「無啦啦多左幾個家姐同細妹 Season 2」: 風暴
十分鐘既比賽，無一刻係令人可以移開雙眼既。
話精彩，的確可以咁講，但一味只係晨哥屈機。
佢每一個動作，每一下射籃都引起全場人既歡呼拍手。
最後比數係20:6，邊個係20唔洗我講啦。
輸左個五個人，全部睇落都筋疲力盡咁款，相反，晨哥仍然氣定神閒。
黑仔：「真係怪物，一打五都咁輕鬆，到底佢有無野係唔掂？」
阿希：「神係全能架嘛，又點會有弱點。」
黑仔：「你岩你岩，呀唔知第時佢會做乜呢？打工定做老闆？」
咦唔通佢地唔知晨哥係七星…？
浩賢：「喂佢係度做乜？拎左D乜？」
阿希：「好似係大聲公？佢想宣布野？」
阿希講得無錯，晨哥的確係拎起左大聲公。
晨哥：「岩岩既比賽會係一個好例子比大家，之後學會制度下會出現既紛爭都會用呢種方式解決。」
「啊，當然唔會只限於籃球比賽啦，只要雙方達成共識，咩形式既比賽除左打鬥都會被學生會承認，詳情將會同學會結果一齊公佈。」
「以上講既野亦適用於個人之間既紛爭，即係好似我呢個case咁。」
「OK解散，多謝各位。」
我：「即係話佢係想用呢個制度去化解所有學校入面既紛爭？有無可能呀..？」
浩賢：「但呢個的確係唯一可以安全而又唔會犯校規咁去處理既方法，大家都知道學會制度一出一定會有各式各樣既衝突，上至學會存亡，下至申請少少野都有機會引起爭執。」
「若要無一個好既處理方法就推出學會制度，到時又有衝突，可能會令學校取消成個制度，最後只會令大家無癮。」
黑仔：「嘩原來佢諗到咁全面？真係不愧係神。」
浩賢：「我都係估下架咋，喂差唔多夠鐘啦，執野走啦。」
聽到浩賢咁講，大家都開始執野，只有我一直望住個操場。
佢真係咁諗？
咦阿希佢地咁快走哂既？！
我只係望左一陣，佢地三個已經走鬼哂，都唔等人既。
算啦，返去先啦。
「傻仔明！！」
嘩係Anna把聲！？
我望過去門口，我五位大帝就已經企左係度，其中兩個仲要好嬲咁望住我。
一個係Anna，另一個係Ellen。
我：「Hi五位…」
Anna：「Hi你個頭呀傻仔明！！」
Anna一個箭步衝埋黎，兜下拍落我個頭度，痛到我差D嗌左出黎。
Anna：「做乜咁唔小心整到成塊臉傷哂！！」
我：「咁我心急想救二家姐吖嘛，當時情況又咁危急…」
Ellen：「咁你都無理由咁渣俾人用刀劃傷塊臉架！！你唔識避架！？」
今次到Ellen衝埋黎塞左我一拳，不過Ellen又點會有Anna咁大力吖，呢拳一d都唔痛。
不過，我諗佢地get錯左d野，我諗佢地應該唔知我d傷其實係…算啦唔俾佢地知真相仲好，佢地知道左真相一定會笑到我死。
我：「咁我都有打返對方既…」
Ellen：「咁梗係要啦！！如果我係度我肯定打死佢添呀！！」
Anna：「我肯定會叫阿鏢吊起佢黎打！」
我：「咁又唔洗咁激動既…」
「登登登登~」
上堂鐘響喇，又係時候上堂啦。
我：「好啦我地返去上堂啦，有乜放學或者Whatsapp再講啦好無？」
萬幸佢地五個都係專心讀書既好孩子，聽到鐘聲都有反應，再加上我既遊說就準備離開。
係帶佢地五個走既時候，我同Sarah四目交投左一下，佢即刻伸一伸脷仲做左一個鬼臉。
我就知道係你講…唉由佢啦。
晨：「唷阿明，乜咁人齊呀？」
哇屌，做乜d人一個接一個咁出現係我面前？今次到晨哥？
打完場比賽無耐既晨哥出現係我地六個人既面前，大家都有點愕然。
晨哥：「做乜呀？係咪我塊臉有d乜野？」
佢既語氣就好似完全唔當頭先既比賽係一回事咁。
Sarah佢地幾個開始提起頭先既比賽，大家都讃晨哥打得好好，好勁。唯獨Ellie走左去我旁邊，細細聲咁講左句野。
「你塊臉…應該唔係俾刀𠝹到？」
佢並無等我答佢就已經同其餘四個上左樓梯，留低我同晨哥。
果然都係Ellie心水清。
晨哥：「佢地幾個真係有活力呢。」
我：「嗯，係啊…」
晨哥：「嗯？做乜野啊你，有野想講？」
一下就睇穿左我，既然佢都開到口，咁我就問啦。
我：「你頭先同大家介紹既個個機制…真係只係打算用黎解決學會制度會帶黎既衝突？」
佢並無即刻答我，大家都沉默左一陣，直至佢唔知係邊度拎個網球出黎拋下拋下。
晨：「係咪因為你做過七星，培養左你對身邊既事既敏感度同觀察力呢？」
就係佢準備講下一句既時候，佢接返住個波，然後用「認真mode」既眼神望住我。
晨：「風暴可能好快就會黎到呢度。」
講完呢短短一句說話，佢又變返平時咁，嘻嘻哈哈。
晨：「希望我估錯啦~~我去上堂啦，有機會再講~~」
佢咁就拍拍屁股走左去，只留低一大堆問號比我。
「乜阿明你同個五個插班生仲有藍洛晨好熟架…？你地好似本身就識咁既..？」
嘩屌！又黎再個女班長Cody？大家都唔理時間表上堂架？
吖而家唔係應該講呢樣野既時候，仆街啦頭先講既野都比佢聽到哂？