《我係窮郵差，專門幫陰陽相隔嘅親人送信》（書局上架中）: 158
我終於明白，原來嗰次帶王胤瀅去陰間，畀守衛襲擊我哋，唔係佢哋失誤，亦唔係無差別攻擊，而係因為⋯⋯佢哋嘅對象根本就唔係我！
而係身邊嘅王胤瀅。
唔係無差別攻擊，而係義律口中所講嘅「命運」，正係要償命嘅開始。
我拼命咁跑，上到天台，唔見佢嘅跡影，一邊不停咁打飛去留言信箱嘅電話，一邊跑去戲院、摩天輪，每一個佢去過嘅地方⋯⋯
但都搵唔到佢。
唔好死呀，唔好死呀⋯⋯王胤瀅⋯⋯
我個心真係急到好似畀火燒咁，喺街不停咁行，不斷咁撞到人，但自己真係停唔到，心如火焚，焦急萬分⋯⋯
唔得，南門亮⋯⋯你要冷靜啲，再諗下⋯⋯再諗下佢可能會去邊？
忽然我諗到⋯⋯
搭的士越到堅尼地城嘅海旁，我立即四圍咁搵佢，終於畀我喺海旁見到佢，佢正喺企出欄杆外，迷迷糊糊咁，有啲經過嘅途人正不知所措咁望住佢。
「王胤瀅！」
「王胤瀅！」
「南門亮⋯⋯？」
聽到聲音，佢緩緩咁轉過嚟望住我，哩一刻嘅佢雙眼無神，好似只係得返眼珠同眼白嘅形體，成個人都失去靈魂咁。
「妳返過嚟先啦。」我伸手出嚟，但佢只係好呆咁望住，無伸手捉。
「係我嘅錯⋯⋯係我買嘅船飛⋯⋯」
「唔關妳事㗎，妳又點會預到呢？」
「佢話⋯⋯我拋低爸爸一個人⋯⋯佢話我哋本身就應該死⋯⋯」王胤瀅眺望住大海講。
「我真係好衰⋯⋯」
「咁樣點算衰？妳都唔係有心嘅，無人會估到㗎。」
「佢話⋯⋯決定咗嘅事，唔應該違抗，我可以永遠同爸爸媽媽一齊。」
「妳哋唔會見到㗎！」我緊張咁講，但一時間真係唔知點解釋。
佢哩個時候踏出一步，只要再行一步就會跌落去。
「你記返你自己同個李繁生講過乜嘢。」
「唔同㗎⋯⋯唔同⋯⋯南門亮，我無晒親人啦，反正我都係得返我自己一個⋯⋯」
佢已經一隻腳叉咗出去，只差踏出埋最後嗰步⋯⋯成個人搖搖欲墜。
「你仲有我呀！」我行前一步話：「我好鍾意妳哩個朋友！妳喺我心目中好好！可唔可以唔好拎走我個好朋友⋯⋯」
「好朋友？」
「妳唔係話最憎差人嘢㗎咩？我上次借咗紙巾畀妳，妳仲未還！妳而家差緊我嘢呀！妳唔會唔舒服咩？」
佢好似好辛苦咁，抱住頭講。
「我好攰⋯⋯有啲眼瞓⋯⋯」
「又⋯⋯又係你⋯⋯」
說話之間，佢已經左搖右恍，喺跌前嘅一剎那，我急忙衝上前，成功拉住佢。
差少少就跌落海，驚險到我成身汗。
佢好似暈咗⋯⋯
當我用九牛二虎之力抱佢入返欄杆內時，先發現佢嘅徵狀唔似暈咗咁簡單。
佢嘅樣⋯⋯好似係去咗陰間嘅人。
阿龍⋯⋯
阿龍⋯⋯
如果阿龍纏住佢唔放，最終都係會重蹈覆轍。
唯一救王胤瀅嘅方法，就係去陰間⋯⋯
但問題係⋯⋯我已經再去唔到陰間。
唔通我要眼白白睇住佢死，救唔到佢？
忽然間，我諗起⋯⋯
無錯，郵局！
郵局應該可以幫到我。
我抱住王胤瀅，匆匆忙忙咁去到郵局，連門都係撞入去，嚇到唔少人望住。
「娟姐⋯⋯救命呀！」
「做⋯⋯做咩事？」娟姐趕過嚟，有啲驚訝咁問。
「佢⋯⋯王胤瀅就嚟會死啦！」
「咁仲唔送佢去急診室做咩！」
「唔得，佢喺陰間⋯⋯我要去陰間！」我都唔知自己講乜，好難解釋。
喺哩個時候，局長竟然行咗出嚟，左觀右望，發現我喺度，就問：「咩事咁嘈？⋯⋯點解你會喺度？」
點解成日喺唔適當嘅時候都有唔適當嘅人！
「局長，我要救哩個女仔⋯⋯」
「所以呢？救佢咪去醫院囉，走嚟哩度做咩？」
「我⋯⋯佢意識喺陰間⋯⋯」
「咁你咪自己落去囉。」佢己經打算轉身走，完全無聽我講嘢。
「局長！」
「夠啦！你已經唔再係哩度嘅職員，你即刻離開！」佢咆哮咁叫，大聲到全世界都聽到。
「局長⋯⋯」
「現在立即！」
當我抱住王胤瀅，一步一步行出郵局時，我真係唔知可以點做⋯⋯
係咪就咁要完⋯⋯
「阿亮接住呀！」娟姐忽然大叫，我一轉身迎面而嚟一條鎖匙，幸好我本能反應下接穩。
係我房間嘅鎖匙！
「跑呀！阿亮！」
局長見到，氣急敗壞咁話：「作反呀！」想衝過嚟阻止我，但誠哥衝出嚟，一嘢擋住咗局長。
「去啦！」
我先如夢初醒咁話：「喔！」感動萬分咁話：「多謝你哋！」
跑到入房，好熟悉嘅感覺又返翻嚟，我放低王胤瀅，然後望住被封印嘅門。
嗰一對傳聞入咗去，就出唔返嚟嘅門。
我打開對門，另一面係黑暗混沌，我個腦一片混亂，唔知點解好有預感今次我會返唔到嚟。
但望向另一邊沉睡緊嘅王胤瀅，我無可能畀佢死。
「呯呯！」哩個時候傳嚟門畀人撞擊嘅聲音，局長好大聲咁喺出面話：「開門呀！」
「呯！呯！」門就嚟頂唔住要被打開。
「死就死啦⋯⋯」
「我嚟啦。」
門被打開嗰一刻，終於我衝咗入去！
我從未試過唔係瞓覺咁去陰間，直接通過門穿過有好種真實感，身體又有種靈魂被抽空嘅感覺。
哩種感覺持續咗三十幾秒，終於再次嚟到陰間，企喺夕陽棧道，打開眼之時，已經感覺到好唔妥。
好唔妥嘅感覺係⋯⋯太靜。
靜從來都唔係問題，陰間本來就係一個極為安靜嘅地方，不過而家哩一種靜又有啲唔同。