「無啦啦多左幾個家姐同細妹 Season 2」: 任性
突然發生左件咁既事，成檯人都好surprise，老母直頭「呀」一聲玵叫左出黎。
只有大家姐反應最為平淡，佢只係輕輕咁搖搖頭。
MK：「你..」
二家姐：「走啦…唔好煩我…」
MK：「八婆！！」
仆街！！要趕得切呀！
點解我咁趕？因為個MK已經一手扔左隻杯落地下，仲想一巴煎落二家姐度。
我以自己最快既速度，希望可以趕得切阻止呢件事發生。
好好彩，我成功左，我成功保護到二家姐。
美中不足既係，我並唔係英雄救美咁一手捉住條mk隻手。我只係仆左係佢兩個中間，因為咁吸引到個mk注意力，無打到落二家姐度。
我拍拍身上既灰塵，扮到無事發生咁企返起身。
我：「希望你可以尊重一下場合，同時尊重一下自己。」
唔知佢係咪俾我頭先既華麗登場嚇親，佢成個人o撚曬嘴咁企係度望住我。
我：「先生？」
多得我叫一叫佢，佢先回過神返黎，仲合返埋個口，擺返個嬲樣出黎。
Mk：「尊重？我肯黎已經俾臉曹家啦！同埋你邊位呀，我同佢講野唔關你事！！」
呢一年黎，好似聽過唔少呢D說話。
我：「夠膽非禮曹家二小姐！？」
我一邊用最大聲線講呢句說話，一邊將我既拳頭送到去呢個MK仔塊臉度。
無錯，我將佢狠狠咁打到撻左係地下。
我唔知自己點解會咁衝動，但的確我而家係好撚嬲。
好快，全場既目光都聚集哂黎我地呢一度。
MK：「你夠膽打我！？你係咩人！！」
我：「我係…」
哇屌！佢打算還拖！？
係我講左兩個字既時候，個MK突然起身，仲來勢兇兇，似係想打我。
不過佢永遠都打唔到我，因為有人捉住左佢。
捉住佢既人我唔識，但我識係捉住佢既人旁邊個個，係曹Uncle。
MK：「爸！放開我！呢條唔知乜水頭先打左我一拳，我要…」
曹Uncle：「唔知意思，佢係我個仔，失禮。」
原來捉住佢既人係佢老豆。
不過mk仔一聽到Uncle話我係佢個仔就即刻收聲，仲好驚訝咁望住我。
佢一直保持住呢個樣咁比佢老豆拖走左。
Uncle：「無事啦，繼續玩啦你地。」
我：「Sorry呀Uncle，我咁任性突然就打人。」
屌，都係快d認錯先好D。
Uncle：「唔緊要好小事啫，況且任性既人都唔係阿明你。」
佢講完之後就又再行開左，去同佢既朋友把酒交談。
Uncle佢想講乜，我諗在座既都好清楚。
但係二家姐仍然無動於衷，繼續飲佢既酒。
不過多得頭先個段短短既騷動，而家無人再敢埋黎我地呢檯，我總算可以鬆一口氣。
Sarah：「阿明…」
我：「嗯？做乜事呀？」
Sarah：「唔係吖…係你有無事先岩，你塊臉…」
我塊臉？我塊臉做乜..？咦有血既？
我再用電話照下自己塊臉，發現塊臉居然多左幾條傷痕，仲流緊血。
我：「可能係頭先仆親個陣𠝹到d玻璃，無事既我，唔洗擔心。」
Yui：「俾張紙巾你先啦阿明…」
我：「好呀唔該你，真係唔洗咁擔心我，我無事。」
我接過Yui俾我既紙巾，輕輕咁印走臉上既血，明明已經好細力，但屌你一印落去傷口個下仲係好撚痛。
當然，我無表露出黎啦，我都唔想Sarah佢地擔心。
我一個人靜靜咁坐係度，咩都冇講，咩都冇做。
過多一陣，大家姐就提議不如我地早d返去，老母都讚成，所以我地六個人就悄悄咁離開呢個喧嘩不斷既會場。
老母同大家姐扶住已經醉到一pat泥咁既二家姐上車，好彩我地行既係秘密通道，無乜人見到，如果唔係肯定比人指手畫腳。
華叔好快就送左我地返去，大家都好關心二家姐，慢慢咁扶佢去梳化坐低。
無人敢返自己房，個個都坐哂係梳化，望住訓左係梳化，郁都唔郁既二家姐。
大概約左十分鐘，二家姐終於起身，矇住眼咁scan左在場既人一次，之後就跌跌碰碰咁行左上樓。
老母：「好啦，都夜啦大家早d休息啦。」
大家姐：「嗯，Auntie講得岩，唔好諗咁多，阿May飲醉左啫，聽朝就無事架啦。」
兩個最大既人都咁講，我地呢d細既都唔敢再過問，唯有乖乖返房。
係返房既途中，Sarah同Yui都不斷問我洗唔洗消下毒貼下膠布咁，但我都一一回絕。
雖然係痛，但都無可能係兩個女朋友面前示弱架。
於是我一個人返到房，好快咁沖左個涼，想話早d休息，迎接聽日既來臨。
聽日要開始正式上堂啦，都係養足精神好D。
吖但屌你老母沖完涼個傷口痕左咁多既。
細個老母話過如果R傷口會有疤痕，但屌那星真係好痕呀，有無膠布呀？等我遮住d傷口R唔到都好吖。
但好可惜，成間房一塊膠布都無。
唉落去問下蘭姨佢地有無膠布先。
「喂…」
哇屌二家姐係幾時走左入黎架！！！
無錯，二家姐突然間出現係我間房，個樣仲係醉燻燻，但好似拎住D野咁。
我：「二家姐？」
二家姐無理我，繼續慢慢咁行埋黎，好似喪屍咁。
佢唔會係想借醉行兇呀？
佢每行一步，我就退一步，好快我就已經比佢逼到埋牆角，無路可退。
佢舉起手，我忍唔住合埋眼，因為我真係唔知佢會做乜，好驚。
咦…？好似有D野貼係我塊臉上？唔通…二家姐錫我？
我慢慢咁張開眼，發現二家姐塊臉同我貼得好近，可能只有兩cm。
但好遺憾，二家姐並無錫到我。
頭先覺得有D野貼係我塊臉原來係因為二家姐幫我D傷口痴緊膠布。
佢之所以靠到咁近係因為佢飲到好醉，要埋d先睇得清楚我D傷口係邊。
我：「二家姐…不如你比d膠布我…我自己貼返你咪唔洗咁辛苦…」
二家姐：「唔準嘈！！我差一張咋！」
我即刻收聲，企定定好似本貼紙簿咁俾佢貼。
二家姐：「搞掂…」
佢一邊講一邊轉身走，仲係跌跌碰碰咁，睇到都想笑。
但就係佢終於行到去門口個下，佢突然停低，仲望住我。
二家姐：「今晚既事…對唔住…同埋多謝你，早抖。」
「嘭」一聲，房門被關上了。
我一時間唔知俾乜反應好，唯有去照下鏡。
嘩，D膠布痴得咁樣衰既。
我又一次，忍唔住笑左出黎。