每個人，都試過鍾意一個讀VA既女仔: 第十五章

「你見點呀？」cynthia早已站在設於地鐵門口旁的拍攝證件照機，一望見我便上前關心道。
 
是日的她，身穿一件再也簡單不過的白色T-shirt和牛仔褲。沒有綁上馬尾的她，與一身輕便純樸的打扮配合的天衣無縫。
 
「又係咁……時不時就好痛……」其實打從起床至現在，胃部也未曾作出任何反抗行為，但我倒是想一睹眼前人為我擔心的神情。
 
有時候，講大話反而會比講事實更為適合，就係咁解。
 
「咁快啲去醫院到睇吓咩事啦。」
 




說來這也可算是一大笑話，別人第一次約會總是離不開行街睇戲食飯。但我和cynthia的第一次居然是去醫院！
 
假如肥正或是加拿大仔站在身旁，他倆必會反著白眼亳不留情地回應：「人地有話係同你約會咩？係得你一個痴漢自己咁諗。」
 
可惜，我樂得當上這一位痴漢一天。
 
不，不光是一天。
 
「小心啲呀。」正當走至樓梯級時，cynthia生怕我會再次刺激到腹部而主動挽著我手臂。
 




而我，也立馬裝模作樣的擺出一副痛苦的表情，好讓她挽得我更緊。
 
呢個痴漢，我願意做一世。「仆街嚟講，你都算係天上有地下無。」隔天早會時，我和加拿大仔他們細說昨天的故事，但肥正聽到這幕時，忍不住插口批評。
 
「咁……呢啲都算係人之常情嚟既……」加拿大仔看似是為我護航道。
 
「都係你知我心。」
 
「死開啲啦，你連人都不如呀！之後點呀？」加拿大把我剛搭住他肩膀的手掃開，並著我趕快繼續講故。「麥俊傑，請到分流站。」
 




「你響到等我啦，好快返。」需知道，公立醫院輪待時間絕非一般人可忍受，若想早點叫到你的名字時，除了你本身的病情之後，演技也佔了不少。
 
「咩病？」這位中年女性護士戴著口罩，目無表情的詢問著，並馬上為我測量血壓心跳等。
 
你就係考官？就俾你見識吓我既演技啦！
 
「我胃痛……一痛就連野都食唔到……」我不忘彎下腰，撫摸著自己的腹腔。

「痛咗幾耐？」看來這位中年護士依舊無動於衷，行動要升級了。
 
「成個月啦……」
 
「咁做咩依家先嚟睇醫生？」
 
……




 
仆街。
 
「咁係因為……」正當我想反駁時，中年護士更是不讓我有反擊的餘地：「心跳血壓都正常，見你回答有文有路，出去等叫名啦。」
 
我看見一張綠色底的紙張從打印機抽出，心知不妙並作出最後一招。
 
「如果我之後突然好痛呢？」
 
「咁你到時再返入嚟搵我啦。」
 
如要為她寫上一句潛台詞，中年護士心底鐵定訕笑著我：「呢啲野我一日聽幾百次，咁既演技諗住可以打尖？冇咁易！」
 
就係咁，我拎住張第五類分流既紙，行返返去cynthia隔離坐低。
 




「可能……要等好耐先到我……」我不敢與cynthia的目光對上，生怕她一臉不耐煩的樣子。
 
「唔緊要啦，咪當呢到係自修室囉。」只見她從一個看似是自製的布袋抽出一份功課和筆袋。
 
唔撚係掛……佢認真架？
 
藝術家性格：你永遠都唔會知佢個腦係點諗野，但係所做既事往往係你諗都諗唔到。