拎走左Cody手上既麵。
晨：「正！咁岩肚餓就有芝士撈麵食，開心！
」佢就係咁旁若無人開始食起野上黎，仲食得好滋味，睇到我都有D肚餓。
欣：「唉D野食人地架…幾多錢架？我俾返你地吖。」
我：「唔洗喇…當係多謝佢救左我。」
晨：「講得好吖阿明，阿欣你地幫佢包紮下先喇，我叫左阿偉幫我拎急救箱黎。」
欣：「我講左幾多次唔好邊食野邊講野！阿姐我有分寸！
」就係咁，呢位阿欣就開始幫我包紮，原來我成身好多地方都有瘀同損，不過都係D著衫睇唔到既位。
咁返去應該唔會比Sarah佢地發現...真係好彩。
就係包紮完，晨哥都食完野既時候，十四就返左黎，仲拎住張紙。
晨：「唷辛苦哂十四，張紙係係佢地度搜出黎？無俾警察知嘛？
」十四：「無，所有野都按照你既吩咐。」
十四一邊講一邊遞張紙比晨哥，晨哥睇完之後就撕左張紙，我想睇都無機會。
晨：「無聊。
」晨哥以兩個字形容張紙既內容，令人摸不著頭腦。但有兩段紙碎飄到我腳邊，每張上面只有一句短短既手寫字。
「所有七星，無一倖免。」
「陳煒明，我地好快就會見面。」
What the fuck..?