《我係窮郵差，專門幫陰陽相隔嘅親人送信》（書局上架中）: 157

 
 
喺醫院休息哩段時間，我真係精神咗好多，平時點都會釣下魚，但今日竟然乜事都無。
 
 
而最奇怪嘅係，我瞓咗咁耐，都無再去過陰間。
 
 
係無一次。
 


 
唔通義律講嘅嘢係真？
 
 
我個腦開始一片空白，雖然我好想可以擺脫渴睡症，但喺哩個關頭⋯⋯
 
 
諗住打畀王胤瀅，通知佢我出院嘅時候，點不知佢手機唔通。
 
 


到我出咗院之後，佢電話都係唔通，我覺得有啲奇怪，諗諗下都係唔放心佢，
就決定上佢屋企搵佢。
 
 
禁極鐘都無人開，我諗起佢同我屋企都一樣，都會收埋鎖匙喺地氊底，就拎鎖匙開門。
 
 
當開門入屋後，屋企仍然係亂到飛起，啲衫周圍飛周圍擺，同我第一次嚟嘅時候一樣。
 
 


經過客廳入房時，房間都係無人，果然佢唔喺度。
 
 
但間房仲亂過個廳，佢連個行李箱都未收返好，仲放咗喺枱嘅隔離。
 
 
正當我想走時，目光不經意咁瞄到一樣好熟悉嘅嘢，令我停咗一停。
 
 
 
一樣好眼熟嘅嘢。
 
 
我喺李繁生嘅屋企都見過⋯⋯
 


 
船飛⋯⋯
 
 
獅星號嘅船飛。
 
 
腦海忽然回想返第一次上佢屋企時，見到一片狼藉，忍唔住話佢時，佢將啲衫、行李箱、毛巾等等一嘢推返晒入房，然後話：
 
 
「咩啫，本身準備緊去旅行嘛⋯⋯」
 
 
大量訊息湧入頭腦，我恍然大悟，王胤瀅之所以會無啦啦搵到佢哋之間嘅共通點，原因係佢本來就係獅星號嘅乘客，佢係同爸爸去旅行！
 


 
我馬上奪門而出！