《我係窮郵差，專門幫陰陽相隔嘅親人送信》（書局上架中）: 156

 
見到嘅第一個人，就係王胤瀅。
 
 
佢好緊張咁㩒鐘，然後就問咗我一個睇TVB劇永遠都會問嘅問題。
 
 
「你醒啦？」
 
 


「係呀⋯⋯」
 
 
「點解我會喺嘅？」
 
 
「你仲好講，我上你屋企搵你時，你瞓到鼻同額頭流晒血，又叫唔醒，究竟發生咩事？」
 
 
「對唔住⋯⋯」諗起頭先嘅事，就覺得好長篇大論。


 
 
醫生嚟咗檢查一翻之後，話我身體好健康，乜事都無。
 
 
「可能你太攰又撞到啫，休息多啲就得。」醫生係咁講，我無乜事好快就可以出院。
 
 
「放心啦，你安心咁休息下，乜嘢都唔好理住就啱㗎啦。」王胤瀅已經開始幫我蓋被。
 


 
我閉上眼，發現有啲唔妥。
 
 
王胤瀅問：「做咩事？」
 
 
「好似有啲唔對路。我⋯⋯好精神咁⋯⋯」
 
 
「好精神？」王胤瀅問。
 
 
「係呀⋯⋯⋯平時我一分鐘就瞓咗。」
 


 
我身體有種好奇怪嘅感覺，好唔熟悉⋯⋯
 
 
「可能係好事嚟呢⋯⋯你飲咁多咖啡，遲早糖尿病啦，而家唔洗再依賴啦。」
 
 
我到而家先發現到今日嘅佢，臉色好蒼白，無乜精神，好似唔夠瞓咁。
 
 
「無呀⋯⋯只係瞓得唔好。」
 
 
「真係？」
 


 
「⋯⋯」佢無再講哩個話題，只係話：「上次我咪話去查，究竟自殺嘅人有咩共通點嘅⋯⋯」
 
 
「嗯，我都知道⋯⋯係獅星號嘅乘客。」
 
 
佢瞪大眼睛，好驚奇咁問：「點解你會知道嘅？」
 
 
「因為⋯⋯一匹布咁長，我遲啲再同你解釋。」
 
 
佢沉默唔講嘢時，我突然先記起。
 


 
「對唔住⋯⋯你爸爸就係其中⋯⋯」
 
 
佢搖搖頭話：「唔緊要⋯⋯都唔關你事。」
 
 
佢一咁講，我個心就好內疚，如果我可以真係救到佢哋⋯⋯
 
 
大家都靜咗唔講嘢。
 
 
「如果⋯⋯如果⋯⋯我哋可以一齊就好啦。」佢忽然話。
 


 
嘩，哩刻我嘅心跳聲大到自己都聽到，唔知點回應。
 
 
哩個⋯⋯哩個唔通係傳說中嘅⋯⋯
 
 
「畢竟威尼斯都真係幾靚，如果可以同佢一齊去就好。」佢話。
 
 
原來係講佢爸爸⋯⋯
 
 
「妳真係無事？」
 
 
「嗯。」佢笑住講，但睇得出哩個笑容好勉強，係無乜精神咁講。
 
 
「妳不如返屋企瞓先。」
 
 
「好啦⋯⋯」
 
 
大概佢精神都唔係咁好，就先返咗屋企。
 
 
等王胤瀅走咗之後，瞓返落床⋯⋯我開始感覺眼淚決堤咁流出嚟，止都止唔住。
 
 
我諗起義律講我媽咪，佢最後扮搯死媽咪嘅動作，都一一深烙喺我腦海，不停咁浮現，每浮現一次，內心就好似畀人打咗一搥咁，痛不欲生。
 
 
對唔住⋯⋯對唔住⋯⋯
 
 
好後悔為咗一個女仔，連累全家人⋯⋯
 
 
細妹⋯⋯媽咪⋯⋯
 
 
我真係好對你哋唔住⋯⋯
 
 
都唔知喊咗幾耐，淨係知喊到無晒力，就不知不覺咁瞓咗。