「無啦啦多左幾個家姐同細妹 Season 2」: 開始
第二日二家姐好似無事發生過咁出現係我地面前，大家姐問佢佢仲話自己完全唔知尋晚自己發生乜事。
但我覺得佢係知既，因為當佢見到我個塊痴滿膠布既臉佢即係嚇左一嚇，之後即刻擰咩面唔望我。
啊講起塊臉，Sarah仲有Yui見到我咁既樣都即刻走黎問我點，我就話痴左膠布好左好多。
死啦一陣返到學校肯定會比阿希佢地笑到臉黃，不如都係除左D膠布佢囉。
但當我一伸手去其中一塊膠布度打算除個陣，Yui即刻出手阻止我。
Yui：「唔好搞佢啦會有疤架…」
Yui都講到咁…唔搞囉咁。
無錯，我最後都係無除到d膠布，成面膠布咁返學。
同我諗既一樣，我一去到操場就被阿希佢地見到，仲不停咁笑。
我：「喂笑夠未啊。」
黑仔：「喂Sorry，真係太好笑，你到底衰乜搞成咁。」
我：「eh…被貓整到囉…」
總無理由話自己仆街搞到咁架，我以後仲洗見人既。
阿希：「你痴膠布既功力真係有待改進呀哈哈哈哈。」
我：「屌你咩，信唔信我打到你成臉都要痴膠布吖嗱。」
阿希：「唔好嬲唔好嬲，話時話阿明你揀左咩科讀？」
我：「geog同bio囉，做乜？」
阿希：「咦咁我地咪可以一齊上堂，呀個Kathy都好似係呢兩科。」
我：「嘩你咁都知？人地好似轉左黎一日左右咋喎。」
浩賢：「呢條友對有意思既對象都會查得一清二楚，一日之內要知道呢d，小意思啫。」
阿希：「說話唔係咁講呀今次難度好高呀，我淨係拎到個FB咋，仲要無野睇既個FB。」
黑仔：「小可喎，你都…」
「藍洛晨！我要挑你機！」
嘩咩事！？有人要挑晨哥機？仲要一大朝早就黎？
阿希：「今年真係早，今日先第一日正式上堂已經有挑戰者。」
黑仔：「今次又鬥乜呢唔知？」
浩賢：「對方咁細粒，好似得Form 2咁。」
喂喂點解你班人可以咁冷靜既？
我：「吓點解大家都咁冷靜既？而家有人當眾挑機喎！」
阿希：「啊，阿明你新黎唔知，呢d野其實都好平常，一個月左右就會有一次，我地已經見慣見熟。」
浩賢：「阿希早兩年都有挑戰過一次添。」
我：「阿希都試過？」
阿希：「嘻嘻係吖，當時想威比女神睇嘛。」
我：「女神？邊個吖好靚架？」
黑仔：「高我地一級既，叫Cherry，靚絕全校架，不過已經唔係度讀lu。」
Cherry…原來係咁…
阿希：「喂，晨哥行左上台喎，佢想搞乜。」
黑仔：「屌，佢諗乜係我地可以想像到架咩。」
無錯，晨哥係眾目睽睽之下行左上操場正中既講台，旁若無人咁款。
佢仲要串到試咪，用手拍個咪，等在場既人注意力都集中到佢度。
晨哥：「咳咳，唔好意思阻一阻大家。岩岩聽到有人想挑我機，如果係既麻煩係第一個小息去學生會報名，我會係lunch time應約，多謝大家。」
佢短短咁講左一句，之後就落返台，消失係人羣之中。
屌佢真係好撚型…
浩賢：「都唔明點解佢要應呢d無聊野，明知自己只係俾人拎黎威。」
阿希：「有乜所謂啫，反正佢都唔會輸，我又想睇下個Form 2仔輸成點。」
我：「拎黎威？即係好似阿希咁？」
黑仔：「係啦，根本大部分挑戰既一方都無諗過贏，諗住引人注目咋嘛。」
「贏到當然會引起更大迴響，但輸左都無人會怪佢，因為對手係藍洛晨。」
阿希：「就係呢個原因，挑戰者根本無乜壓力，所以先咁多人挑戰。」
我：「嘩…」
浩賢：「總知今日lunch time就有野睇啦，阿明同唔同我地食？」
我：「啊…好吖一齊食囉。」
一陣要Whatsapp Sarah佢地先得。
之後學校就打鐘，大家都當無事發生咁集隊，上堂。
呢間學校上堂無聖所羅王咁死板，老師唔係一味咁講書，會同學生交流下，講下笑咁，感覺好開心。
亦因為咁，時間感覺過得特別快，話咁快就到lunch time。
之前Send出去既Whatsapp已經有藍剔，即係佢地全部都睇左啦，ok唔洗煩了去食lunch。
我：「我地食乜好？頹飯？」
阿希：「頹乜飯吖咁哂時間，去買個撈麵返黎霸定個靚位睇好戲仲好啦。」
撈麵？都有段時間無食，都好。
我：「ok啊咁你帶路啦。」
就係我地四個行緊出校門既時候，我見到Sarah佢地五個，無錯，佢地五個全部都係哂度。
睇死佢地都係一齊食lunch。
黑仔：「嘩個五條女好靚呀！未見過既？唔通全部都係插班生？嘩仲有孖妹？」
阿希：「阿明你識唔識佢地？」
我：「eh…識既。」
都要搵機會同佢地講清楚先得，真係唔想瞞住朋友。
之後我地每個人都買左一個撈麵，返學校一樓搵左一個岩岩好睇到哂成個操場既位置開始食我地既lunch。
我：「點解要搵個要睇到哂成個操場既位既？」
阿希：「哦，因為九成都會係鬥波，嗱你睇下就講就到。」
藍洛晨出現了，佢身後仲有一大班人。
有幾個我認得應該係學生會既人走到去操場中圈，仲拎起個大聲公，睇黎係想宣布野。
「eh…對於藍洛晨同學個人既挑戰，截至五分鐘我地一共收到五個。」
阿希：「嘩五個咁多？今年到底咩事？」
浩賢：「大概係因為今年藍洛晨就要畢業掛。」
「藍洛晨同學要求以一場限時十分鐘既籃球比賽處理以上五個要求，雙方已經達成共識，比賽將會係五分鐘後舉行。」
我：「意思係一次過搞掂哂五個？」
浩賢：「嗯，仲要係佢一個人對五個人。」
咁痴線？
我：「佢係幾時開始玩呢d挑戰架？」
阿希：「好似係我地Form 2個陣開始？當時我記得有個Form 6既師兄話藍洛晨搶左自己條女，話要同佢隻楸之類。」
「但藍洛晨話郁手郁腳唔係自己風格，有乜唔滿意就用比賽分勝負。就係咁就開始左呢種挑戰。」
我：「但係老師無講d乜咩？」
黑仔：「又唔係犯校規，老師咪唔理，有時候佢地仲會一齊睇，甚至落場玩。」
嘩呢度真係師生同樂…
黑仔：「喂唔好講咁多啦，要開始啦。」