夾錢中左六合彩頭獎, 但keep飛果個唔見左...: (21)

我地去到碼頭，正傾緊係咪真係返香港之際，泥頭突然神色痛苦咁打斷我地。 

「我…..我…..」泥頭突然面有難色咁。 

「屌，做咩食左兩舊屎咁嘅樣！」發仔問。 

「我……….我….」泥頭塊面竟然有D青。 

然後，我地幾個都諗到Ｄ野。 





「我肚痛…..要痾屎………！」佢好用力咁擠出幾個詞語。 

「屌你鑊鑊都係咁！」我忍唔住大罵。 

「都唔知你前世係咪屎忽窿縫埋左，要痾埋今世個份！」發仔鬧得比我更惡毒。 

其實唔怪得我地咁大反應，皆因呢Ｄ友次撚次行到一半都話急屎，人地新居入伙佢就借人個廁所開大，仲要痾親都係爛屎！ 

「始終依家情況未明，我都係去睇住泥頭好啲，你地係度等我地！」大舊道。 





之後大舊就扶住半彎住腰好似M痛咁既泥頭行去搵廁所。 

佢地行開左一陣，紅棍突然撞一撞我。 

「喂，９點鐘方向，條女係咁望住你喎！」佢同我講， 

發仔即刻擰過去望，慌死人地睇佢唔到咁。 

「嘩操！這麼醜的妞？！！？」佢怪叫一聲。 





「呀Sor鳩，３點鐘方向先岩！」紅棍道，讀文科嘅人對數字真係麻麻， 

我一望，虎軀劇震！ 

只見不遠處企左一個美豔動人，長髮披肩嘅水牌妹，一身金黃色既連身裙連同個發光既金沙水牌，配搭起來簡直係風華絕代。 

望多兩望，眼大大嘅佢睇落去直頭係曾愷玹既翻版！ 

「咦佢真係望住你喎呀恆！未找過夜數呀？」發仔笑騎騎咁講，我忍唔住踢左佢一腳。 

「仆街啦！大驚小怪！呢種情況阿叔年中遇唔少啦。」我口事心非道，事關我咁大個仔俾女啤就啤得多，從未試過好似依家咁俾人昅到實一實。 

「你估你係小豬呀？正所謂無事望鳩恆，必有所求。你係咪擒晚做過Ｄ咩呀？」發仔問我。 

條女與我目光一接，即時慌張地望向另一邊。 





「 玩埋欲拒還迎咁喎。」發仔道。 

我下意識整一整件衫，向前走去。 
紅棍同發仔企係我３步以外，毫不掩飾佢地兩對咸濕嘅眼神。 

美女長髮係空中飄起，一陣陣香氣傳過黎， 

「Hi…」我鼓起勇氣向佢打左聲招呼。