《我係窮郵差，專門幫陰陽相隔嘅親人送信》（書局上架中）: 152

 
佢媽咪好擔心咁走過嚟，拉開我話：「你走啦，唔好再逼佢！佢情況已經唔好㗎啦。」
 
 
「你信我啦，我都信你唔係有精神病。」我繼續大叫。
 
 
無任何聲音。
 
 


「我知你見到你死咗嘅爸爸，係咪？我信你真係見到。」
 
 
房門漸漸打開一條小狹縫。
 
 
「真係？」佢問。
 
 
「嗯。」


 
 
過咗一陣，房門打開，佢慢慢咁行出嚟。
 
 
「你⋯⋯真係⋯⋯信？」
 
 
「無錯。」
 


 
「你呃我！」佢皺眉頭講。
 
 
「無，因為我都見到⋯⋯你嗰個世界，所以你絕對唔係精神病。」
 
 
李繁生終於肯坐低，靜靜咁細講件：「其實我都唔知自己點解會咁。」
 
 
李繁生話，有一日發夢嘅時候，喺一個漆黑無光嘅地方，夢見一個男人。
 
 
個男人係夢入裡面問佢：「你想唔想見返你死咗嘅爸爸。」
 


 
「想呀！我想呀！」之從李繁仁嘅父親喺地盤工業意外而死之後，李繁仁一直都好掛住佢爸爸，好想同佢講返嘢。
 
 
「如果我可以帶你去見佢呢。」
 
 ​ 
「你可以？」
 
 
「無錯呀，我可以幫陰陽相隔嘅親人⋯⋯見面。」
 
 
就係咁，李繁仁就畀佢帶咗一個有好大個夕陽嘅地方。
 


 
喺一間河邊嘅小木屋度，李繁仁再次見返佢嘅父親，死咗嘅父親。
 
 
「爸爸！」佢馬上擁抱佢爸爸，好熟悉嘅氣味同懷抱。
 
 
「仔⋯⋯」
 
 
佢好後悔無好好同佢爸爸傾過計。
 
 
「你知唔知道，我同媽咪都好掛住你。」
 


 
李繁仁滔滔不絕咁開始講返佢哋嘅生活，因為實在太耐無見，佢完全講唔停，直至個神秘男人同佢講：「係時候要走啦。」
 
 
李繁仁急忙捉住佢爸爸隻手話：「未得！我仲未同爸爸傾夠。」
 
 
「唔緊要。你唔洗驚會見唔到。」神秘男人笑笑咁話：「我可以每一日都帶你嚟。」
 
 
就係咁，李繁仁每日嘅夜晚，都會夢見同一個男人，畀同一個男人帶去見佢爸爸。
 
 
每次都傾到唔想走，時間仿佛過得好快。
 


 
「又⋯⋯又夠鐘？」
 
 
依依不捨咁同佢爸爸分別後，神秘男人話：「你覺唔覺每日都見得好少。」
 
 
佢用力咁點點頭。
 
 
「不如你同你爸爸一齊啦，反正佢自已一個都好悶，咁樣⋯⋯你哋咪唔會分開囉。人，遲早都要去陰間㗎啦，早啲同遲啲有咩分別？」
 
 
原本李繁仁都係拒絕，但每日畀佢咁講一講，心開始有啲動搖。
 
 
「你爸爸都係因為你無關心佢先死。」
 
 
「你唔覺得你有責任咩？」
 
 
「嚟啦，可以一家團聚呀。」
 
 
可以一家團聚。
 
 
一家團聚。
 
 
李繁仁就係咁，迷迷糊糊地選擇企上天台。
 
 
只咁啱有人經過，先阻止悲劇發生。
 
 
當李繁仁講完成件事之後，李太太嘅眼睛已經紅晒，傷心咁流淚。
 
 
「無你媽咪，又點叫一家呢？」王胤瀅話。
 
 
李繁仁只係低低頭，再一言不發。
 
 
「努力對餘下嘅人好，珍惜你仲有嘅先叫生活，而唔係盲目沉醉喺過去呀⋯⋯」王胤瀅好激動咁講，講到佢自己都臉紅。
 
 
「努力活下去啦，好唔好？」我都話。
 
 
李繁仁流住淚咁點點頭。
 
 
臨離開佢哋屋企時，我唔覺意瞥見佢枱頭有張郵輪船飛。
 
 
「咦，你哋⋯⋯諗住去旅行呀？」
 
 
「係呀，不過⋯⋯嗰次畀人搞到去唔成，要再請假。」佢媽咪話。
 
 
王胤瀅望住張船飛，似乎有啲嘢諗緊。