每個人，都試過鍾意一個讀VA既女仔: 第十六章

在醫院裡頭做功課，這提議相信只有她才會想得到。但見她如此認真的模樣，我也不禁默默地掏出功課一同書寫。
 
「咦，咁你係咪做晒功課啦？」加拿大仔聽到此時雙眼發光。
 
「地理嗰份做完啦，你依家去同校長講話想加修地理咪借俾你抄囉。」風紀此時於我身旁走過，示意不要談天。
 
「挑，又話要等好耐﹗定係又俾你條友仔呃到個老女人等你可以快啲睇到醫生？」加拿大仔無視風紀的存在，硬要把頭轉向後方盯著我。
 
「我地既傑哥仔一睇個樣就知係無心向學啦，你唔係諗住佢真係會同女坐響醫院到做成兩個幾鐘功課呀嘛。」肥正排在加拿大仔前面，但他卻望著前方，未曾正視過我們說道。
 




「總知你記住constructive plate boundary就係多咗啲地，destructive就係冇咗啲地啦。」每當遇上不明瞭的問題，cynthia總會耐心地教導著我。
 
但，醉翁之意總是不在酒。
 
每次解答， 我都總是有意無意地靠向她，不自覺地愈靠愈近。近得只要直視著對方便能親嘴似的。
 
「我冇位啦，你坐返過去得唔得呢？」cynthia沒好氣地問道，我才猛覺原來我早有半個屁股坐在她的位子上。
 
「你隻手指遮住咗條問題呀嘛，所以我咪坐過啲諗住睇清楚啲囉。」我隨便說了一句藉口推脫過去。
 




幸得cynthia講解清晰，這份地理功課，不消半小時便給解決了。眼見還有一個多小時，該如何打發？
 
「你肚唔肚餓呀？」
 
「去邊到食？」
 
大獲，又嚟到呢條超高難度既題目啦！同班老死就話是但食個M記都冇乜問題，但係響我身旁既係心上人，點都唔可以失禮既！
 
「嗯……你有冇咩特別想食？」還是先試探一下口風再作打算。
 




「我冇所謂呀，我又唔係咩港女要食埋晒啲貴野，是但搵間快餐店都得架。」她這樣說，是否亦在試探著我？
 
「咁……大家樂點睇？」
 「仆街你唔係真係帶條女去食大家樂呀嘛？」早會過後，眾人都需要排隊行樓梯上班房。肥正在此時忍不住停下來問道。
 
「吓……咁佢話冇所謂呀嘛……」
 
「所以你冇拖拍真係唔係冇原因。」加拿大仔做了個手勢示意肥正不要停留。
 
「最緊要係佢肯同我食呀，你地吹咩？」我得意地揚眉並一個箭步上前插隊。「一個焗豬排飯呀。」
 
「我要個四寶飯。」
 
而我出於紳士之道，也主動替她到取餐處取餐，並著她隨便找個位子坐下。
就在此時，我突然看見一個熟悉的身影……




 
一位身形與我父親差不多，而身穿的波鞋和短褲，感覺我父親也擁有著一模一樣的款式。更為重點的是，他上半身的員工制服，正是不謀而合……
 
仆街，佢真係我老豆呀！
 
「死伙！」我三步併著兩步同時拿著兩個餐疾步走向cynthia，低著頭好讓父親不有發現自己。
 
「做咩事呀？」cynthia順勢望向後方。
 
「嗰個係我老豆，佢見唔見到我呀。」這招鴕鳥戰術，很明顯是失敗。
 
「佢望到你實一實呀。」
 
此時，我心中正有一個龍捲風似的，而腦袋更是飛快地運作，盤算著有哪有藉口能夠解釋這一切。
 




其實……cynthia暫時又唔係我邊個，我同個朋友食飯姐！咁……朋友唔係男就係女架啦，有咩咁唔見得光呢？